Pintor tu konten

Sitindangi Ni Jahowa

Pillit Hata Batak (Toba)

Mangapuli Jala Patoguhon Angka Naung Matua

Mangapuli Jala Patoguhon Angka Naung Matua

Dos songon negara na asing, di Australia pe godang do angka naung matua. Piga-piga naung matua dibahen do tu panti jompo. Disi, adong do angka perawat na boi mangurupi jala manjaga nasida.

Alai sasintongna, ndang holan i na diporluhon nasida. Sipata, olo do nasida bosan, lungun-lungunan jala mandele. Ganup minggu, ro do Sitindangi Ni Jahowa tu dua panti jompo di kota Portland, propinsi Victoria, Australia. Dipaboa nasida ma pangkirimon jala dipatogu ma roha ni angka naung matua i.

Denggan do Marsiajar Bibel Diulahon di Panti Jompo

Tingki ro Sitindangi Ni Jahowa tu sada panti jompo, dipatorang nasida ma tu angka naung matua i taringot hangoluan ni Jesus. Si Jason mandok, “Dijahahon hami ma ayatna, jala dipatorang hami ma lapatanna tu nasida.” Godangan sian angka naung matua i, nunga marsahit. Alani i, dibahas angka Sitindangi i do taringot janji ni Debata na laho salpuhononna do sahit dohot hamatean.

Sahalak Sitindangi na margoar si Toni mandok, “Mulana, holan satonga jom do hami disi.” Alai dipangido nasida ma asa leleng hami disi. “Jadi saonari, gabe hira-hira sajom ma hami mardiskusi dohot nasida. Memang, adong do na mangido molo boi dua jom.” Piga-piga sian na matua i ndang boi be marnida, holan di podoman, jala ndang boi be maniop manang aha pe. Jadi, diurupi Sitindangi ma nasida asa boi dohot marsiajar Bibel.

Tingki ro Sitindangi, biasana, diendehon nasida do sada ende laho mamuji Debata. Alai jotjot do dipangido angka na matua i asa ditambai endena. Si John * sahalak sian na matua i mandok, “Lomo do rohanami mambege musik ni endemuna i. Mura do diantusi hami jala lam diargai hami ma Debata.” Adong sahalak na matua na so boi be marnida, goarna si Judith. Adong do piga-piga ende na dihalomohon rohana, jala diapil ibana do sude lirikna!

Las do roha ni Sitindangi Ni Jahowa mangida keadaan ni angka na matua i. Sahalak sukarelawan na margoar si Brian mandok, “Molo adong angka na matua i na marsahit, pintor ro do hami mangida tu kamar ni nasida. Mangkata-hatai ma hami tu nasida. Jala diida hami ma songon dia pangkilalaanna. Sipata, ro do muse hami di ari na asing laho mangida songon dia keadaan ni na marsahit i.”

“Debata do Na Manuru Hamu Tuson”

Godang do sian nasida na las rohana ala ro Sitindangi. Si Peter, ganup minggu do dohot marsiajar Bibel. Didok ibana ma, “Sai hupaima-ima do i.” Didok si Judith do tu sahalak perawat disi, “Ari rabu do on! Urupi jo ahu asa boi dohot marsiajar Bibel tu nasida. Ndang olo ahu tarlambat!”

Las do roha ni nasida tu sude naung diparsiajari. Jala lam solhot ma nasida tu Debata. Dung diulas hami taringot ajaran ni Jesus, didok si Robert ma, “Najolo, maol do huantusi bagian on. Alai saonari nunga huantusi be!” Diparsiajari si David do, boasa ringkot martangiang. Didok ibana, “Gabe lam jonok do ahu tu Debata, jala lam pos do rohangku tu Ibana.”

Las hian do roha ni nasida mamboto taringot pangkirimon di ari na naeng ro. Didok si Lynette do tu angka Sitindangi, “Mauliate ma, ala diapuli hamu do hami marhite Bibel.” Sahalak na matua na asing mandok, “Debata do na manuru hamu tuson!”

Si Margaret, nunga ro ganup minggu marpungu tu Bale Harajaon na jonok disi. Ingkon berjuang do ibana. Alana, jotjot do ibana marsahit jala maol do mardalan. Didok ibana ma tu Sitindangi, “Dilehon hamu do pangkirimon tu hami.”

Si Margaret, nunga ro ganup minggu marpungu tu Bale Harajaon na jonok disi. Ingkon berjuang do ibana. Alana, jotjot do ibana marsahit jala maol do mardalan. Didok ibana ma tu Sitindangi, “Dilehon hamu do pangkirimon tu hami.”

‘Mansai Denggan do Na Binahenmuna On’

Angka perawat i pe, diargai nasida do haroro ni Sitindangi. Si Anna sahalak Sitindangi mandok, “Dijujui angka perawat i do angka na matua asa dohot marsiajar Bibel. Alana dibereng angka perawat i, gabe tamba do las ni roha ni angka na matua i dung marsiajar Bibel.” Si Brian mandok, “Burju-burju do angka perawat disi. Sai rade do nasida mangurupi.”

Las do roha ni angka keluarga ni naung matua i mangida natua-tuana marsiajar Bibel. Adong ma boru ni sahalak sian naung matua i mamuji Sitindangi. Didok ibana, “Mansai denggan do na binahenmuna i tu omakku.”

^ par. 7 Piga-piga goar ni panti jompo i nunga diganti.