Pintor tu konten

Sitindangi Ni Jahowa

Pillit Hata Batak (Toba)

“Umtabo do on sian Manonton Film”

“Umtabo do on sian Manonton Film”

Ganup taon, diputarhon Sitindangi Ni Jahowa do godang video tingki kebaktian. Mulana bahasa Inggris do sude video i. Alai songon dia ma carana asa boi video i diantusi halak na so mamboto bahasa Inggris? Diterjemahon ma i tu godang bahasa jala direkam ma. Aha do pandapot ni angka halak na manonton video i?

Pandapot ni Halak Taringot Video I

On ma pandapot ni angka halak na so Sitindangi, na ro tu kebaktian di Meksiko dohot Amerika Tengah:

  • “Huantusi do sude na di video i, jala hira na dohot do ahu di film i. Hona hian tu rohangku.”​—Na ro tu kebaktian bahasa Popoluca, di Veracruz, Meksiko.

  • “Hira na di hutangku do huhilala, jala rap mangkatai dohot angka donganku. Umtabo do on sian manonton film. Ala boi do huantusi sude na di video i.”​—Na ro tu kebaktian bahasa Nahuatl, di Nuevo León, Meksiko.

  • “Tingki hutonton video di bahasangku sandiri, hira na langsung mangkatai do halak na di video i tu ahu.”​—Na ro tu kebaktian bahasa Chol, di Tabasco, Meksiko.

  • “Burju do organisasi on mangurupi halak marsiajar di bahasa na diantusi angka halak. Ndang adong organisasi na asing na songon on.”​—Na ro tu kebaktian bahasa Cakchiquel, di Sololá, Guatemala.

Ndang halak na profesional na dipangke Sitindangi Ni Jahowa laho mangarekam dohot mangisi soara tu video i. Jala somalna di huta-huta do i direkam. Jadi, songon dia ma cara ni nasida mangulahon i?

“Ulaon na Mansai Denggan”

Piga-piga taon na parpudi on, diatur kantor cabang Sitindangi Ni Jahowa na di Amerika Tengah do asa dibahen video kebaktian i tu bahasa Spanyol dohot 38 bahasa daerah disi. Hira-hira 2.500 ma halak na dohot mangurupi. Adong do tim na laho menerjemahon dohot mangarekam video i di kantor cabang, kantor penerjemahan dohot di studio sementara. Jala dibahen do on di lobi sian 20 inganan, songon di Belize, Guatemala, Honduras, Meksiko, dohot Panama.

Rekaman di Kantor Cabang di Amerika Tengah

Ndang mura laho mambahen studio sementara. Ingkon dipangke nasida do bahan na adong disi songon salimut dohot tilam, laho manutup ruangan i asa unang tarbege soara sian luar.

Halak na pogos do godangan na dohot mangisi suara i. Ingkon berjuang do nasida asa boi ro tu studio i. Adong na ro sian inganan na dao, 14 jom ma nasida di dalan asa sahat tu studio i. Adong do sahalak ama dohot anakna ingkon mardalan pat saleleng ualu jom.

Sian na gelleng, nunga dohot si Naomi mangurupi keluargana laho mambahen studio rekaman. Ibana mandok, “Sai dipaima-ima hami do andigan muse laho rekaman. Semangat do bapak laho mambahen studio i. Hea do omak mangalompa sipanganon tu 30 halak relawan.” Saonari, si Naomi nunga gabe relawan di kantor penerjemahan di Meksiko. Didok ibana, “Las hian do rohangku boi mangurupi angka halak marsiajar Bibel di bahasa ni nasida. Ulaon na mansai denggan do on di ahu.”

Ganup taon, dibahen Sitindangi Ni Jahowa do kebaktian di liat portibi on. Jala sude do halak boi ro tu kebaktian i. Laho mamboto hatorangan taringot i, ida ma di bagian KEBAKTIAN.