Sa Nglo Yilɛ 7:1-17

  • Anzi nnan b’a tra aunmuan nga be saci like’n be nun (1-3)

  • Sran 144.000 nga be sieli be nzɔliɛ’n (4-8)

  • Sran kpanngban kpa mɔ tralɛ ufue tɛnndɛn o be wun sɛsɛsɛ’n (9-17)

7  I sin’n, n wunnin anzi nnan, be jinjin asiɛ’n i cɔnjɔ nnan’m be su. B’a tra asiɛ’n su aunmuan nnan’m be nun naan aunmuan fi w’a fitaman asiɛ’n annzɛ jenvie’n annzɛ waka fi su.  N wunnin anzi kun ekun. Ɔ fin wia afiliɛ lɔ yɛ ɔ ba-ɔ. Ɲanmiɛn m’ɔ lafiman’n i like mɔ be fa sie sran’m be nzɔliɛ’n wo i sa nun. Ɔ kpannin kekle kpa kannin ndɛ kleli anzi nnan mɔ be mannin be atin kɛ be saci asiɛ’n nin jenvie’n.  Ɔ seli be kɛ: “Nán an saci asiɛ’n annzɛ jenvie’n annzɛ waka mun. Maan e wie Ɲanmiɛn i sran’m be ngban su nzɔliɛ sie ka.”  N tili be nga be sieli be nzɔliɛ sɔ’n, be nuan nga be boli’n. Be ti sran akpiakpi ya akpiakpi ablanan-nin-nnan (144.000). Be fin Izraɛli nvle’n i akpasua kwlaa su:  Zida akpasua’n nun’n, be sieli sran akpiakpi blu-nin-nɲɔn (12.000) be nzɔliɛ.Ribɛnin akpasua’n nun’n, sran akpiakpi blu-nin-nɲɔn (12.000).Gadi akpasua’n nun’n, sran akpiakpi blu-nin-nɲɔn (12.000).  Azɛɛ akpasua’n nun’n, sran akpiakpi blu-nin-nɲɔn (12.000).Naftali akpasua’n nun’n, sran akpiakpi blu-nin-nɲɔn (12.000).Manase akpasua’n nun’n, sran akpiakpi blu-nin-nɲɔn (12.000).  Simeɔn akpasua’n nun’n, sran akpiakpi blu-nin-nɲɔn (12.000).Levi akpasua’n nun’n, sran akpiakpi blu-nin-nɲɔn (12.000).Isakaa akpasua’n nun’n, sran akpiakpi blu-nin-nɲɔn (12.000).  Zabulɔn akpasua’n nun’n, sran akpiakpi blu-nin-nɲɔn (12.000).Zozɛfu akpasua’n nun’n, sran akpiakpi blu-nin-nɲɔn (12.000).Bɛnzamɛn akpasua’n nun’n, sran akpiakpi blu-nin-nɲɔn (12.000).  I sin’n, kɛ n niannin lɔ ekun’n, n wunnin sran kpanngban kpa. Sran fi kwlá kaman be. Be fin nvlenvle’n kwlaa nun nin akpasua kwlaa su. Sran wafawafa kwlaa o be nun, yɛ be kan aniɛn wafawafa kwlaa. Be jinjin famiɛn bia’n nin Bua ba’n be ɲrun lɛ. Tralɛ ufue tɛnndɛn o be wun sɛsɛsɛ, yɛ mme nɲa o be sa nun. 10  Be kpan kekle kpa se kɛ: “E Ɲanmiɛn m’ɔ ti famiɛn bia’n su’n nin Bua ba’n be ti yɛ y’a ɲan e ti-ɔ.” 11  Anzi’m be kwlaa be bo sin yiali famiɛn bia’n nin kpɛnngbɛn mun nin anzi nnan mun. Be utuli be ɲin ase famiɛn bia’n i ɲrun lɛ, kpɛkun be suli Ɲanmiɛn. 12  Be seli kɛ: “Maan ɔ yo sɔ! Maan manmanlɛ’n nin aɲrunɲan’n, ɔ nin ngwlɛlɛ’n nin asenna’n, ɔ nin ayɛ yilɛ’n nin kwlalɛ’n, ɔ nin fanngan’n be yo e Ɲanmiɛn’n i liɛ tititi. Maan ɔ yo sɔ.” 13  Kpɛnngbɛn’m be nun kun usali min kɛ: “?Wan mun yɛle be nga tralɛ ufue o be wun’n? ?Yɛ nin yɛ be fin-ɔn?” 14  N ka lɛ n seli i kɛ: “Nannan, wɔ yɛ a si nun-ɔn.” Yɛ ɔ seli min kɛ: “Sran sɔ’m be fin ɲrɛnnɛn dan’n nun. Be kpuli be tralɛ’n Bua ba’n i mmoja’n nun, kpɛkun be yoli ufue. 15  I sɔ’n ti yɛ be o Ɲanmiɛn i famiɛn bia’n i ɲrun lɛ mɔ be su i kɔnguɛ nin wia nun i sua’n nun’n niɔn. Sran ng’ɔ ti famiɛn bia’n su’n, ɔ́ fɛ́ i tannin sua’n káta be su. 16  Awe su kunman be kun. Nzuewe su kunman be kun. Wia’n i bolɛ’n su yoman be like fi. Aunyɛyɛ dan’n su kleman be yalɛ. 17  Afin Bua ba’n m’ɔ o famiɛn bia’n i wun lɛ’n ɔ́ kánkán be, yɛ ɔ́ fá be kɔ́ nzue ti mɔ be man nguan’n be nuan. Kpɛkun Ɲanmiɛn núnnún be ɲinmuɛn’n kwlaa.”

Ja ngua lɛ nzɔliɛ mun