Pintor tu konten

Sitindangi Ni Jahowa

Pillit Hata Batak (Toba)

Marbarita na Uli tu Sijala Dengke

Marbarita na Uli tu Sijala Dengke

Di liat portibi on, adong hirahira sada satonga juta sijala dengke. Ala jotjot do nasida marpindapinda sian sada pelabuhan tu pelabuhan na asing, songon dia do Sitindangi Ni Jahowa boi pasahathon barita na uli tu nasida? Molo adong sada kapal maradi di pelabuhan, ro ma angka Sitindangi tu kapal i mangalehon angka sijahaon di bahasa ni nasida jala mambahen parsiajaran Bibel.

Songon dia do pangkilalaan ni angka halak na di kapal i? Si Stefano, sahalak Sitindangi na marbarita di pelabuhan Vancouver, Kanada, mandok, ”Dirimpu pigapiga halak do sude sijala dengke i halak na garang. Ra, adong do pigapiga na songon i, alai gumodangan do na serep marroha jala lomo rohana marsiajar.” Didok ibana muse, ”Sai dijangkon nasida do hami, alana porsea do nasida tu Debata jala mangkirim tu pasupasuNa.” Di Vancouver, mulai bulan September 2015 sahat tu Agustus 2016, nunga lobi 1.600 hali angka Sitindangi Ni Jahowa manjumpangi angka halak na di kapal! Dilehon nasida ma marribu sijahaon di marragam bahasa, jala adong lobi sian 1.100 halak na olo marsiajar Bibel.

Songon dia do carana asa tongtong nasida marsiajar Bibel?

Ala adong do angka Sitindangi na marbarita di godang pelabuhan di liat portibi on, boi ma angka sijala dengke i tongtong marsiajar Bibel tingki laho tu pelabuhan na asing. Umpamana di bulan Mei 2016, pajumpang ma Sitindangi Ni Jahowa di Vancouver dohot si Warlito, sahalak pangalompa di kapal barang. Dipatudu ma tu ibana video Boasa Ringkot Marsiajar Bibel? jala marsiajar Bibel ma ibana mamangke brosur Barita na Uli sian Debata! Tingki i, naeng laho nama si Warlito tu pelabuhan Paranaguá di Brasil. Alai, hirim do rohana asa boi tongtong marsiajar Bibel.

Dung lobi sabulan, sahat ma ibana di Paranaguá. Pajumpang ma ibana dohot dua Sitindangi halak Brasil di pelabuhan i. Didok nasida, nunga dikirim angka Sitindangi di Vancouver taringot pangidoan ni si Warlito asa dijumpangi muse. Las situtu do roha ni si Warlito ala pajumpang dohot angka Sitindangi i, jala mandok mauliate do ibana ala marsitutu nasida manjumpangi ibana. Tongtong do ibana marsiajar Bibel dohot angka Sitindangi di pelabuhan na asing.