Marki 5:1-43

  • Zezi mannin mmusu’m be atin naan be wlu kɔkɔti’m be nun (1-20)

  • Zairisi i wa bla’n.

5  Kɛ ɔ yoli sɔ’n, be ɔli jenvie’n i bue kun lɔ, Zerazafuɛ’m be mɛn’n nun lɔ.  Kɛ Zezi fin alie’n nun jrali cɛ’n, ɔ nin bian kun mɔ mmusu kun o i su m’ɔ fin asieliɛ’m be su lɔ’n, be yiali.  Asieliɛ su lɔ yɛ ɔ tran-ɔn. Lele m’ɔ́ fá jú blɛ sɔ’n nun’n, sran fi w’a kwlá cimɛn i naan w’a trɛ i ase. Be fa jrɔkɔ bɔbɔ be ci i’n, ɔ ti ngbɛn.  Blɛ sunman nun’n, be boli i kpanwun, kpɛkun be cili i nin jrɔkɔ. Sanngɛ ɔ kpɛkpɛli jrɔkɔ’m be nun, kpɛkun ɔ bubuli kpanwun’m be nun. Sran fi i wunmiɛn’n jumɛn i liɛ’n nun.  Kɔnguɛ-o, wia nun-o, ɔ o asieliɛ nin oka’m be su. Ɔ kpankpan, kpɛkun ɔ fa yɔbuɛ mun kpɛkpɛ i wunnɛn’n.  Sanngɛ kɛ ɔ wunnin Zezi mmua lɔ’n, ɔ wanndili ɔli i wun lɔ, kpɛkun ɔ kotoli i bo.  Ɔ kpannin kekle kpa seli kɛ: “?Zezi, Ɲanmiɛn m’ɔ o like kwlaa ti su’n i Wa, ngue yɛ a bɛ i yolɛ-ɔ? Ta nda Ɲanmiɛn ɲrun kɛ a su kleman min ɲrɛnnɛn.”  Afin Zezi seli i kɛ: “Mmusu, jaso bian’n su.”  Yɛ Zezi usɛli i kɛ: “?Be flɛ wɔ sɛ?” Ɔ tɛli su kɛ: “Be flɛ min Akpingbin, afin e sɔnnin kpa.” 10  Kpɛkun ɔ srɛli Zezi kpa kɛ nán maan ɔ fuan be mɛn sɔ’n nun. 11  Kɛ ɔ́ yó sɔ’n, nn kɔkɔti kpanngban kpa wie’m be o kpɔlɛ’n su lɔ, be su didi. 12  Ɔ maan mmusu’m be srɛli i kpa kɛ: “Yaci, man e atin naan e ko wlu kɔkɔti’m be nun.” 13  Yɛ ɔ mannin be atin-ɔn. Ɔ maan mmusu’m be jasoli bian’n su, be ɔli be ko wluli kɔkɔti’m be nun. Yɛ kɔkɔti’m be fin kpɔlɛ fleiin’n su lɔ be guali jenvie’n nun naan b’a mlɔn. Be kwla ju akpi nɲɔn (2.000). 14  Kɔkɔti’m be sunianfuɛ’m be wanndili. Be ko kannin ndɛ’n klɔ’n nin nanmue’m be nun. Kpɛkun sran’m be bali, be wa niannin sa ng’ɔ juli’n. 15  Kɛ be juli Zezi i wun lɛ’n, be wunnin bian nga mmusu Akpingbin kleli i yalɛ laa’n. W’a wla tralɛ, ɔ ti lɛ. I ɲin su w’a klo. I sɔ’n ti’n, srɛ kunnin be. 16  Asa ekun’n, sa ng’ɔ juli bian mɔ mmusu o i nun’n i su’n, ɔ nin sa ng’ɔ juli kɔkɔti’m be su’n, be nga be wunnin nun’n, be kan kleli sran sɔ mun wie. 17  Ɔ maan be seli Zezi kɛ ɔ jaso be mɛn’n nun. 18  Kɛ ɔ́ fú alie’n nun’n, bian nga mmusu’m be kle i yalɛ laa’n, ɔ srɛli i kɛ ɔ nin i bé kɔ́. 19  Sanngɛ w’a kplinman su. Ɔ seli bian’n kɛ: “Kɔ ɔ osufuɛ’m be sin. Ko kan sa kwlaa nga Zoova yo mannin wɔ’n, ɔ nin aunnvuɛ ng’ɔ sili wɔ’n, be ndɛ kle be.” 20  Bian’n ɔli, kpɛkun ɔ kannin sa kwlaa nga Zezi yoli mɛnnin i’n i ndɛ Dekapɔlu* mɛn’n nun lɔ. Ndɛ sɔ’n boli sran’m be kwlaa be nuan. 21  Zezi fuli alie’n nun, ɔ kpɛli nzue’n ekun ɔli i bue kun lɔ. Kɛ ɔ juli lɔ’n, sran kpanngban kpa be yiɛli i wun lɛ. Kɛ ɔ́ yó sɔ’n, nn ɔ o nzue’n i nuan lɛ. 22  Zuifu’m be Ɲanmiɛn sulɛ sua’n i su kpɛn’m be nun kun bali. Be flɛ i Zairisi. Kɛ ɔ wunnin i’n, ɔ kotoli i bo. 23  Ɔ srɛli i kpa seli kɛ: “Min wa bla kan’n su wu. Yaci, bla wa fa ɔ sa fuɛ i su, maan ɔ yo juejue naan ɔ ɲan nguan.” 24  Ɔ maan Zezi nin i be ɔli. Kɛ bé kɔ́’n, sran kpanngban be su i su, kpɛkun be miɛn i fii kpa. 25  Bla kun mɔ mmoja tu i w’a di afuɛ blu-nin-nɲɔn’n (12), ɔ o be nun wie. 26  W’a fɛ kpa ayre yofuɛ’m be sa nun. I sika’n kwlaa w’a wie i sa nun, sanngɛ w’a yoman juejue. I tukpacɛ’n yo tɛ kɔ i ɲrun titi. 27  Kɛ ɔ tili Zezi i su ndɛ nga be kan’n, ɔ sinnin i sin lɔ. Ɔ wluwluli sran’m be afiɛn lele ko kɛnnin i tralɛ dan’n. 28  Afin ɔ seli i klun lɔ kɛ: “Sɛ n kɛn i tralɛ dan’n bɔɔ cɛ’n, ń yó juejue.” 29  Kɛ ɔ kɛnnin i’n, mmoja m’ɔ tu i’n, ɔ ka lɛ kpɛli. Kpɛkun ɔ wunnin kɛ i wun tukpacɛ kekle sɔ’n w’a wie. 30  Zezi ka lɛ wunnin kɛ i wunmiɛn’n wie w’a fin i nun w’a fite. Ɔ maan ɔ kpɛli i ɲin niannin sran mun, yɛ ɔ usali kɛ: “?Wan yɛ ɔ kannin min tralɛ’n niɔn?” 31  Sanngɛ i sɔnnzɔnfuɛ’m be tɛli i su kɛ: “A wun kɛ sran’m be mian wɔ fii kpa, kpɛkun a usa kɛ: ‘?Wan yɛ ɔ kannin min-ɔn?’” 32  Sanngɛ ɔ kpɛli i ɲin kunndɛli sran ng’ɔ yoli sa sɔ’n. 33  Kɛ bla’n wunnin kɛ w’a yo juejue’n, srɛ kunnin i, yɛ ɔ usuli. Ɔ maan ɔ bali wa kotoli i bo lɛ naan w’a di ndɛ’n kwlaa i nanwlɛ w’a kle i. 34  Ɔ seli bla’n kɛ: “Min wa, Ɲanmiɛn su mɔ a lafi’n ti’n, w’a yo juejue. Maan ɔ wla gua ase, kɔ, maan ɔ tukpacɛ kekle sɔ’n wie.” 35  I nuan nin-a tɔman, kpɛkun sran wie’m be fin Zairisi i awlo lɔ b’a ba. Be wa seli kɛ: “Ɔ wa bla’n w’a wu. Nán bo wɛ kle Like klefuɛ’n i yalɛ.” 36  Zezi tili be ndɛ’n. Ɔ maan ɔ seli Zairisi kɛ: “Nán srɛ kun wɔ.* Ɔ li lafi min su.” 37  Kɛ ɔ́ kɔ́’n, w’a manman sran uflɛ atin kɛ ɔ su i su, saan Piɛli, nin Zaki, nin Zaki i niaan bian Zan. 38  Kɛ be juli Zairisi i awlo lɔ’n, ɔ wunnin kɛ lika’n w’a keje yekee. Sran wie’m be su sun, wie’m be su bo awuyomo. 39  Kɛ ɔ wluli sua’n nun lɔ’n, ɔ seli be kɛ: “?Ngue ti yɛ amun sun mɔ amun yo mɔ lika’n keje sɔ-ɔ? Ba’n w’a wuman, lafilɛ yɛ ɔ su lafi-ɔ.” 40  Kɛ be tili ndɛ sɔ’n, be srili i. Yɛ ɔ kannin be kwlaa be bo-ɔ. Ɔ fali bakan’n i si nin i nin, yɛ be nga ɔ nin be ɔli’n, kpɛkun ɔ wluli lika nga ba’n la lɔ’n. 41  Ɔ trali ba’n i sa’n, yɛ ɔ seli kɛ: “Talita kumi.” I bo’n yɛle kɛ: “Talua kan, n se wɔ kɛ, ‘Jaso!’” 42  Be ja nun lɛ’n, talua kan m’ɔ le afuɛ blu-nin-nɲɔn’n (12), ɔ jasoli, kpɛkun ɔ nantili. Kɛ be wunnin i sɔ’n, ɔ boli be nuan dan. 43  Sanngɛ ɔ wlali be su nun kpa kɛ nán be kan kle sran. Kpɛkun ɔ seli be kɛ be man ba’n i like maan ɔ di.

Ja ngua lɛ nzɔliɛ mun

Be kwla se ekun kɛ “klɔ dandan blu mun.”
Be kwla se ekun kɛ “Nán srɛ kun wɔ kun.”