1 Zan 4:1-21
4 Min sran kpa mun, nán an fa amun wla gua ndɛ kwlaa nga sran’m be waan be fin Ɲanmiɛn’n be su. Sanngɛ an nian sɛ ndɛ sɔ’m be fin i sakpa o. Afin be nga be tɔn be wun suɛn kɛ be ijɔ Ɲanmiɛn nuan’n, be kpanngban kpa b’a ba mɛn’n nun.
2 Wafa nga amun kwla sie ndɛ ng’ɔ fin Ɲanmiɛn’n i nzɔliɛ’n yɛ: Ndɛ kwlaa nga be kan se kɛ Zezi Klisi bali asiɛ’n su wa kɛ klɔ sran sa’n, yɛ ɔ fin Ɲanmiɛn-ɔn.
3 Sanngɛ sɛ sran wie se kɛ Zezi w’a baman mɛn’n nun kɛ klɔ sran sa’n, i ndɛ sɔ’n finman Ɲanmiɛn. Ɔ fin Klisi i kpɔfuɛ mɔ be seli amun kɛ ɔ́ bá’n. Dɔ nga su bɔbɔ’n, ɔ o mɛn’n nun.
4 Ba kanngan mun, amun ti Ɲanmiɛn i mma mun, yɛ an kwlali be. Afin sran ng’ɔ o amun sin’n i dan tra sran ng’ɔ o mɛn’n nunfuɛ’m be sin’n.
5 Be ti mɛn’n nunfuɛ, i ti yɛ ndɛ nga mɛn’n nunfuɛ’m be kan’n i wie yɛ be kan’n niɔn. Yɛ i sɔ’n ti yɛ mɛn’n nunfuɛ’m be sie be su be ti be ndɛ’n niɔn.
6 E liɛ’n, e ti Ɲanmiɛn liɛ. Ɔ maan sran ng’ɔ si Ɲanmiɛn’n, ɔ sie i su ti e ndɛ’n. Sanngɛ sran ng’ɔ timan Ɲanmiɛn liɛ’n, ɔ siemɛn i su timan e ndɛ’n. I lɛ’n nun yɛ e wun ngbaciɛ ng’ɔ o ndɛ ng’ɔ ti nanwlɛ’n nin ndɛ ng’ɔ ti ato’n be afiɛn’n niɔn.
7 Min sran kpa mun, maan e klo e wiengu titi, afin sran klolɛ’n fin Ɲanmiɛn. Sran kwlaa ng’ɔ klo i wiengu’n, ɔ ti Ɲanmiɛn i wa, yɛ ɔ si Ɲanmiɛn.
8 Sran ng’ɔ klomɛn i wiengu’n, ɔ siman Ɲanmiɛn, afin Ɲanmiɛn ti klolɛ.*
9 Wafa nga Ɲanmiɛn kleli kɛ ɔ klo e’n yɛle kɛ Ɲanmiɛn sunmɛnnin i Wa kunngba cɛ’n mɛn’n nun naan i dunman nun’n, e ɲan nguan.
10 Klolɛ sɔ’n yɛle kɛ, nán kɛ e yɛ e kloli Ɲanmiɛn-ɔn, sanngɛ i yɛ ɔ kloli e-ɔ. Yɛ ɔ sunmɛnnin i Wa’n kɛ e sa tɛ’m be ti’n, ɔ fɛ i wun yi tɛ naan e nin i e afiɛn sɛ ekun.*
11 Min sran kpa mun, kɛ mɔ Ɲanmiɛn kloli e sɔ’n ti’n, ɔ fata kɛ e kusu e klo e wiengu.
12 Sran fi nin-a wunman Ɲanmiɛn le. Sanngɛ sɛ e klo e wiengu titi’n, Ɲanmiɛn nin e o nun, yɛ klolɛ sɔ’n i ɲin fíte kpa e afiɛn.
13 Like ng’ɔ kle kɛ e nin i e o nun naan i kusu nin e o nun’n yɛle kɛ ɔ fɛli i wawɛ’n mannin e.
14 Asa ekun’n, e bɔbɔ e wunnin kɛ e Si’n sunmɛnnin i Wa’n naan ɔ bla ɔ wa de asiɛ’n sufuɛ mun. Yɛ e kɛn i sɔ’n i ndɛ e kle sran mun.
15 Sran ng’ɔ si kɛ Zezi ti Ɲanmiɛn i Wa’n, Ɲanmiɛn nin i sɔfuɛ’n be o nun. Sran sɔ’n kusu nin Ɲanmiɛn be o nun.
16 Ɔ maan e si kɛ Ɲanmiɛn klo e, yɛ e lafi i sɔ’n su.
Ɲanmiɛn ti klolɛ.* Sran ng’ɔ klo sran titi’n, ɔ nin Ɲanmiɛn be o nun titi, yɛ Ɲanmiɛn nin i sɔfuɛ’n be o nun titi.
17 I sɔ’n nun’n, e yili i nglo kpa kɛ e klo Ɲanmiɛn. Ɔ maan jɔlɛ dilɛ cɛn’n nun’n, kɛ é kán ndɛ’n e klun su titiman e. Afin kɛ ɔ fa ti’n, e kusu e ti sɔ wie mɛn nga nun.
18 Sran ng’ɔ klo Ɲanmiɛn’n, srɛ kunmɛn i. Sran ng’ɔ klo Ɲanmiɛn kpa’n ɔ kpalo srɛ’n, afin srɛ’n tanndan sran ɲrun. Nanwlɛ, sran nga srɛ kun i’n, ɔ kloman Ɲanmiɛn kpa.
19 E liɛ’n, e yi klolɛ’n i nglo, afin ɔ dun mmua kloli e.
20 Sɛ sran kun se kɛ, “N klo Ɲanmiɛn,” kusu nn ɔ kpɔ i niaan’n, sran sɔ’n ti ato buafuɛ. Afin sran ng’ɔ klomɛn i niaan m’ɔ wun i’n, ɔ kwlá kloman Ɲanmiɛn m’ɔ wunmɛn i’n.
21 I kpa bɔbɔ’n, mmla ng’ɔ mannin e’n yɛle kɛ sran ng’ɔ klo Ɲanmiɛn’n, maan i sɔfuɛ’n klo i niaan wie.
Ja ngua lɛ nzɔliɛ mun
^ Be kwla se ekun kɛ “klolɛ’n i bo’n wo Ɲanmiɛn wun lɔ.”
^ Be kwla se ekun kɛ “tɛ sɔ’n ɔ́ káta e sa tɛ’m be su.”
^ Be kwla se ekun kɛ “Klolɛ’n i bo’n wo Ɲanmiɛn wun lɔ.”
