1 Korɛntifuɛ Mun 3:1-23
3 Ɔ maan aniaan mun, m’an kwlá kanman ndɛ m’an kleman amun kɛ sran mɔ Ɲanmiɛn wawɛ’n sie be’n sa. Sanngɛ n kannin ndɛ n kleli amun kɛ sran mɔ klɔ sran nzuɛn sie be mɔ be ti ba kanngan Klisi i atin’n i su falɛ’n nun’n sa.
2 N mannin amun nɔnnɔn, m’an manman amun aliɛ. Afin blɛ sɔ nun’n nn amun nin-a tinman kpa. Dɔ nga su bɔbɔ’n, amun nin-a tinman kpa.
3 Afin klɔ sran nzuɛn’n te sie amun. ?Kɛ amun ɲin ci amun wiengu mɔ amun di utre’n, nán klɔ sran nzuɛn’n yɛ ɔ sie amun lɛ-ɔ? ?Kɛ nga klɔ sran’m be fa nanti’n, nɛ́n i sɔ yɛ amun nanti-ɔ?
4 Afin nga waan “N ti Pɔlu liɛ,” nga kusu waan “N ti Apolɔsu liɛ.” ?Nán klɔ sran nzuɛn yɛle ngalɛ’n?
5 ?Wan yɛle Apolɔsu? ?Wan yɛle Pɔlu? E ti Ɲanmiɛn junman difuɛ, yɛ kɛ nga e Min’n mannin e tinuntinun e atin kɛ e yo’n sa’n, e ti yɛ amun kacili Ɲanmiɛn sufuɛ-ɔ.
6 N luali, Apolɔsu kusu guali su nzue, sanngɛ Ɲanmiɛn yɛ maan ɔ yoli kpa-ɔ.
7 Ɔ maan i sran ng’ɔ luali-o, i sran ng’ɔ guali su nzue-o, be timan like fi. Sanngɛ Ɲanmiɛn mɔ maan like’n yoli kpa’n, yɛ ɔ dili junman’n niɔn.
8 Sran ng’ɔ luali like’n nin sran ng’ɔ guali su nzue’n be ti kun.* Sanngɛ junman nga be tinuntinun be di’n i su yɛ bé nían bé túa be kalɛ-ɔ.
9 Afin e nin Ɲanmiɛn yɛ e di junman’n niɔn. Amun ti Ɲanmiɛn i fie m’ɔ su di nun junman’n, yɛ amun ti i sua m’ɔ su kplan’n.
10 Ɲanmiɛn i aklunye dan m’ɔ yili i nglo min lika’n ti’n, n wlali sua kun i bo ase kpa kɛ sua kplanfuɛ kpa kun* fa yo’n sa. Yɛ sran uflɛ su kplan kɔ. Sanngɛ maan sran kun nian wafa ng’ɔ kplan su’n i su kpa.
11 Afin sua nga b’a dun mmua b’a wlɛ i bo ase mɔ yɛle Zezi Klisi’n, sran fi kwlá yacimɛn i lɛ ko wlaman sua uflɛ bo ase kun.
12 Sɛ sran kun fa sika ɔkwlɛ, annzɛ jɛtɛ ufue, annzɛ yɔbuɛ kpakpa, annzɛ kusu waka, annzɛ ijre kee fa tɛkɛ i bo sɔ’n su’n,
13 sɛ junman ng’ɔ dili’n ti kpa annzɛ kusu ɔ ti tɛ’n, bé wún i wlɛ.* Afin kɛ blɛ wie wá jú’n, sin wá yó maan bé wún i sɔ’n weiin. Yɛ sin sɔ’n wá yí junman ng’ɔ dili’n i nglo.
14 Sran nga i sua ng’ɔ kplannin’n ka lɛ’n, ɔ́ ɲán akatua.
15 Sran nga i sua liɛ’n yra’n, i like fí i sa. Sanngɛ i bɔbɔ ba’n ɔ́ fíte nun. Kannzɛ ɔ yo sɔ bɔbɔ’n, sanngɛ ɔ́ yó kɛ w’a fin sin nun w’a fite sa.
16 ?Amun siman kɛ amun ti Ɲanmiɛn i sua naan Ɲanmiɛn wawɛ’n wo amun nun?
17 Sɛ sran kun saci Ɲanmiɛn i sua’n, Ɲanmiɛn núnnún i. Afin Ɲanmiɛn i sua’n ti i liɛ klonglo, yɛ i sua sɔ’n yɛle amun.
18 Nán sran fi lɛkɛ i wun: Sɛ amun nun wie bu i wun ngwlɛlɛfuɛ mɛn* nga nun’n, maan ɔ kaci sinnglinfuɛ, kɛ ɔ ko yo naan w’a yo ngwlɛlɛfuɛ’n ti.
19 Afin mɛn’n nun ngwlɛlɛ’n ti sinnzin Ɲanmiɛn ɲrun. Afin be klɛli i kɛ: “Ɔ fa ngwlɛlɛfuɛ’m be bɔbɔ be gblɛ’n fa tra be.”
20 Be klɛli i ekun kɛ: “Zoova si kɛ akunndan nga ngwlɛlɛfuɛ’m be bu’n, ɔ ti ngbɛn.”
21 Ɔ maan nán sran fi fa klɔ sran di i nuan. Afin like kwlaa ti amun liɛ.
22 I Pɔlu-o, i Apolɔsu-o, i Sefasi-o,* i mɛn nga-o, i nguan-o, i wie-o, i blɛ nga nun ninnge mun annzɛ ninnge nga bé bá lɔ’n mun-o, be kwlaa be ti amun liɛ.
23 Sanngɛ amun ti Klisi liɛ, yɛ Klisi kusu ti Ɲanmiɛn liɛ.
Ja ngua lɛ nzɔliɛ mun
^ Be kwla se ekun kɛ “be kunndɛ like kunngba’n.”
^ Be kwla se ekun kɛ “junman sunianfuɛ ngwlɛlɛfuɛ.”
^ Glɛki nun’n, be se kɛ “bé yí i nglo.”
^ Glɛki nun: aiɔn. Nian Ndɛ’m be bo tulɛ lika’n nun lɔ.
^ Be flɛ i ekun kɛ Piɛli.
