Pintor tu konten

Pintor tu menu namangihut

Sitindangi Ni Jahowa

Batak (Toba)

Marbarita tu Halak Sinti dohot Halak Roma na di Jerman

Marbarita tu Halak Sinti dohot Halak Roma na di Jerman

Adong marpulu ribu halak Sinti dohot halak Roma na tading di Jerman. * Barubaru on, dibahen Sitindangi Ni Jahowa do angka risalah, brosur, dohot video mamangke bahasa ni nasida, i ma bahasa Romania. *

Saleleng adong kampanye khusus di bulan September dohot Oktober 2016, marsitutu do Sitindangi Ni Jahowa mambagihon sijahaon na mamangke bahasa Romania tu halak Sinti dohot halak Roma di pigapiga kota na adong di Jerman, songon Berlin, Bremerhaven, Freiburg, Hamburg, dohot Heidelberg. Dibahen nasida do muse parpunguan na marbahasa Romania di Bale Harajaon.

Laba na Didapot

Las situtu do roha ni halak Sinti dohot halak Roma ala dibagihon Sitindangi Ni Jahowa angka sijahaon i tu nasida. Si Andre dohot si Ester, sada keluarga na dohot di kampanye i mandok, ”Las do roha ni nasida ala ro hami manjumpangi nasida.” Tingki dibege jala dijaha nasida barita na uli di bahasa Romania, hona do barita i tu roha ni nasida. Adong sahalak borua na manonton video Boasa Ringkot Marsiajar Bibel? di bahasa Romania. Alani songgot ni rohana, sai didok ibana ma, ”Oe tahe, bahasangku do on!”

Sahalak Sitindangi na margoar si Matthias, na dohot di kampanye di Hamburg, mandok, ”Ahu dohot tungganeborungku raphon onom halak dongannami marbarita tu huta ni halak Sinti dohot halak Roma. Adong ma hirahira 400 halak na tading disi. Sude na hujumpangi hami gabe mangido sijahaon.” Dung dijalo sijahaon i, pintor gogo do soara ni nasida manjahahon i, jala dipangido muse asa adong tu angka dongan ni nasida.

Godang do halak Sinti dohot halak Roma na manjalo gokkon asa ro tu parpunguan. Adong ma 94 halak na ro marpungu tu Hamburg. Godang do sian nasida na so hea dope ro tu Bale Harajaon. Di Reilingen, di jonok ni Heidelberg, adong 123 halak na ro tu parpunguan. Dung i, adong lima halak na marbahasa Romania mangido asa marsiajar Bibel.

Saleleng kampanye i, adong do hirahira 3.000 risalah dohot brosur na dibagihon Sitindangi Ni Jahowa. Adong lobi sian 360 halak Sinti dohot halak Roma na mangulas taringot isi ni Bibel raphon Sitindangi Ni Jahowa, jala adong 19 halak na olo marsiajar Bibel. Pigapiga sian nasida mandok, ”Las situtu roha mamboto, olo do hape Debata jonok tu hita.”

^ par. 2 Holan saotik do halak Sinti na tading di Eropa Barat dohot Eropa Tengah. Halak Roma pe holan saotik do, jala nasida sian Eropa Timur dohot Eropa Tenggara.

^ par. 2 Dipaboa di Encyclopædia Britannica Online, adong ”lobi sian 60 dialek na marasingasing di bahasa Romania”. Hata ”Romania” na dipangke di artikel on patuduhon taringot bahasa na jotjot dipangke halak Sinti dohot halak Roma na tading di Jerman.