Pintor tu konten

Pintor tu menu namangihut

Sitindangi Ni Jahowa

Batak (Toba)

Mangurupi Angka Pangungsi di Eropa Tengah

Mangurupi Angka Pangungsi di Eropa Tengah

Di pigapiga taon na parpudi on, godang do angka pangungsi na ro sian Afrika, Timur Tengah, dohot Asia Selatan tu Eropa. Diparade negara dohot angka sukarelawan disi do sipanganon, inganan, dohot parubatan laho mangurupi nasida.

Sasintongna, ndang holan na porlu di pardagingon na ringkot di nasida. Godang do sian nasida na trauma, porlu do nasida diapuli jala dilehon pangkirimon. Marsitutu do Sitindangi Ni Jahowa di Eropa Tengah laho mangurupi, manangihon jala mangapuli nasida marhite Bibel.

Mangapuli Marhite Bibel

Mulai Agustus 2015, Sitindangi di lobi sian 300 huria sian Austria dohot Jerman marsitutu laho mangapuli angka pangungsi. Didok nasida, las do roha ni angka pangungsi tingki mangulas alus ni Bibel taringot tu sungkunsungkun on:

Sian Agustus sahat tu Oktober 2015, dipangido Sitindangi na di luat i do lobi sian opat ton buku na marojahan tu Bibel sian kantor cabang Eropa Tengah jala gratis do i dilehon tu angka pangungsi.

Nang pe Marasingasing Bahasa ni Nasida

Godang do sian pangungsi i na holan mamboto bahasa di luat nasida. Alani i, dipangke Sitindangi ma situs jw.org na marisi sijahaon dohot video di marratus bahasa. Si Matthias dohot si Petra na gabe sukarelawan di Erfurt, di Jerman mandok, ”Sipata dipangke hami do isyarat, foto manang gambar laho mangkatai dohot nasida.” Dipangke nasida do muse aplikasi JW Language laho marsiajar bahasa na asing asa boi marbarita na uli di bahasa ni angka pangungsi i. Adong do muse na mamangke aplikasi JW Library laho manjahahon Bibel dohot patuduhon video di marragam bahasa.

Mansai Godang na Manjangkon

”Mansai godang do halak na ro mandapothon hami. Di bagasan dua satonga jom, nunga dijalo angka pangungsi i 360 buku. Pigapiga sian nasida mandok mauliate do tu hami,” ninna Sitindangi na mardongan saripe sian Schweinfurt, di Jerman. Si Wolfgang, sahalak sukarelawan di Diez di Jerman mandok, ”Las do roha ni angka pangungsi i ala adong na manarihon nasida. Sipata, dipangido nasida do buku di bagasan lima manang onom bahasa.”

Godang do sian nasida na pintor manjaha buku i. Na asing, ro do muse laho mandok mauliate. Si Ilonca, sahalak Sitindangi di Berlin di Jerman mandok, ”Ro ma dua halak baoa na poso manjalo buku sian hami. Dung satonga jom nai, ro do muse nasida mamboan roti tu hami. Jala didok nasida ma, ’Holan on ma na boi hulehon hami laho mandok mauliate tu hamu.’”

”Mauliate! Mauliate Godang!”

Diargai pegawai sosial, pejabat ,dohot warga disi do halojaon ni angka Sitindangi na gabe sukarelawan disi. Pegawai sosial na mangurupi hirahira 300 pangungsi mandok, ”Mauliate! Mauliate godang! Ala olo hamu manarihon na ringkot tu angka halak sian negara na asing!” Sahalak pegawai sosial na asing mandok mansai denggan do ala dilehon Sitindangi sijahaon di bahasa ni angka pangungsi i ”alana ndang adong be ulaon ni nasida asing ni mangan tolu hali sadari”.

Si Marion dohot tungganedolina, si Stefan na sian Austria, paboahon tujuan ni nasida gabe sukarelawan disi tu dua polisi na manjaga. Mandok mauliate do polisi i tu nasida jala dipangido ma dua buku. Si Marion mandok, ”Sai dipuji polisi i do hami ala dohot di ulaon on.”

Sahalak borua di Austria na jotjot mangalehon sumbangan tu pangungsian i mandok, sai na rade do Sitindangi mangurupi nang pe tingki las ari manang udan. Sada tingki didok ibana ma, ”Ringkot do nian sipanganon dohot na asing di angka pangungsi i. Alai, rumingkot do pangkirimon di nasida. Jala, i do na dilehon hamu.”