Pintor tu konten

Pintor tu menu namangihut

Sitindangi Ni Jahowa

Batak (Toba)

Rak Beroda di Jerman ”Tingki Liburan”

Rak Beroda di Jerman ”Tingki Liburan”

Di pigapiga kota na balga di portibi on, jotjot do diida angka halak na mardalan pat rak beroda na binahen ni Sitindangi Ni Jahowa. Umpamana, di Jerman, dibahen angka Sitindangi do rak beroda di Berlin, di Köln, di Hamburg, di München, dohot di godang kota na asing.

Alai, adong do laba ni rak beroda on molo dibahen di kota na umgelleng di inganan liburan ni halak Jerman? Songon dia do carana asa rak beroda i boi dibahen di pigapiga inganan di sabola utara, di daerah pantai, di angka pulo na di laut Baltik dohot di laut Utara? Laho mangalusi sungkunsungkun on, taon 2016, dibahen kantor cabang ni Sitindangi Ni Jahowa di Eropa Tengah ma sada ulaon. Mulai bulan Mei sahat tu Oktober, godang do Sitindangi na rade manjaga gerai di hirahira 60 inganan di Jerman bagian utara. Hirahira 800 Sitindangi ma na dohot tu ulaon i. Adong na sian Vienna, Austria, jala godang sian nasida nunga hea manjaga gerai di angka kota na balga.

”Nunga Songon Parhuta On”

Godang do na manjangkon ulaon on. Sahalak Sitindangi mandok, ”Las do roha ni angka halak na disi. Burjuburju do nasida jala lomo rohana mangkatahatai dohot hami.” Si Heidi, na manjaga gerai di kota Plön mandok, ”Dung pigapiga ari, nunga songon parhuta on be hami dibahen nasida. Alana, molo diida parhuta on hami, pintor dipangkulingi nasida do hami.” Sahalak baoa na ngungu mandok tu angka Sitindangi na disi, ”Di godang inganan do dibahen hamu songon on ate.” Boasa didok ibana songon i? Alana, tingki laho ibana tu acara ni angka na ngungu di Jerman bagian tenggara, pajumpang do ibana dohot angka Sitindangi Ni Jahowa disi.

Rade do angka halak mangurupi ulaon on. Di pulo Wangerooge, dipaboa sahalak polisi ma tu Sitindangi taringot angka inganan na ribur, asa godang na mangida rak beroda i. Asing ni i, dipatorang sahalak kapten ni kapal ma tu penumpangna taringot angka inganan di Waren an der Müritz. Tingki mangida rak beroda di pelabuhan, didok ibana tu penumpangna, ”Molo tusi hamu, dapotmu ma hatorangan taringot Debata.” Godang do turis na mangida rak beroda i jala manjaha poster na dipatudu.

Songon on ma didok angka halak tingki mandapot tolu brosur on:

  • Apakah Allah Benar-Benar Mempedulikan Kita? Sahalak turis mandok, ”Nga leleng hulului alus ni sungkunsungkun on. Saonari, pas di tingki liburan on, nunga dapothu be hatorangan taringot on.”

  • Barita na Uli sian Debata! Adong sahalak baoa na matua manjumpangi Sitindangi. Didok ibana ma jut rohana mangida angka agama. Dipatorang ma tu ibana, ndang boi jolma pasaehon hasusaan dohot sitaonon; holan Debata do na boi. Dijalo ma brosur on jala marjanji do ibana laho manjaha i.

  • Parsiajaran Bibelhu. Adong ma sahalak ama na paloashon boruna mambuat brosur on, alana brosur on dibahen tu dakdanak. Dung i, dibuat bapakna i ma muse Buku Cerita Alkitab jala didok, ”Denggan do on tu keluarganami.”

Adong lobi sian 3.600 publikasi na dilehon tu angka halak na mamolus sian inganan ni rak beroda i. Adong do pigapiga halak na mangido asa dijumpangi muse jala marsiajar Bibel.

Las do roha ni angka Sitindangi na dohot tu ulaon i. Si Jörg dohot tungganeboruna, si Marina manjaga gerai di jonok ni Laut Baltik. Didok nasida, ”Songon hadiah na arga do on di hami. Boi do diida hami uli ni tompaan ni Debata huhut paboahon taringot Debata tu angka halak.” Si Lukas na marumur 17 taon mandok, ”Las hian rohangku ala boi pasahathon barita na uli tu godang halak.”