Mangihuthon Bibel do pandapot dohot ulaon na dibahen hami tu na mate, i ma:

  • Ndang sala marhabot ni roha molo mate na tahaholongi. Marhabot ni roha do sisean ni Jesus tingki mate na dihaholongi nasida. (Johannes 11:33-35, 38; Ulaon ni Apostel 8:2; 9:39) Alani i, ndang dibahen hami hira na marpesta ulaon tu na mate. (Parjamita 3:1, 4; 7:1-4) Alai, i ma tingkina laho patuduhon na sapangkilalaan do hami.Rom 12:15.

  • Ndang diboto halak na mate be agia aha. Manang sian dia pe haroronami, dipasiding hami do angka ulaon na so sian Bibel na mandok mangolu dope tondi ni na mate jala mangkorhon tu halak na mangolu. (Parjamita 9:5, 6, 10) Dohot ma i ulaon borngin pandungoi, pesta manang parningotan tu na mate, mangalehon pelean tu na mate, mangkatahatai manang manungkun tu na mate dohot mambahen ulaon adat tu na mabalu. Dipasiding hami do angka ulaon sisongon i mangihuthon parenta ni Bibel na mandok, ”Ruar ma hamu, . . . unang ma jama hamu na ramun.”2 Korint 6:17.

  • Adong do pangkirimon tu na mate. Dipaboa di Bibel, adong do haheheon tu halak na mate jala ndang adong be hamatean di ari na naeng ro. (Ulaon ni Apostel 24:15; Pangungkapon 21:4) Alani pangkirimon i, ndang marlungun ni roha be hami songon halak na so marpangkirimon, on ma na diulahon halak Kristen na mulamula.1 Tessalonik 4:13.

  • Dijujui Bibel do hita asa marserep ni roha. (Poda 11:2) Ndang dibahen hami ulaon tu halak na mate laho patuduhon hamoraon. (1 Johannes 2:16) Ndang olo hami mambahen ulaon tu na mate mardongan angka musik manang mambahen batang ni na mate na mansai arga asa sangap diida halak.

  • Ndang olo hami mamaksahon pandapotnami tu na asing taringot ulaon tu na mate. Diihuthon hami do prinsip na mandok, ”Asa ganup hita on, alusanta do Debata taringot tu dirinta be.” (Rom 14:12) Alai, molo adong na manungkun taringot i, olo do hami patorangkon, ”mardongan lambok ni roha.”1 Petrus 3:15

Songon dia do ulaon na dibahen Sitindangi Ni Jahowa tu na mate?

Inganan: Molo porlu dibahen ulaon on, keluarga i do na mamillit inganan i laho dibahen di Bale Harajaon, di rumah sosial, di jabunasida sandiri, di inganan kremasi, manang di kuburan i.

Ulaonna: Adong jamita laho mangalehon apulapul na patorangkon boha do didok Bibel taringot hamatean dohot pangkirimon haheheon. (Johannes 11:25; Rom 5:12; 2 Petrus 3:13) Dipaboa do di ulaon i taringot jujur ngolu dohot angka na denggan sian halak na mate i na boi gabe sitiruon tu na asing.—2 Samuel 1:17-27.

Adong do muse ende na marojahan tu Bibel. (Kolosse 3:16) Dipaujung ma ulaon i marhite tangiang na patoguhon roha.Pilippi 4:6, 7.

Iuran: Ndang adong iuran na ingkon digarar ruasnami na mangulahon ulaon tu na mate, dos songon parpunguannami na so mardurungdurung.Mateus 10:8.

Na ro tu ulaon i: Boi do na so Sitindangi Ni Jahowa ro tu ulaon i nang pe di Bale Harajaon dibahen. Dos songon parpunguannami, sude do boi ro.

Boi do Sitindangi ro tu ulaon tu na mate na dibahen agama na asing?

Ganup Sitindangi boi mamillit laho ro manang ndang, hombar tu panggora ni rohana be. (1 Timoteus 1:19) Alai, ndang parsidohot hami tu ulaon na maralo tu prinsip ni Bibel.2 Korint 6:14-17.