Marki 2:1-28
2 Sanngɛ kɛ ɔ dili le nɲɔn kun’n, ɔ ɔli Kapɛɛnaɔmun lɔ ekun. Kɛ ɔ yoli sɔ’n, sran kpanngban kpa be tili i kɛ ɔ o awlo lɔ.
2 Ɔ maan sran kpanngban kpa be wa yiali lɛ. I sɔ’n ti’n, awlo wunmuan’n yili. Anuan’n i ɲrun lɛ lika’n bɔbɔ yili. Kpɛkun ɔ kannin Ɲanmiɛn ndɛ’n kleli be.
3 Be fali bubuwafuɛ kun be blɛli i. Sran nnan yɛ be suɛli i be bali-ɔ.
4 Sanngɛ sran’m be ti’n, b’a kwlá fɛmɛn i b’a ɔman Zezi wun lɔ trele. Ɔ maan be fɛ i fuli sua’n i ti su lɔ. Be kpɛli toklo kun lika nga Zezi o lɛ’n sɛsɛsɛ, kpɛkun be fali bɛ nga bubuwafuɛ’n la su’n, be sinnin nun naan b’a jrɛ i lɔ.
5 Kɛ Zezi wunnin kɛ be lafi Ɲanmiɛn su’n, ɔ seli bubuwafuɛ’n kɛ: “Min wa, ɔ sa tɛ’m b’a wie.”
6 Kɛ ɔ́ yó sɔ’n, nn mmla klɛfuɛ* wie’m be titi lɛ. Be se be klun lɔ kɛ:
7 “?Ɔ yo sɛ ti yɛ bian nga kwla kan ndɛ sɔ-ɔ? Ɔ su saci Ɲanmiɛn wun. ?Sɛ nán Ɲanmiɛn kunngba cɛ’n, wan yɛ ɔ kwla yo naan sran kun i sa tɛ’m b’a wie-ɔ?”
8 I sin’n, be kannin ndɛ sɔ’n be afiɛn lɔ. Zezi ka lɛ wunnin i sɔ liɛ’n i wlɛ. Ɔ maan ɔ usali be kɛ: “?Ngue ti yɛ amun kwla bu akunndan kɛ ngalɛ’n sa-ɔ?
9 ?Kɛ be se bubuwafuɛ’n kɛ ‘Ɔ sa tɛ’m b’a wie’n,’ ɔ nin kɛ be se kɛ ‘Jaso naan fa ɔ bɛ’n naan nanti’n,’ onin yɛ i kanlɛ’n ti pɔpɔ-ɔ?
10 Sanngɛ kɛ ɔ ko yo naan amun a si kɛ Sran wa’n le atin yaci sran’m be sa tɛ mun cɛ be asiɛ’n su wa’n...” ɔ seli bubuwafuɛ’n kɛ:
11 “Ń kán klé wɔ, jaso, fa ɔ bɛ’n naan kɔ wɔ awlo.”
12 Yɛ ɔ jasoli-ɔ. Be ja nun lɛ’n, ɔ fɛli i bɛ’n, kpɛkun ɔ nanti fiteli gua su lɔ sran’m be kwlaa be ɲrun lɛ. Sa sɔ’n boli be kwlaa be nuan. Ɔ maan be manmannin Ɲanmiɛn be seli kɛ: “E nin-a wunman sa kɛ nga sa le.”
13 Ɔ fite ɔli jenvie’n i nuan lɔ ekun. Sran’m be kwlaa be bɛli i sin. Kpɛkun ɔ kleli be like.
14 Kɛ ɔ́ sín lapo suwlɛ lɛ’n, ɔ wunnin Alfe i wa Levi, ɔ ti lɛ. Kpɛkun ɔ seli i kɛ: “Bla! Su n su.” Yɛ ɔ jaso suli i su-ɔ.
15 I sin’n, Zezi ɔli Levi i awlo lɔ. Ɔ nin i sɔnnzɔnfuɛ mun nin lapo defuɛ mun nin sa tɛ yofuɛ kpanngban be su di like.* Afin be nun sunman be boli i su sulɛ bo.
16 Sanngɛ kɛ Farizifuɛ’m be mmla klɛfuɛ’m* be wunnin kɛ ɔ nin sa tɛ yofuɛ nin lapo defuɛ mun yɛ be di like’n, be usɛli i sɔnnzɔnfuɛ’m be kɛ: “?Ɔ nin lapo defuɛ nin sa tɛ yofuɛ mun yɛ be di like-ɔ?”
17 Kɛ Zezi tili ndɛ sɔ’n, ɔ seli be kɛ: “Be nga be ti juejue’n, be mianman ayre yofuɛ wun, sanngɛ be nga be kpinndinman’n, be yɛ be miɛn i wun-ɔn. M’an baman sɛsɛfuɛ’m be flɛlɛ. Sanngɛ sa tɛ yofuɛ mun yɛ n bali be flɛlɛ-ɔ.”
18 Zan i sɔnnzɔnfuɛ nin Farizifuɛ’m be kpɛ srɛ nun titi. I sɔ’n ti’n, be bali be wa seli i kɛ: “Zan i sɔnnzɔnfuɛ mun nin Farizifuɛ’m be sɔnnzɔnfuɛ’m be kpɛ srɛ nun. ?Ɔ yo sɛ ti yɛ ɔ sɔnnzɔnfuɛ’m be kpɛman srɛ nun wie-ɔ?”
19 Yɛ Zezi seli be kɛ: “Sɛ yasua ng’ɔ su ja bla’n, ɔ nin i janvuɛ’m be te o likawlɛ’n, i janvuɛ’m be kpɛman srɛ nun. Kɛ mɔ yasua’n nin-a ɔman’n, ɔ fataman kɛ i janvuɛ’m be kpɛ srɛ nun.
20 Sanngɛ cɛn kun wá jú’n, bé wá dé yasua’n i janvuɛ’m be sa nun. Cɛn sɔ’n nun yɛ bé kpɛ́ srɛ nun-ɔn.
21 Sran fi faman tannin sin uflɛuflɛ taman tralɛ nvuɛn nun. Afin sɛ ɔ yo sɔ’n, tannin sin uflɛuflɛ’n ɔ́ cúɛncúɛn tralɛ nvuɛn’n. Kpɛkun tralɛ sɔ’n, ɔ́ títí trá laa’n.
22 Kusu’n, be faman duvɛn mɔ b’a yi i uflɛuflɛ’n, be guaman kplo kotokun nvuɛn nun. Sɛ be yo sɔ’n, duvɛn’n kpúke kplo kotokun’n, yɛ duvɛn’n gúa, kpɛkun kplo kotokun’n w’a saci. Sanngɛ kplo kotokun m’ɔ ti uflɛuflɛ’n, i nun yɛ be fa duvɛn mɔ b’a yi i uflɛuflɛ’n be gua-ɔ.”
23 Wunmiɛn-lolɛ-cɛn’n nun’n, kɛ ɔ́ sín ble fie’m be nun’n, i sɔnnzɔnfuɛ’m be fianfiannin ble mma’n wie.
24 Ɔ maan Farizifuɛ’m be seli i kɛ: “Nian! ?Ngue ti yɛ be yo like ng’ɔ fataman kɛ be yo i Wunmiɛn-lolɛ-cɛn’n nun’n niɔn?”
25 Sanngɛ ɔ seli be kɛ: “?Kɛ Davidi i sa miannin mɔ awe kunnin i nin i sran mun’n, like ng’ɔ yoli’n, amun nin-a kɛnngɛnmɛn i su ndɛ le?
26 Abiataa m’ɔ ti Ɲanmiɛn ɲrun jranfuɛ’m be su kpɛn’n i su ndɛ’n nun’n, be seli kɛ Davidi wluli Ɲanmiɛn i sua’n nun lɔ. Ɔ dili kpanwun nga be siesie be Ɲanmiɛn ɲrun’n, kpɛkun ɔ fali wie mɛnnin i sran mun. Kusu nn, sran fi leman atin diman, saan Ɲanmiɛn ɲrun jranfuɛ’m be ngunmin.”
27 I sin’n, ɔ seli be kɛ: “Klɔ sran’m be ye yolɛ ti yɛ Ɲanmiɛn kpɛli Wunmiɛn-lolɛ-cɛn’n i ba-ɔ. Nán Wunmiɛn-lolɛ-cɛn’n i su dilɛ ti yɛ ɔ yili klɔ sran-ɔn.
28 Ɔ maan Sran wa’n bɔbɔ’n, ɔ ti Wunmiɛn-lolɛ-cɛn’n i Min.”
Ja ngua lɔ ndɛ mun
^ Nian Ndɛ’m be bo tulɛ lika’n nun lɔ.
^ Be kwla se ekun kɛ “be lala tabli sin be su di like.”
^ Nian Ndɛ’m be bo tulɛ lika’n nun lɔ.
