Pintor tu konten

Sitindangi Ni Jahowa

Pillit Hata Batak (Toba)

Pamatehon Api

Pamatehon Api

Tingki i, mangan ma si Sandra di jabu ni simatuana. Dung i, dibereng ibana ma adong api kaluar sian toru ni pintu ni gudang na di lambung ni jabu i. Pintor didok ibana ma, “Kebakaran! Kebakaran!”. Pintor hatop ma si Sandra dohot si Thomas suamina marlojong. Dibuat si Sandra ma alat pemadam api, dipareso suamina ma aha na masa. Pintor dilehon si Sandra ma alat pemadam api tu si Thomas, jala dipangke ma i laho pamatehon api i. Didok si Sandra, “Molo ndang hatop hian dipamate hami api i, nga tarbakar be sude isi ni gudang i.”

Boasa ndang panik si Thomas dohot si Sandra tingki i? Alana, tingki di kantor cabang na di Selters, Jerman, dilatik do nasida dohot 1.000 relawan. Jala dipaboa do tu nasida aha do na ingkon diulahon molo masa kebakaran.

Bolak ni kantor cabang on 30 hektar. Disi adong kantor dohot inganan ni angka relawan. Alai, asing ni i adong do muse disi laundry, percetakan, dohot inganan karejo na asing. Sudena on mura do tarbakar. Alani i, dibahen Departemen Keselamatan dan Lingkungan sian kantor cabang ma sada pelatihan. Pelatihan on taringot aha do na ingkon diulahon molo masa kebakaran. Na parjolo, Tim Respon Darurat nunga dilatik dinas pemadam kebakaran na adong disi. Dung i, sude ma relawan na adong di kantor cabang dilatik asa mamboto:

  • Cara evakuasi manang menghindari api.

  • Songon dia asa unang masa kebakaran.

  • Songon dia pamatehon api asa unang lam balga.

Jadi, diboto angka relawan i ma aha na ingkon diulahon molo tompu masa kebakaran.

Pelatihan Cara na Aman laho Pamatehon Api

Tingki pelatihan diparsiajari angka relawan on do songon dia asa aman tingki pamatehon api. Adong sahalak relawan, goarna si Christin. Tingki SD ma parpudi sahali ibana mamparsiajari on. Jadi, dipaboa ibana ma taringot pelatihan di kantor cabang on, “Hubuat ma alat pemadam api i, hubungka kuncina. Jala molo mangullus alogo tu arah barat, tu arah barat ma husemprot apina. Asa unang gabe hona api bohingku. Sahalangku do mangulahon on! Jala huparsiajari do songon dia kerjasama raphon na asing laho pamatehon api, misalna molo adong opat manang lima halak hami.”

Pelatih ni pencegah kebakaran i, i ma si Daniel na karejo di kantor cabang. Didok ibana, “Pelatihan on boi mangurupi nasida asa unang pabiarhu tu api.” Didok ibana muse, “Molo adong kebakaran, somalna pintor tarsonggot jala panik do angka halak. Didok roha ni nasida do, ‘Boha nama on? Songon dia do cara mamangke alat pemadam api on?’ Alai, molo nga diboto nasida aha na ingkon diulahon, boi ma hatop dipamate api i asa unang lam balga.” Tingki pelatihan i didok ibana, “Dilatik do angka halak songon dia cara na denggan maniop jala mamangke alat pemadam i tingki adong api. Jala songon dia laho pamatehon api. Ujungna, ndang panik be nasida jala gabe barani pamatehon api tingki adong kebakaran.”

Adong do Labana

Godang do na las rohana ala dohot tu pelatihan on. Si Christin naung dipaboa nangkin mandok, “On dope hea hupangke alat pemadam. Huhilala porlu do sude halak dohot tu pelatihan songon on.” Adong muse sahalak parkarejo paruh waktu di kantor cabang jala karejo di bandara, goarna si Nadja. Didok ibana, “Nunga lobi sampulu taon ahu diajari sisongon on di bandara. Alai holan teori do. Molo di pelatihan na di kantor cabang on, adong do praktekna. Jadi saonari molo adong pe kebakaran, nga huboto aha na ingkon huulahon.”

Didok si Sandra, ala dohot tu pelatihan di kantor cabang i, gabe diboto ibana ma aha na ingkon diulahon tingki kebakaran jabu ni simatuana. Didok ibana muse, “Ndang bingung be ahu laho mamangke alat pemadam i. Jadi, adong do labana ala dohot ahu tu pelatihan i ganup taon.”

Marlatik raphon Dinas Pemadam Kebakaran

Nunga somal dinas pemadam kebakaran di inganan i mambahen pelatihan di Kantor Cabang. Kepala dinas pemadam kebakaran, i ma si Theo Neckermann. Didok ibana, “Hami martanggung jawab di daerah Selters, di luar kota. Jadi somalna angka jabu dohot apartemen do na kebakaran. Alai molo di Kantor Cabang on bolak do, balga-balga bangunanna, jala godang do angka ulaon parkarejoan dison. Jadi godang nai dope na porlu diparsiajari hami taringot inganan on, asa boi denggan hami mangurupi molo masa kebakaran. Las do rohanami mambahen pelatihan dison.”

Adong lobi sian 100 anggota Tim Respon Darurat di Kantor Cabang na dohot tu pelatihan on. Didok si Neckermann, “Dipujihon hami do Tim Respon Daruratmuna. Alani nasida do gabe denggan pelatihan on diulahon.”

Pemadam kebakaran patuduhon molo adong api alani bahan bakar cair, ndang boi aek pamatehon i

Nunga hea Tim Respon Darurat on mangadopi kebakaran. Di tingki botari di bulan Februari 2014, adong ma sada kamar di Kantor Cabang na terbakar. Si Daniel na dipaboa nangkin mandok, “Godang hian do asap tingki i, sampe tanganku sandiri pe ndang boi be huida! Pintor ditelepon hami ma pemadam kebakaran. Adong 88 kamar disi, jadi disuru hami ma kaluar angka halak sian sude kamar i. Tingki ro pemadam kebakaran, ndang adong be halak di bangunan i.” Didok si Neckermann ma, “Ndang hurimpu, boi do hatop ditadingkon hamu bangunan na balga songon i. On dope hea huida sisongon on di kota Frankfurt. Disiplin do hamuna sude, jala Tim Respon Daruratmuna pe mantap do!” Pintor dipamate pemadam kebakaran ma apina. Ndang adong na luka, jala nang pe adong na sega bangunan i, alai ndang pala parah.

Marsitutu do sude halak na di kantor cabang Selters manjaga asa unang be masa kebakaran. Alai molo masa pe, nunga rade be nasida ala nunga diparsiajari songon dia cara pamatehon api.