Sa Nglo Yilɛ 5:1-14

  • Fluwa ɲɔnɲɔnwa mɔ be fali ninnge nso be fa trɛli i nuan’n i ase’n (1-5)

  • Bua ba’n w’a fa fluwa’n (6-8)

  • Bua ba’n yɛ ɔ le atin tutu ninnge nga be fa trali fluwa’n i nuan’n i ase’n niɔn (9-14)

5  I sin’n, n wunnin fluwa kun Sran ng’ɔ ti famiɛn bia’n su’n i sa fama’n nun. Be ɲɔnɲɔnnin fluwa sɔ’n. Yɛ be klɛli i bue nɲɔn’m* be su, kpɛkun be fali like nso be fa trɛli i nuan’n i ase.  Yɛ n wunnin anzi kun. Ɔ le wunmiɛn kpa. Ɔ kpan se kɛ: “?Wan yɛ ɔ le atin tike fluwa’n su-ɔ? ?Wan yɛ ɔ le atin tutu ninnge nga be fa be trɛli i nuan’n i ase’n niɔn?”  Sanngɛ i be nga be o ɲanmiɛn su lɔ’n nin-o, i be nga be o asiɛ’n su wa’n nin-o, i be nga be o asiɛ’n i bo lɔ’n nin-o, be nun wie fi w’a kwlá tikeman fluwa’n su naan se kɛ ɔ́ nían nun.  Ɔ maan n sunnin kpa, afin b’a ɲanman sran fi m’ɔ kwla tike fluwa’n su, mɔ kusu ɔ kwla nian nun-ɔn.  Sanngɛ kpɛnngbɛn’m be nun kun seli min kɛ: “Yaci sunlɛ’n. Nian! Zida akpasua’n nun Asɔmɔli’n, m’ɔ fin Davidi osu’n nun’n, ɔ kwlali. Ɔ maan ɔ kwla tike fluwa’n su yɛ ɔ kwla tutu ninnge nso nga be fa trɛli i nuan’n i ase’n.”  I sin’n, n wunnin bua ba kun. Ɔ jin famiɛn bia’n nin anzi nnan mun nin kpɛnngbɛn’m be afiɛn lɛ. Ɔ ti kɛ b’a kun i sa. Ɔ le wɛ nso nin ɲinma nso. I ɲinma nso mun yɛle Ɲanmiɛn i wawɛ nso nga be sunmannin be asiɛ wunmuan’n su’n.  W’a sisimɛn i bo, ɔ ɔli ko fali fluwa m’ɔ o Sran ng’ɔ ti famiɛn bia’n su’n, i sa fama’n nun’n.  Kɛ Bua ba’n fali fluwa’n, anzi nnan mun nin kpɛnngbɛn ablaɔn-nin-nnan (24) mun be kotoli i bo. Jru nin sika ɔkwlɛ sɛ o be kwlaa be sa nun sɛsɛsɛ. Ansan w’a yi sɛ sɔ mun. (Ansan’n yɛle srɛlɛ mɔ Ɲanmiɛn i sran’m be srɛ i’n.)  Be to jue uflɛuflɛ kun se kɛ: “Wɔ yɛ a le atin fa fluwa’n niɔn. Yɛ wɔ yɛ a le atin tutu ninnge nga be fa be trɛli i nuan’n i ase’n niɔn. Afin be kunnin wɔ, yɛ a fali ɔ mmoja’n toli sran mannin Ɲanmiɛn. Sran sɔ’m be fin akpasuaakpasua kwlaa su, be kan aniɛn wafawafa kwlaa, be fin nvlenvle kwlaa nun, yɛ be fin mɛnmɛn kwlaa nun. 10  A yoli maan be kacili famiɛn nin e Ɲanmiɛn’n i ɲrun jranfuɛ. Bé dí famiɛn, yɛ bé síe asiɛ’n.” 11  I sin’n, n wunnin anzi kpanngban kpa mɔ b’a sin b’a yia famiɛn bia’n nin anzi mun’n nin kpɛnngbɛn mun, yɛ n tili be nɛn’n wie. Be sɔnnin kpa.* Be ti akpiakpi kpanngban kpa. 12  Be kpannin kekle kpa seli kɛ: “Bua ba mɔ be kunnin i’n, ɔ nin kwlalɛ nin aɲanbeun, nin ngwlɛlɛ nin fanngan, nin ayɛ yilɛ nin aɲrunɲan nin suyralɛ fata.” 13  I sin’n, n tili ndɛ nga ninnge nga be o ɲanmiɛn su lɔ’n nin ninnge nga be o asiɛ’n su wa’n, ɔ nin ninnge nga be o asiɛ’n i bo lɔ’n nin ninnge nga be o jenvie’n nun’n be kwlaa be kannin’n. Be seli kɛ: “Maan suyralɛ’n nin ayɛ yilɛ’n nin aɲrunɲan’n nin kwlalɛ’n be yo Sran ng’ɔ ti famiɛn bia’n su’n nin Bua ba’n be liɛ tititi.” 14  Anzi nnan’m be seli kɛ: “Maan ɔ yo sɔ!” Kpɛkun kpɛnngbɛn’m be kotoli, yɛ be suli Ɲanmiɛn.

Ja ngua lɛ nzɔliɛ mun

Glɛki nun’n, be se kɛ “i klun nin i sin’n.”
Be kwla se ekun kɛ “akpiakpi fa blu kpanngban kpa.”