Marki 3:1-35
-
Bian kun mɔ i sa ti wuwa’n yoli juejue (1-6)
-
Sran kpanngban kpa be yiali nzue’n i nuan lɛ (7-12)
-
Akoto 12 mun (13-19)
-
Ɲanmiɛn wawɛ’n i wun ndɛ tɛ kanlɛ (20-30)
-
Zezi i nin’n nin i niaan mun (31-35)
3 Ɔ wluli Ɲanmiɛn sulɛ sua kun nun ekun. Kɛ ɔ́ yó sɔ’n, nn bian kun mɔ i sa kun ti wuwa’n, ɔ o lɛ.
2 Be fali be ɲin be sieli i su kpa, sɛ ɔ́ yó bian sɔ’n i juejue Wunmiɛn-lolɛ-cɛn’n nun-o. I liɛ’n, bé jrán su bé sɛ́nmɛn i.
3 Ɔ seli bian mɔ i sa ti wuwa’n kɛ: “Jaso, bla afiɛn wa.”
4 I sin’n, ɔ usali be kɛ: “?Wunmiɛn-lolɛ-cɛn’n nun’n, sran kun le atin yo sran ye annzɛ kusu ɔ le atin yo sran tɛ? ?Asa kusu’n, sran kun le atin de sran annzɛ kusu ɔ le atin kun sran?” Sanngɛ b’a tɛmɛn i su.
5 Ɔ niannin be ya su. Be awlɛn mɔ w’a kete’n ti’n, i wla boli i wun dan. Yɛ ɔ seli bian’n kɛ: “Tinngɛ ɔ sa’n nun.” Yɛ ɔ tinngɛli nun-ɔn. Kpɛkun i sa’n sɛli i sin yoli kpa.
6 Kɛ ɔ yoli sɔ’n, Farizifuɛ’m be fiteli. Ndɛndɛ kpa’n, be nin be nga be o Erɔdu sin’n be ko yiali. Be cicili i wun ndɛ kɛ bé kún i.
7 Sanngɛ Zezi nin i sɔnnzɔnfuɛ’m be jasoli lɛ, be ɔli nzue’n i nuan lɔ. Kpɛkun sran kpanngban kpa mɔ be fin Galile mɛn’n nin Zide mɛn’n nun lɔ’n, be suli i su.
8 I kpa bɔbɔ’n, sran kpanngban be fin Zerizalɛmun nin Idime nin Zurdɛn’n i sin lɔ, ɔ nin Tir nin Sidɔn be asa’m be su, be bɛli i wun lɛ. Afin be tili i kɛ ɔ yo ninnge kpanngban.
9 Kɛ ɔ ko yo naan sran nga be o lɛ’n, b’a miɛnmɛn i’n ti’n, ɔ seli i sɔnnzɔnfuɛ’m be kɛ be sie alie kaan kun lɛ be mɛn i.
10 Ɔ yoli sran kpanngban be juejue. I sɔ’n ti’n, sran kwlaa nga be tukpacɛ’n ti kekle kpa’n, be yiɛli i su woo. Be waan bé kɛ́n i.
11 Kɛ mmusu’m be bɔbɔ be wun i cɛ’n, be fin ase i ɲrun lɛ. Kpɛkun be kpan kekle kpa, be se kɛ: “Wɔ yɛ a ti Ɲanmiɛn i Wa’n niɔn.”
12 Sanngɛ ɔ wlali be su nun flannin nun kpa kɛ nán maan be kan naan sran’m be si sɔ.
13 Ɔ fuli oka kun su. Kpɛkun ɔ flɛli be ng’ɔ klo kɛ be bla’n, naan b’a wɔ i wun lɔ.
14 Ɔ kpali sran blu-nin-nɲɔn (12). Yɛ ɔ flɛli be akoto. Be yɛ be nin i bé kɔ́ likalika’m be nun-ɔn, yɛ ɔ́ súnman be kɛ be ko bo jasin fɛ’n.
15 Kpɛkun ɔ́ mán be kwlalɛ, naan be fuan mmusu mun.
16 Sran blu-nin-nɲɔn (12) ng’ɔ fali be’n, be dunman mun yɛ: Simɔn m’ɔ tɔnnin i dunman ekun kɛ Piɛli’n,
17 yɛ Zebede i mma mun, Zaki nin i niaan bian Zan. (Ɔ tɔnnin be dunman ekun kɛ Boanɛɛzɛsi. I bo’n yɛle kɛ “angblannan’n i mma mun.”)
18 Yɛ Andre, nin Filipu, nin Batelemin, nin Matie, nin Toma, nin Zaki m’ɔ ti Alfe wa’n, nin Tade, nin Simɔn m’ɔ ti wakawakafuɛ’n,*
19 yɛ Zida Iskariɔti mɔ i sin’n, ɔ yili Zezi mannin sran mun’n.
I sin’n, ɔ ɔli sua kun nun.
20 Sran kpanngban be yiali lɛ ekun. Ɔ maan be kwlá diman like bɔbɔ.
21 Kɛ i osufuɛ’m be tili i sɔ’n, be ɔli i tralɛ. Afin be waan: “I ti w’a saci.”
22 Asa kusu’n, mmla klɛfuɛ* mɔ be fin Zerizalɛmun’n, be seli kɛ: “Bɛlzebubu* wo i su. Mmusu’m be su kpɛn’n i fanngan nun yɛ ɔ fuan mmusu mun-ɔn.”
23 Ɔ maan ɔ flɛli be i wun lɛ, naan w’a kan ndɛ ɲanndra nun w’a kle be. Ɔ seli be kɛ: “?Satan fuan Satan sɛ yɛ ɔ yo ye-ɔ?
24 Sɛ famiɛn diwlɛ kun i nunfuɛ’m be nuan sɛman’n, famiɛn diwlɛ sɔ’n su kaman lɛ.
25 Yɛ sɛ awlo kun nunfuɛ’m be bubu be wun nun’n, awlo sɔ’n bo.
26 I kunngba’n, sɛ Satan jaso i bɔbɔ i wun naan ɔ bu i wun nun’n, ɔ kwlá kaman lɛ, i liɛ’n wíe.
27 Nanwlɛ, sran fi kwlá wluman sran m’ɔ le wunmiɛn kpa’n i sua’n nun ko wuɛmɛn i bo ninnge mun. Saan ɔ́ cí i ka naan w’a kwla fɛn i sua’n nun ninnge mun.
28 Nanwlɛ, ń kán klé amun kɛ sa kwlaa nga sran’m be yo’n, bé yáci cɛ́ be. Maan ɔ yo sa tɛtɛ nga be yo’n, annzɛ ndɛ tɛtɛ nga be kan’n, bé yáci i kwlaa cɛ́ be.
29 Sanngɛ sran ng’ɔ kan Ɲanmiɛn wawɛ’n i wun ndɛ tɛ’n, be su yaci cɛmɛn i le. I sa tɛ’n, ɔ́ kɛ́ i su titi.”
30 Like nga ti yɛ ɔ kannin ndɛ sɔ’n yɛle kɛ be seli kɛ: “Mmusu kun o i su.”
31 I nin nin i niaan bian’m be bali. Be jrannin gua su lɔ, kpɛkun be sunmannin sran kun kɛ ɔ ko flɛ i.
32 Kɛ ɔ́ yó sɔ’n, nn sran kpanngban be titi i wun lɛ, b’a sin b’a yiɛ i. Kpɛkun be seli i kɛ: “Nian! Ɔ nin nin ɔ niaan’m be o gua su lɔ, be flɛ-ɔ.”
33 Sanngɛ ɔ tɛli be su kɛ: “?Wan yɛ ɔ ti min nin’n niɔn? ?Yɛ wan mun yɛ be ti min niaan mun-ɔn?”
34 Ɔ niannin be nga be titi i wun lɛ mɔ b’a sin b’a yiɛ i’n. Kpɛkun ɔ seli kɛ: “Amun nian, min nin nin min niaan mun yɛ be o yɛ!
35 Sran ng’ɔ yo Ɲanmiɛn i klun sa’n, i yɛ ɔ ti min niaan bian, nin min niaan bla, ɔ nin min nin-ɔn.”
