Pintor tu konten

Pintor tu menu namangihut

Sitindangi Ni Jahowa

Batak (Toba)

Situasi na Mambahen Dame di Tour de France

Situasi na Mambahen Dame di Tour de France

Perlombaan sepeda na tarbarita di liat portibi on, i ma Tour de France. Nunga 103 hali perlombaan on dibahen. Di taon 2016, dibahen ma i tanggal 2 sahat tu 24 Juli 2016. Tingki i, godang do angka halak disi na mabiar. Alana di taon 2015, digugai angka teroris do inganan i, jala adong 100 halak na mate. Dung i, di ari libur tanggal 14 Juli 2016, sahalak teroris mamboan truk jala ditabraki ma angka halak na mangida kembang api di kota Nice. Mate ma 86 halak jala godang na luka.

Dungkon masa i, marsitutu do Sitindangi Ni Jahowa paboahon taringot pangkirimon jala mangapuli angka halak na adong disi. Dibahen Sitindangi Ni Jahowa ma rak beroda di godang inganan di perlombaan Tour de France. Lobi sian 1.400 Sitindangi Ni Jahowa dohot tu ulaon i, jala paradehon lobi sian 2.000 sijahaon tu angka halak na mangalului alus ni sungkunsungkun na ringkot taringot parngoluon.

’Manang Didia pe, Sai Adong do Hamu!’

Marpindapinda do perlombaan i dibahen jala angka na manonton pe dohot do tu ganup inganan i. Longang do roha ni nasida mangida angka Sitindangi Ni Jahowa na adong di ganup inganan i. Pigapiga hali, angka pengurus perlombaan Tour de France mamuji ulaon ni Sitindangi, jala didok, ”Manang didia pe, sai adong do hamu di ganup perlombaan on!” Godang do angka halak na manonton mandok, ”Sitindangi Ni Jahowa pe adong do dison!” Pigapiga ari di perlombaan i, sahalak supir ndang olo manjalo sijahaon na dilehon tu ibana, ala nunga adong opat sijahaon naung dapotna!

Ala ro Sitindangi Ni Jahowa tu inganan i, adong ma pigapiga halak na mambuat sijahaon sian rak beroda i. Jala i ma parjolo sahali dibuat nasida sijahaon na pinarade ni angka Sitindangi. Umpamana, adong parkarejo siaran TV olahraga na hea mangida angka Sitindangi di perlombaan Tour de France naung salpu. Alai tingki perlombaan on, ro ma ibana tu rak beroda jala dibuat ma buku Rahasia Kebahagiaan Keluarga, ala adong hatorangan na ringkot botoonna sian buku i. Dung sae manjaha pigapiga hatorangan sian buku i, dipaboa ibana ma taringot rak beroda i tu angka donganna, jala dibuat nasida ma pigapiga sijahaon.

Paposhon Roha jala Paboahon Pangkirimon

Pigapiga halak na manonton perlombaan i mandapothon Sitindangi Ni Jahowa jala paboahon pangkilalaan ni nasida. Sahalak borua paboahon sude arsak ni rohana alani sitaononna jala naeng bunu diri nama ibana. Alai dung dibege ibana barita na uli sian Bibel, i ma taringot tu Harajaon ni Debata, tarapul ma rohana jala ndang saut be ibana bunu diri. Adong muse sahalak borua na mandok tu Sitindangi, ”Tongtong ma ulahon hamu songon on da!”

Sahalak baoa na martungkot mandok, jotjot do ibana curiga tu halak na so ditanda. Hape diurupi sahalak Sitindangi Ni Jahowa ma ibana jala ndang ditanda ibana Sitindangi i. Didok ibana ma, ”Mauliate ma di haburjuonmi jala rapi do ho marpangkean. Gabe ndang curiga ahu tu ho.”