Rɔmunfuɛ Mun 5:1-21

  • Klisi ti’n e nin Ɲanmiɛn e afiɛn w’a sɛ (1-11)

  • Adan ti yɛ e wu-ɔ, yɛ Klisi ti yɛ e ɲan nguan-ɔn (12-21)

    • Sran’m be kwlaa be yo sa tɛ, yɛ wie’n wo be kwlaa be su (12)

    • Sran kunngba i sa kpa ng’ɔ yoli’n (18)

5  I sɔ’n ti’n, kɛ mɔ b’a bu e sran kpa Ɲanmiɛn su mɔ e lafi’n ti’n, maan e nin Ɲanmiɛn e tran klanman* e Min Zezi Klisi dunman nun.  I dunman nun’n Ɲanmiɛn kwla yo e ye, i su mɔ e lafi’n ti. Kɛ é sé yɛ bɔbɔ’n, e su di ye sɔ’n. I sɔ’n ti’n, maan e klun jɔ,* afin e lafi su kɛ é ɲán aɲrunɲan ng’ɔ fin Ɲanmiɛn’n.  Sanngɛ nɛ́n i sɔ ngunmin ti yɛ maan e klun jɔ-ɔ. Sɛ e o ɲrɛnnɛn nun’n, maan e klun jɔ wie. Afin e si kɛ ɲrɛnnɛn sɔ’n maan e kwla jran kekle.  Yɛ kekle jranlɛ’n yo maan Ɲanmiɛn klun jɔ e wun. I sɔ’n kusu yo maan e wla o like kun su.  Yɛ e wla m’ɔ o like kun su’n ti’n, e sa sin bubuman e. Afin Ɲanmiɛn fɛli i wawɛ’n mannin e. I wawɛ’n sɔ’n maan e wun kɛ Ɲanmiɛn klo e.  I nun nga e ti sa tɛ yofuɛ’n,* Klisi wuli be nga be sroman Ɲanmiɛn’n be ti. Kɛ i yolɛ blɛ’n juli’n yɛ ɔ yoli-ɔ.  Nanwlɛ, ɔ ti kekle kɛ sran kun wu sɛsɛfuɛ kun ti. Sanngɛ atrɛkpa’n, sran wie kwla kplin su kɛ ɔ́ wú klun ufuefuɛ kun ti.  Sanngɛ Ɲanmiɛn kle e kɛ ɔ klo e, afin i nun mɔ e ti sa tɛ yofuɛ’n, e ti’n Klisi wuli.  Kɛ mɔ siɛn’n, i mmoja’n ti’n b’a bu e sran kpa’n, cɛn nga Ɲanmiɛn i ya’n jaso’n, é ɲán e ti. 10  Afin laa’n e nin Ɲanmiɛn e afiɛn sɛman. Sanngɛ i Wa’n i wie’n ti’n, siɛn’n e afiɛn w’a sɛ. Kɛ mɔ e nin i e afiɛn w’a sɛ’n ti’n, e lafi su kpa kɛ é ɲán e ti afin i ɲin o su. 11  Sanngɛ nɛ́n i sɔ ngunmin ti yɛ e klun ti jɔwa-ɔ. E klun jɔ afin e Min Zezi Klisi ti’n, e nin Ɲanmiɛn e o nun. I yɛ ɔ yoli ti yɛ siɛn’n e nin Ɲanmiɛn e afiɛn w’a sɛ-ɔ. 12  Sran kunngba ti yɛ sa tɛ yolɛ’n bali mɛn’n nun-ɔn. Yɛ sa tɛ’n kusu ti yɛ wie’n bali-ɔ. Yɛ wie’n tɔli sran’m be kwlaa be su, afin be kwlaa be yoli sa tɛ... 13  Afin sa tɛ yolɛ’n bali mɛn’n nun kwlaa naan Mmla’n w’a ba. Sanngɛ sɛ mmla’n nunman lɛ’n, be kwlá seman sran kun kɛ w’a yo sa tɛ. 14  Ɔ nin i sɔ ngba’n, wie’n kacili kɛ famiɛn sa. Kɛ ɔ fɛ i Adan blɛ su lele m’ɔ́ fá jú Moizi blɛ su’n, ɔ sieli sran’m be kwlaa. I kpa bɔbɔ’n, be nga be yoli sa tɛ mɔ be sa tɛ liɛ’n timan kɛ Adan liɛ’n sa’n, ɔ sieli be wie. Adan sɔ’n, ɔ ti kɛ sran ng’ɔ fata kɛ ɔ bla’n sa. 15  Sanngɛ like nga Ɲanmiɛn fa cɛ sran’n, ɔ nin sa tɛ’n be timan kun. Afin sɛ sran kunngba i sa tɛ’n ti’n, sran kpanngban be wuli’n, i wafa kunngba’n, Zezi Klisi kunngba i aklunye dan’n kusu ti’n, Ɲanmiɛn wá cɛ́ sran kpanngban be like, yɛ ɔ́ yó be ye dan.* 16  Like nga Ɲanmiɛn fa cɛli’n, ɔ nin sa nga sran ng’ɔ yoli sa tɛ’n ɔ yoli’n, be timan kun. Afin sran kun i sa tɛ ng’ɔ yoli’n ti’n, be dili i jɔlɛ be buli i fɔ. Sanngɛ like nga Ɲanmiɛn fa cɛli e’n ti’n, ɔ buli sran mɔ be yoli sa tɛ kpanngban’n, be sran kpa. 17  Afin sɛ sran kunngba i sa tɛ ng’ɔ yoli’n ti’n, wie’n sieli sran mun kɛ famiɛn sa’n, Ɲanmiɛn maan be nga be ɲɛn i aklunye dan’n i su mmlusuɛ’n, m’ɔ bu be sran kpa’n, bé ɲán nguan yɛ bé dí famiɛn sran kunngba dunman nun ti. Sran sɔ’n yɛle Zezi Klisi. 18  Ɔ maan sran kunngba i sa tɛ ng’ɔ yoli’n ti’n, be buli sran wafawafa kwlaa be fɔ. I kunngba’n, sran kunngba i sa kpa ng’ɔ yoli’n ti’n, be bu sran wafawafa kwlaa be sran kpa naan be ɲan nguan. 19  Sran kunngba i ɲin kekle’n ti’n, sran kpanngban be kacili sa tɛ yofuɛ. I kunngba’n, sran kunngba i aɲinyiɛ’n ti’n, bé bú sran kpanngban be sran kpa. 20  Ɔ maan kɛ ɔ ko yo naan sa tɛ’n i ɲin w’a fite’n, i ti yɛ Mmla’n kpɛnnin lɛ-ɔ. Sanngɛ sɛ sa tɛ yolɛ’n sɔn’n, Ɲanmiɛn i aklunye’n yó dan trá su. 21  ?Ngue ti yɛ ɔ ti sɔ-ɔ? Ɔ ti sɔ afin sa tɛ’n nin wie’n be sieli sran mun kɛ famiɛn sa. Ɔ maan i wafa kunngba’n, ɔ fata kɛ Ɲanmiɛn i aklunye dan’n ɔ sie sran mun kɛ famiɛn sa, naan be bu be sran kpa, naan e Min Zezi Klisi dunman nun’n, be ɲan nguan m’ɔ leman awieliɛ’n.

Ja ngua lɛ nzɔliɛ mun

Annzɛ “e di alaje.”
Annzɛ “e klun ti jɔwa.”
Glɛki nun’n, be se kɛ “e leman fanngan.”
Be kwla se ekun kɛ “ɔ́ bú gúa.”