Pintor tu konten

Mangurupi jala Mangapuli Halak na Marsahit

Mangurupi jala Mangapuli Halak na Marsahit

Mura do holsoan halak na marsahit, tarlumobi molo ikkon dirawat di rumah sakit gabe marsak do ibana. Alani i, adong sada sijahaon taringot kesehatan mandok, “Nungnga diparrohahon akka peneliti lam mura do malum akka na marsahit molo las rohana jala dipatogu ibana marhite parbinotoan taringot Debata.” *

Diurupi Sitindangi Ni Jahowa do dongan sahaporseaonna na dirawat di rumah sakit jala diapuli do nasida mamakke Bibel. Ro do akka sittua lao mangida akka dongan sahuria na marsahit. Alai, boha ma molo adong Sitindangi na marsahit ro sian luat na dao? Di piga-piga kota di liat portibi on, dibahen Sitindangi Ni Jahowa do sada kelompok, goarna Kelompok Pengunjung Pasien (KPP). Sai ro do akka sittua na di kelompok on molo adong donganna Sitindangi dohot keluargana na naeng marubat, sian luar kota manang luar negeri. Adong 1.900 KPP di liat portibi on jala 28.000 halak ma anggotana. *

Pangapulion aha do na dilehon KPP?

Adong sahalak anggota KPP goarna si William, didok ibana, “Hea do au mangapuli Sitindangi dohot keluarga ni nasida na so Sitindangi. Makkatai-hatai do au dohot nasida. Hudok do tu nasida, disarihon jala diurupi Jahowa do nasida manang songon dia pe situasina. Las do roha ni akka na marsahit dohot keluargana molo tatangiangkon nasida.”

Godang do na patuduhon pangargaion ala nungnga ro KPP jala patoguhon nasida. Di Amerika Serikat hira-hira 7.000 anggota KPP na mangurupi akka donganna na marsahit. On ma na didok nasida.

  • Didok si Priscilla, “Mauliate ma ala nungnga ro hamu tu rumah sakit mangida bapakku na hona struk. Las do rohana tikki i! Songgot do rohana ala nungnga adong pengaturan sisongon on. Pittor hatop do ibana malum dung ro hamu.”

  • Sahalak borua na marujung ngolu omakna, goarna si Ophilia. Didok ibana, “Tarapul do roha ni omakku tikki ro hamu! Didok ibana, Jahowa do na mambahen hamu asa ro. Mauliate ma tu holongmuna i.”

  • Adong sahalak baoa na marsak jala mandele dung diboto piga-piga ari nai mate do ibana. Sahalak anggota KPP na margoar si James ma na sai mandongani ibana. Jala dibukkahon do sada ayat na disurat di Pilippi 4:​6, 7. Didok si James, “Dung ro au muse, huida dang pala marsak be ibana. Nang pe diboto tokkin nai mate ma ibana, alai pos do rohana tu pangurupion ni Jahowa. Gabe dipatogu do ahu!”

Songon dia do KPP mangurupi?

Adong sahalak borua na marujung ngolu suamina di rumah sakit, goarna si Pauline. Dao do huta ni nasida. Didok ibana, “Mauliate godang ma ala nungnga diurupi hami saleleng on. Alana tikki i massai borat do di keluarganami. Sai ro do hamuna ganup borngin, hape ikkon karejo do hamu marsogotna i. Jala nang pe adong 11 halak hami, boi do hamu mangurupi hami asa denggan modom. Sai didongani hamu do hami. Mauliate ma tu Jahowa dohot organisasina ala nungnga diurupi hami asa boi tarapul.”

Adong tolu halak na kecelakaan, goarna si Nicki, si Gayle, dohot si Robin. Dao muse do jabu ni nasida hira-hira 300 kilometer nai sian i. Sahalak anggota KPP na margoar si Carlos pittor ro do manjuppangi nasida tu rumah sakit. Didok si Carlos, “Hulehon do manang aha pe na porlu tu nasida. Hutiop do biang ni si Nicki asa boi diubati ibana.” Dung i, sahalak anggota na asing na margoar si Curtis pe ro dohot istrina. Piga-piga jom dukkon i ma baru ro keluarga ni na kecelakaan i. Adong sahalak bawa na mandok, “Gabe tarapul do roha ni tolu halak i ala diurupi do nasida. Alai si Robin, anggi ni si Nicki na so Sitindangi, songgot do rohana ala adong KPP mangurupi nasida.”

^ par. 2 “Addressing Patients’ Emotional and Spiritual Needs,” na dipabinsar The Joint Commission Journal on Quality and Patient Safety, Desember 2003, Volume 29, No. 12, halaman 661.

^ par. 3 Songon sittua di huria Sitindangi Ni Jahowa, akka anggota KPP on pe dohot do patoguhon akka dongan, mangajari, jala marhobas di huria. Lomo do roha ni nasida mangurupi, nang pe dang digaji.​—1 Petrus 5:2.