Pintor tu konten

“Silehon-lehon ni Debata” di Kota na Mamora

“Silehon-lehon ni Debata” di Kota na Mamora

Cluj-Napoca, i ma sada kota na umbalga di Rumania, jala didok do on Kota na Mamora. Saleleng adong pameran bukku Gaudeamus, na dibahen mulai tanggal 20 sahat tu 24 April 2016, dipatudu Sitindangi Ni Jahowa ma akka sijahaon na marisi hatorangan sian Bibel. Dibahen nasida ma disi sada inganan pameran jala boi ma nasida patuduhon akka video, sijahaon, dohot Bibel tu marribu halak na ro tu pameran i.

Adong do piga-piga parsikkola na ro tu pameran i, jala diboan akka guru do murid ni nasida tu gerai na dibahen Sitindangi. Las do roha ni akka murid ni nasida manonton video animasi Gabe Aleale ni Jahowa, jala godang do na mangido Buku Cerita Alkitab dohot brosur Ajar ma Ianakhonmuna. Sahalak pangarorot na mangida video animasi di gerai ni Sitindangi mandok tu donganna, “Ingkon tasurat do alamat situs web ni halak on [www.jw.org], asa tapatudu annon video on tu akka dakdanak na asing.”

Las do roha ni akka remaja mangida video animasi papan tulis na dipatudu sian tablet. Akka video na dipatudu, i ma video Tutu do on Holong na Sasintongna?, Marbisuk ma Mamangke Jejaring Sosial, dohot Marbisuk ma Hamu Mangadopi si Pangarehei.

Sahalak pandita ni Ortodoks dohot tungganeboruna piga-piga hali ro tu gerai ni Sitindangi. Dijalo nasida do Bibel Terjemahan Dunia Baru dohot piga-piga brosur. Didok pandita i, las do rohana mangida fitur “Indeks Kata-Kata Alkitab” dohot hatorangan na mangurupi akka penerjemah tikki manerjemahon Bibel i. Dilehon ibana ma nomor ni handphonena tu akka Sitindangi jala didok ibana asa ro Sitindangi mangurupi ibana mangulas isi ni Bibel.

Disukkun tungganeboru ni pandita i ma didia do di jw.org hatorangan tu akka dakdanak. Dung i, dipatudu ma tu ibana taringot bagian “Anak-Anak” di situs web i. Ditonton ibana ma video Hatahon ma na Tutu, jala las rohana manonton i. Dung diida ibana sude fitur na adong di situs web i, didok ibana ma tu tungganedolina, “Silehon-lehon sian Debata do on tu jolma.”