2 Korɛntifuɛ Mun 7:1-16
7 I sɔ’n ti’n, min sran kpa mun, kɛ mɔ e si kɛ ninnge sɔ’m be o e ɲrun lɔ’n ti’n, maan e wla ninnge nga be saci sran i wunnɛn’n nin i akunndan’n be kwlaa be ase naan e yo sanwun kpa e tra laa’n e fa kle kɛ e ɲin yi Ɲanmiɛn kpa.
2 Maan amun klo e kpa.* Y’a yoman sran fi tɛ, y’a saciman sran fi ti nun, yɛ y’a diman sran fi ndrunmun.
3 Nán kɛ min waan ń bú amun fɔ ti yɛ n kan sɔ-ɔ. Afin n dun mmua seli kɛ sɛ é wú-o, sɛ é trán nguan nun-o, e nin amun-ɔn.
4 Kɛ ń kán ndɛ ń klé amun’n, n di amun nanwlɛ. Yɛ n fa amun di min nuan. Min wla w’a gua ase kpa. Sa kwlaa nga be tɔ e su’n be nun’n, n di aklunjuɛ.
5 Nanwlɛ, kɛ e juli Maseduanin lɔ’n, y’a wunman e wun fɛ* mlɔnmlɔn. Afin sa’m be tɔli e su bue kwlaa su: Gua su lɔ’n, sran’m be tanndannin e ɲrun, yɛ asɔnun’m be ti’n, e kokoli.
6 Sanngɛ Ɲanmiɛn m’ɔ fɔnvɔ be nga be wla w’a bo’n, ɔ yoli maan Titi i balɛ’n fɔnvɔli e.
7 Nán balɛ m’ɔ bali’n i ngunmin ti-ɔ, sanngɛ fɔnvɔlɛ nga amun fa fɔnvɔli i’n ɔ o nun wie. Afin ɔ seli e kɛ amun wla lo min kpa. Asa ekun’n, ɔ kannin amun awlabɔɛ’n nin min ndɛ m’ɔ lo amun’n i ndɛ. I sɔ’n ti’n, n dili aklunjuɛ dan ekun.
8 Sɛ fluwa nga n klɛ n ko mannin amun’n, ɔ boli amun wla’n, ɔ yoman min nsisɔ. Kannzɛ bɔbɔ i klikli’n nun’n ɔ yoli min nsisɔ’n (n wunnin kɛ min fluwa’n boli amun wla, sanngɛ w’a boman amun wla w’a cɛman),
9 sanngɛ siɛn’n, min klun ti jɔwa. Nán amun wla m’ɔ boli’n ti yɛ min klun ti jɔwa-ɔ, sanngɛ amun wla m’ɔ boli mɔ amun kacili amun akunndan’n, i ti yɛ min klun ti jɔwa-ɔ. Afin amun wla m’ɔ boli’n, ɔ ti Ɲanmiɛn i liɛ’n su. Ɔ maan like yaya w’a yoman amun naan w’a ka e su.
10 Afin kokolɛ ng’ɔ ti Ɲanmiɛn i liɛ’n su’n, ɔ yo maan be kaci be akunndan’n, kpɛkun be ɲan be ti, yɛ nsisɔ nunmɛn i sin. Sanngɛ mɛn nunfuɛ’m be kokolɛ liɛ’n, i agualiɛ’n yɛle wie’n.
11 Afin amun nian, amun kokolɛ m’ɔ ti Ɲanmiɛn i liɛ su’n ti’n, amun mian amun ɲin yo sa kpa. Amun kle kɛ amun ti sɛsɛfuɛ, amun kpɔ sa tɛ’n, amun sro Ɲanmiɛn, amun kunndɛ kpa kɛ amún káci amun akunndan’n, amun su Ɲanmiɛn juejue su, yɛ amun tuli sran ng’ɔ yoli sa tɛ’n i fɔ! Sa kwlaa sɔ’m be nun’n, amun kleli kɛ amun wun sa’n w’a wie.*
12 Ɔ maan sɛ n klɛli amun fluwa’n, nán sran ng’ɔ yoli sa tɛ’n i ti yɛ n klɛli-ɔ. Asa kusu’n, nán sran nga be yoli i tɛ’n i ti-ɔ. Sanngɛ kɛ ɔ ko yo naan amun a kle kɛ ndɛ nga e kan kle amun’n, amun nanti su Ɲanmiɛn ɲrun’n, i ti-ɔ.
13 Ɔ maan e wla guali ase.
Sanngɛ like nga ti yɛ e wla guali ase mɔ i ti’n, e di aklunjuɛ kpa ekun’n, yɛle aklunjuɛ mɔ Titi di’n. Afin amun kwlaa amun guɛli i awlɛn su nzue.
14 Kɛ n fali amun n dili min nuan Titi ɲrun’n, m’an wunman ɲannzuɛn. Ndɛ nga e kan kleli amun’n be ti nanwlɛ. I wafa kunngba’n, ndɛ nga ti yɛ e fali amun e dili e nuan i ɲrun’n, ɔ ti nanwlɛ wie.
15 Ɔ klo amun kpa. I wla te kpɛn amun kwlaa amun aɲinyiɛ’n su. Yɛ i wla te kpɛn wafa nga kɛ amún sɔ́ i nun’n, amun buli i sran mɔ amun wun bliblili amun’n i su.
16 Kɛ mɔ sa kwlaa nun’n n kwla lafi amun su’n* ti’n, min klun ti jɔwa.
Ja ngua lɔ ndɛ mun
^ Glɛki nun’n, be se kɛ “maan amun man e tranwlɛ amun awlɛn’n nun.”
^ Glɛki nun’n, be se kɛ “y’a wunman e wunnɛn’n nun fɛ.”
^ Be kwla se ekun kɛ “amun a yoman sa fi.”
^ Annzɛ “n kwla ɲan wunmiɛn.”
