Liki 2:1-52
-
Zezi i awuliɛ’n (1-7)
-
Anzi’m be yili be wun nglo kleli bua tafuɛ mun (8-20)
-
Klɛn wlalɛ nin sanwun yolɛ (21-24)
-
Simeɔn wunnin Klisi’n (25-35)
-
Anin kannin bakan’n i ndɛ (36-38)
-
Be sali be sin Nazarɛti (39, 40)
-
Zezi le afuɛ 12, ɔ o Ɲanmiɛn i sua’n nun (41-52)
2 Blɛ sɔ’n nun’n, Sezaa Ogisi seli kɛ be klɛ asiɛ’n sufuɛ’m be kwlaa be dunman.
2 (Kpɛ klikli nga bé klɛ́ sran’m be dunman sɔ’n, nn Kiriniisi yɛ ɔ sie Siri mɛn’n niɔn.)
3 Ɔ maan sran’m be kwlaa be ɔli be dunman klɛlɛ. Sran kun ɔli i bɔbɔ i klɔ.
4 I sɔ’n ti’n, Zozɛfu fin Galile mɛn’n i klɔ nga be flɛ i Nazarɛti’n su, ɔ ɔli Davidi i klɔ m’ɔ o Zide mɛn’n nun lɔ’n su. Be flɛ klɔ sɔ’n kɛ Bɛtleɛmun. Afin ɔ ti Davidi i awlofuɛ nin i osufuɛ wie.
5 Ɔ nin Mari mɔ be fa mɛnnin i kɛ ɔ jɛ i’n, yɛ be ɔli be dunman klɛlɛ-ɔ. Blɛ sɔ’n nun’n, nn Mari su wa wu ba.
6 Kɛ be o lɔ’n, yɛ i ba wulɛ juli-ɔ.
7 Ɔ maan ɔ wuli i wa klikli’n. Ɔ ti ba yasua. Ɔ fali tannin cicili i wun, kpɛkun ɔ lɛli i nnɛn’m be like diwlɛ kun nun. Afin b’a ɲanman lawlɛ sran’m be sikewlɛ lɔ.
8 Mɛn kunngba sɔ’n nun lɔ’n, bua tafuɛ wie’m be la gua su kɔnguɛ be nian be nnɛn’m be su.
9 Cɛn kun bé nían-ɔn, Zoova i anzi’n yɛ ɔ jin be ɲrun yɛ. Kpɛkun Zoova i ɲrun ɲanɲan’n kpajali be su. Ɔ maan srɛ kunnin be dan kpa.
10 Sanngɛ anzi’n seli be kɛ: “Nán srɛ kun amun. Afin ndɛ fɛ o min nuan. Ndɛ fɛ sɔ’n ti’n, sran’m be kwlaa bé dí aklunjuɛ dan.
11 Yɛle kɛ andɛ nga’n, b’a wu defuɛ kun Davidi i klɔ lɔ b’a man amun. Ɔ ti Klisi, ɔ ti e Min.
12 Like nga amún fá wún i wlɛ’n yɛ: Amún wá wún ba nɔnman kun. B’a fa tannin b’a blɛblɛ i wun, ɔ la nnɛn’m be like diwlɛ kun nun.”
13 Kpɛkun bé nían-ɔn, anzi akpingbin kpanngban* be o anzi’n i wun lɛ. Be manman Ɲanmiɛn be se kɛ:
14 “Maan manmanlɛ’n yo Ɲanmiɛn m’ɔ o nglo mmuammua lɔ’n i liɛ. Yɛ asiɛ’n su wa’n, be nga Ɲanmiɛn klun jɔ be wun’n, maan be wun jɔ be.”
15 Kɛ anzi’m be yacili be lɛ ɔli ɲanmiɛn su’n, bua tafuɛ’m be seli be wiengu kɛ: “Ɔ fata kɛ e wɔ Bɛtleɛmun icra’n, naan e ko nian sa ng’ɔ juli lɔ mɔ Zoova kan kleli e’n.”
16 Ɔ maan be ɔli ndɛndɛ. Kɛ be juli lɔ’n, be toli Mari nin Zozɛfu, kpɛkun be wunnin ba nɔnman’n. Ɔ la nnɛn’m be like diwlɛ’n nun lɛ.
17 Kɛ be wunnin i sɔ’n, be boli bakan’n i su ndɛ nga be kan kleli be’n su.
18 Be kwlaa nga be tili ndɛ nga bua tafuɛ’m be kannin’n, ɔ boli be nuan.
19 Mari liɛ’n, ɔ fali ndɛ sɔ mun sieli i klun kpa, kpɛkun ɔ buli be su akunndan.
20 Bua tafuɛ’m be sali be sin. Kɛ bé kɔ́’n, nn bé yí Ɲanmiɛn i ayɛ bé mɛ́nmɛ́n i. Afin ndɛ nga be tili’n, ɔ nin like nga be wunnin i’n, be yoli kun.
21 Kɛ ɔ dili cɛn ba mɔcuɛ’n, ba’n i klɛn wlalɛ blɛ’n juli. Ɔ maan be tɔnnin i dunman Zezi. Ka naan i nin w’a wunnzɛ’n, dunman sɔ’n yɛ anzi’n bo kleli be-ɔ.
22 Asa ekun’n, be sanwun yolɛ cɛn nga Moizi i Mmla’n kle’n, ɔ juli. Ɔ maan be fɛli i ɔli Zerizalɛmun kɛ bé fɛ́ i kó klé Zoova.
23 I sɔ yɛ be klɛli i Zoova i Mmla’n nun-ɔn. Be klɛli i kɛ: “Ba klikli kwlaa ng’ɔ ti yasua’n, ɔ fata kɛ ɔ yo Zoova i liɛ.”
24 Kpɛkun kɛ nga be kɛnnin i Zoova i Mmla’n nun’n sa’n, be yili tɛ. Like nga Mmla’n waan be man’n yɛ: “Auble nɲɔn, annzɛ okunmomo ba nɲɔn.”
25 Bian kun o Zerizalɛmun lɛ, be flɛ i Simeɔn. Ɔ ti sran kpa, kpɛkun ɔ su Ɲanmiɛn kpa. Ɔ su minndɛ blɛ mɔ bé wá fɔ́nvɔ Izraɛli’n, kpɛkun Ɲanmiɛn i wawɛ’n wo i su.
26 Asa ekun’n, Ɲanmiɛn maan i wawɛ’n seli i kɛ ɔ́ dún mmua wún Zoova i Klisi’n ka naan w’a wu.
27 Ɲanmiɛn wawɛ’n maan ɔ bali Ɲanmiɛn i sua’n nun lɛ. Zezi i si nin i nin be bali lɛ wie. Be bali like nga Mmla’n waan be yo’n, i yolɛ.
28 Ɔ fali bakan’n i sa su. Kpɛkun ɔ manmannin Ɲanmiɛn seli kɛ:
29 “Ɲanmiɛn, wɔ mɔ a o like kwlaa ti su’n, man ɔ sufuɛ’n i atin siɛn’n, maan ɔ wɔ i kɔwlɛ fɔun, kɛ nga a fa kannin’n sa.
30 Afin min ɲinma w’a wun ɔ sran ng’ɔ́ dé sran mun’n.
31 Wɔ yɛ a mannin sran sɔ’n niɔn, naan sran’m be kwlaa be wun i.
32 Ɔ ti kɛ kannin sa. I kpajalɛ’n wá yí like ng’ɔ kata be nga be timan Zuifu’n be ɲrun’n. Kpɛkun ɔ́ káci aɲrunɲan like Izraɛli m’ɔ ti ɔ nvle’n i ɲrun.”
33 Ba’n i su ndɛ nga be kannin’n, ɔ boli i si nin i nin be nuan.
34 Asa ekun’n, Simeɔn yrɛli i nuan mannin be. Kpɛkun ɔ seli ba’n i nin Mari kɛ: “Nian! Ɲanmiɛn sunmannin ba nga. I dunman nun ti’n, sran wie’m bé tɔ́, yɛ wie’m bé jáso. Ɲanmiɛn wá yí ninnge kpanngban nglo klé sran mun kɛ ɔ nin i be o nun. Ɔ nin i sɔ ngba’n, sran kpanngban bé kɛ́n i wun ndɛ tɛ,
35 kɛ ɔ ko yo naan akunndan nga sran kpanngban bu’n, w’a fite nglo’n ti. Ɔ liɛ’n, bé wá fá tokofi tɛnndɛn kun wɔ́ ɔ.”
36 Blɛ sɔ’n nun’n, nn Ɲanmiɛn nuan ijɔfuɛ bla kun o lɛ, be flɛ i Anin. Faniɛli m’ɔ ti Azɛɛ i akpasua’n nunfuɛ’n i wa-ɔ. Bla sɔ’n w’a yo kpɛnngbɛn kpa. Kɛ ɔ nin i wun’n be jali’n,* be dili afuɛ nso cɛ.
37 Siɛn’n, ɔ ti angbeti, yɛ ɔ le afuɛ ablaɔcuɛ-nin-nnan (84). Ɔ tuman Ɲanmiɛn i sua’n nun. Ɔ su Ɲanmiɛn lɔ kɔnguɛ nin wia nun. Ɔ kpɛ srɛ nun, kpɛkun ɔ tu i klun srɛ Ɲanmiɛn kpa.
38 Dɔ sɔ’n su’n, ɔ wunngeli be wun lɛ, naan w’a la Ɲanmiɛn i ase. Kpɛkun ɔ kannin bakan’n i su ndɛ kleli be kwlaa nga be su minndɛ kɛ be de Zerizalɛmun’n.
39 Kɛ be yoli ninnge kwlaa nga Zoova i Mmla’n se kɛ be yo’n, be sali be sin be klɔ Nazarɛti m’ɔ o Galile mɛn’n nun’n, i su lɔ.
40 Kɛ ɔ́ yó sɔ’n, nn ba yasua kan’n, ɔ́ ɲín kɔ́, nn ɔ́ ɲán wunmiɛn kpa, nn ɔ́ sí ngwlɛlɛ. Kpɛkun Ɲanmiɛn kusu i klun jɔ i wun titi.
41 Afuɛ nuan kwlaa’n, i si nin i nin be kɔ Delɛ cɛn’n i dilɛ Zerizalɛmun lɔ.
42 Ɔ maan kɛ nga be fa yo i titi’n sa’n, kɛ ɔ ɲannin afuɛ blu-nin-nɲɔn’n (12), be ɔli cɛn sɔ’n i dilɛ.
43 Kɛ be wieli cɛn’n i di’n, mɔ bé sá be sin’n, Zezi kali Zerizalɛmun lɔ. I si nin i nin be siman sɔ.
44 Be buli i kɛ ɔ o be nga be nin be kɔ’n be nun. Ɔ maan be nantili cɛn ba kun. Kɛ mɔ be wunmɛn i’n, be kunndɛli i be osufuɛ mun nin be nga be si be’n, be afiɛn.
45 Sanngɛ b’a wunmɛn i. I sɔ’n ti’n, be sali be sin Zerizalɛmun lɔ. Be ko kunndɛli i kpa.
46 I cɛn ba nsan su’n, be ko toli i Ɲanmiɛn i sua’n nun lɔ. Ɔ ti ase like klefuɛ’m be afiɛn, ɔ su tie be ndɛ’n. Kɛ ɔ́ yó sɔ’n, nn ɔ́ úsa be kosan.
47 I sɔ’n boli be kwlaa nga be tili i ndɛ’n be nuan. Afin ɔ wun sa wlɛ, kpɛkun kɛ be usɛ i sa’n, ɔ si su tɛ.
48 Kɛ i si nin i nin be wunnin i’n, ɔ boli be nuan. Yɛ i nin seli i kɛ: “?Min wa, ngue ti yɛ a yo e sɔ-ɔ? E nin ɔ si e su kunndɛ wɔ kpa.”
49 Sanngɛ ɔ seli be kɛ: “?Ɔ yo sɛ ti yɛ amun kunndɛ min-ɔn? ?Amun siman kɛ min Si i sua’n nun yɛ ɔ fata kɛ n tran-ɔn?”
50 Sanngɛ b’a wunmɛn i ndɛ sɔ’n i wlɛ.
51 I sin’n, ɔ nin be ɔli kpɛkun be sali be sin Nazarɛti. I ɲin yili be titi. Asa kusu’n, i nin fali sa sɔ mun sieli i klun kpa.
52 Kɛ Zezi ɲín kɔ́’n, nn i ngwlɛlɛ úka su kɔ́. Ɲanmiɛn klun jɔ i wun, kpɛkun i wun yo sran’m be fɛ.
