1 Tesalonikifuɛ Mun 3:1-13

  • Kɛ Pɔlu o Atɛnin lɔ’n, ɔ tran-ɔn, ɔ kwlá tranman kun (1-5)

  • Ndɛ nga Timote wa kannin’n, ɔ wla fanngan (6-10)

  • Be srɛli Ɲanmiɛn mannin Tesalonikifuɛ mun (11-13)

3  Kɛ e trannin lele mɔ y’a kwlá tranman kun’n, e wunnin kɛ sɛ e ngunmin e ka Atɛnin lɔ’n, ɔ ti kpa.  Ɔ maan e sunmannin e niaan bian Timote m’ɔ ti Ɲanmiɛn i junman difuɛ’n,* m’ɔ bo Klisi’n i jasin fɛ’n, kɛ ɔ ko wla amun yakpa naan ɔ fɔnvɔ amun naan amun lafi e Min’n su kpa.  I liɛ’n, amun nun kun sa i sa sin su bubumɛn i* ɲrɛnnɛn sɔ’m be ti. Amun bɔbɔ amun si kɛ ɲrɛnnɛn kɛ ngalɛ sa’m be su to fuanman e.*  I nun nga e o amun wun lɔ’n, e seli amun titi kɛ é wún ɲrɛnnɛn. Kɛ amun fa wun i sa’n, i sɔ’n kusu yɛ ɔ juli-ɔ.  I sɔ’n ti yɛ kɛ n tran ɔ tranman kun’n, n sunmannin sran kɛ ɔ ko nian sɛ amun te nanti ndɛnman su-o. Atrɛkpa’n, Lakafuɛ’n w’a laka amun. Sɛ ɔ yoli sɔ sakpa’n, nn junman nga e dili’n, ɔ yoli ngbɛn.  Timote fin amun wun lɔ w’a ju wa icra’n. Ɔ boli amun lɔ jasin fɛ’n kleli e. I waan amun nin e Min’n te nanti nanwlɛ su, naan amun te klo i. Ɔ seli ekun kɛ amun wla nin-a fiman e su naan amun te bu e akunndan kpa, naan amun wla lo e kpa kɛ e kusu e wla lo amun’n sa.  I sɔ’n ti’n, aniaan mun, sɛ e sa mian-o, sɛ ɲrɛnnɛn tɔ e su-o, e wla gua ase. Afin amun kle kɛ amun nin e Min’n amun nanti nanwlɛ su.  Kɛ mɔ amun ti e Min’n i sɔnnzɔnfuɛ mɔ amun jran kekle’n ti’n, e ɲan wunmiɛn.*  Amun ti’n, e klun jɔ dan e Ɲanmiɛn’n i ɲrun. ?I sɔ’n ti’n, ngue yɛ é fá é lɛ́ i ase-ɔ? 10  Wia nun-o, kɔnguɛ-o, e srɛ Ɲanmiɛn tankaan kpa kɛ ɔ yo naan e wun amun wun* naan like ng’ɔ mian amun sa’n, e fa man amun naan an lafi e Min’n i su kpa. 11  Maan e Si Ɲanmiɛn bɔbɔ nin e Min Zezi be man e atin naan e ko nian amun osu. 12  Asa ekun’n, maan e Min’n yo maan amun sɔn, yɛ maan ɔ yo maan amun klo amun wiengu nin sran kwlaa kpa kɛ e kusu e fa klo amun’n sa. 13  Kɛ ɔ ko yo sɔ’n, ɔ́ yó maan amún jrán kekle. I liɛ’n, kɛ e Min Zezi nin i sran’m bé bá’n, e Si Ɲanmiɛn su wunman sa fi amun wun.

Ja ngua lɛ nzɔliɛ mun

Annzɛ “m’ɔ nin Ɲanmiɛn be di junman’n.”
Glɛki nun’n, be se kɛ “su kejeman.”
Be kwla se ekun kɛ “i sɔ liɛ’n ti yɛ be kpali e-ɔ.”
Glɛki nun’n, be se kɛ “e o nguan nun.”
Glɛki nun’n, be se kɛ “amun ɲrun.”