Pintor tu konten

Rak Beroda di Jerman “Tikki Liburan”

Rak Beroda di Jerman “Tikki Liburan”

Di piga-piga kota na balga di portibi on, jotjot do diida akka halak na mardalan pat rak beroda na binahen ni Sitindangi Ni Jahowa. Umpamana, di Jerman, dibahen akka Sitindangi do rak beroda di Berlin, di Köln, di Hamburg, di München, dohot di godang kota na asing.

Alai, adong do laba ni rak beroda on molo dibahen di kota na umgelleng di inganan liburan ni halak Jerman? Songon dia do carana asa rak beroda i boi dibahen di piga-piga inganan di sabola utara, di daerah pantai, di akka pulo na di laut Baltik dohot di laut Utara? Lao mangalusi sukkun-sukkun on, taon 2016, dibahen kantor cabang ni Sitindangi Ni Jahowa di Eropa Tengah ma sada ulaon. Mulai bulan Mei sahat tu Oktober, godang do Sitindangi na rade manjaga gerai di hira-hira 60 inganan di Jerman bagian utara. Hira-hira 800 Sitindangi ma na dohot tu ulaon i. Adong na sian Vienna, Austria, jala godang sian nasida nungnga hea manjaga gerai di angka kota na balga.

“Nungnga Songon Parhuta On”

Godang do na manjakkon ulaon on. Sahalak Sitindangi mandok, “Las do roha ni akka halak na disi. Burju-burju do nasida jala lomo rohana makkata-hatai dohot hami.” Si Heidi, na manjaga gerai di kota Plön mandok, “Dung piga-piga ari, nungnga songon parhuta on be hami dibahen nasida. Alana, molo diida parhuta on hami, pittor dipakkulingi nasida do hami.” Sahalak bawa na ngungu mandok tu akka Sitindangi na disi, “Di godang inganan do dibahen hamu songon on ate.” Boasa didok ibana songon i? Alana, tikki lao ibana tu acara ni akka na ngungu di Jerman bagian tenggara, pajuppang do ibana dohot akka Sitindangi Ni Jahowa disi.

Rade do akka halak mangurupi ulaon on. Di pulo Wangerooge, dipaboa sahalak polisi ma tu Sitindangi taringot akka inganan na ribur, asa godang na mangida rak beroda i. Asing ni i, dipatorang sahalak kapten ni kapal ma tu penumpangna taringot akka inganan di Waren an der Müritz. Tikki mangida rak beroda di pelabuhan, didok ibana tu penumpangna, “Molo tusi hamu, dapotmu ma hatorangan taringot Debata.” Godang do turis na mangida rak beroda i jala manjaha poster na dipatudu.

Songon on ma didok akka halak tikki mandapot tolu brosur on:

  • Apakah Allah Benar-Benar Mempedulikan Kita? Sahalak turis mandok, “Nga leleng hulului alus ni sukkun-sukkun on. Saonari, pas di tikki liburan on, nungnga dapothu be hatorangan taringot on.”

  • Barita na Uli sian Debata! Adong sahalak bawa na matua manjuppangi Sitindangi. Didok ibana ma jut rohana mangida akka agama. Dipatorang ma tu ibana, dang boi jolma pasaehon hasusaan dohot sitaonon; holan Debata do na boi. Dijalo ma brosur on jala marjanji do ibana lao manjaha i.

  • Parsiajaran Bibelhu. Adong ma sahalak ama na paloasson boruna mambuat brosur on, alana brosur on dibahen tu dakdanak. Dung i, dibuat bapakna i ma muse Buku Cerita Alkitab jala didok, “Denggan do on tu keluarganami.”

Adong lobi sian 3.600 publikasi na dilehon tu akka halak na mamolus sian inganan ni rak beroda i. Adong do piga-piga halak na mangido asa dijuppangi muse jala marsiajar Bibel.

Las do roha ni akka Sitindangi na dohot tu ulaon i. Si Jörg dohot tungganeboruna, si Marina manjaga gerai di jonok ni Laut Baltik. Didok nasida, “Songon hadiah na arga do on di hami. Boi do diida hami uli ni tompaan ni Debata huhut paboahon taringot Debata tu akka halak.” Si Lukas na marumur 17 taon mandok, “Las hian rohakku ala boi pasahatton barita na uli tu godang halak.”