Pintor tu konten

Sitindangi Ni Jahowa

Pillit Hata Batak (Toba)

Dohot do Sitindangi Ni Jahowa Paiashon Hutan Jonok ni Huta Lviv

Dohot do Sitindangi Ni Jahowa Paiashon Hutan Jonok ni Huta Lviv

Tanggal 6 Mei 2017, adong 130 Sitindangi na dohot paiashon hutan Bryukhovychi di jonok ni huta Lviv di Ukraina. Angka Sitindangi na dohot tu ulaon on marumur sian 22 sahat tu 80 taon. Nasida karejo jala tading di kantor cabang Sitindangi Ni Jahowa na adong di jonok ni hutan i. Saleleng tolu jom, dipaias nasida do hutan i sampe 50 hektar jala adong 600 kilo sampah naung dipapungu nasida.

Adong sahalak insinyur na manguluhon Pusat Penangkaran Hutan dan Pengeboran Lviv, i ma si Mykhailo Splavinskyi. Didok ibana, “Sitindangi Ni Jahowa do kelompok na parjolo mangurupi ulaon paiashon hutan ganup taon. Jala nunga diulahon nasida i sian taon 2014.”

Boasa Porlu Dipaias Hutan i?

Ninna si Splavinskyi adong dua na mambahen godang sampah di hutan on. Na parjolo, ala adong do angka halak na mambolongkon sampah tuson. Na paduahon, adong angka truk na mamboan angka sampah bangunan dohot sampah na asing, jala dibolongkon ma tuson.

Angka sampah na di hutan i boi do gabe masalah. Didok si Splavinskyi, “Leleng do asa hancur angka sampah on. Jala boi do i mambahen aek gabe kotor jala gabe tambah masalah.” Angka sampah kaca pe boi do mambahen kebakaran molo hona mata ni ari. Jala angka kaca dohot jarum suntik bahaya do i tarlumobi tu dakdanak. Didok si Splavinskyi, “Ingkon dipaias do i asa ndang gabe masalah.”

Ndang mura paiashon hutan na bolakna 3.300 hektar. Didok si Splavinskyi, “Holan lima halak do penjaga ni hutan i. Ndang mungkin boi paiashon nasida i sude. Jadi, ganup taon dipangido hami do tu angka halak asa dohot mangurupi paiashon hutan on.”

Dipapungu, Dipapulik, Dung I Dibolongkon

Dipangke angka Sitindangi do sarung tangan, diboan do plastik dohot gair-gair. Dipapungu nasida do angka botol, ban mobil, angka kaca, bosi-bosi, angka plastik dohot jarum suntik. Sahalak panjaga ni hutan i na margoar Ihor Fedak mandok, “Daerah na dipaias angka Sitindangi i, na iasan bah.”

Nang pe ndang disuru, dipapulik Sitindangi do sampah kaca, harotas, dohot plastik. Jadi, boi ma didaur ulang. Perusahaan daur ulang sampah do na mendaur ulang i. Sian taon 2016, hepeng ni nasida sandiri do na dipangke Sitindangi, laho membiayai daur ulang i. Didok si Fedak, “Mauliate ma hudok tu angka Sitindangi Ni Jahowa ala nga diurupi hami. Mansai arga do sude na dibahen nasida i.”

“Ndang Maila Ahu Dohot Paiashon Sampah On”

Las do roha ni angka Sitindangi ala boi mangurupi paiashon hutan i ganup taon. Gabe ias ma hutan i, jala mangkorhon na denggan do i tu angka halak. Sahalak Sitindangi na margoar si Volker mandok, “Ndang maila ahu dohot paiashon sampah on. Ulaon na sangap do di ahu molo boi parohon na denggan tu angka halak. Jala las do rohangku.” Songon i ma pangkilalaan ni angka Sitindangi na asing.

Didok si Anzhelika ma muse, “Ndang huparsoalhon ise na mambolongkon sampah i. Alai aha ma na porlu bahenon asa ias.” Si Lois na marumur 78 taon dohot do mangurupi ulaon on. Didok ibana, “Tumagon do molo pintor tapaias sampah, sian apala muruk tingki mardalan ala mangida angka sampah i.”

Didok si Wieslaw, “Somalna tingki marbarita, diida halak rapi-rapi do pangkeannami jala mardasi. Alai ndang maila hami molo kotor alani paiashon hutan, manang mangulahon ulaon na asing molo parohon na denggan do i tu angka halak.”