Ndang marulang tahun Sitindangi Ni Jahowa, ala ndang lomo roha ni Debata tu ulaon i. Nang pe ndang adong ayat ni Bibel na mangorai hita mangulahon i, alai adong do pigapiga hatorangan na boi mangurupi hita mangantusi songon dia pangkilalaan ni Debata tu ulaon i. Taparrohahon ma opat hatorangan on dohot prinsip ni Bibel na hombar tusi.

  1. Marharoroan sian hasomalan ni sipelebegu do ulang tahun. Buku Funk & Wagnalls Standard Dictionary of Folklore, Mythology, and Legend patorangkon, hasomalan marulang tahun dibahen alana porsea do halak najolo, ”adong tondi na jahat na boi mangganggu halak na marulang tahun i”. Alani i, molo ro angka donganna mandok ”selamat ulang tahun”, boi do i padaohon ibana sian tondi na jahat i. Buku The Lore of Birthdays mandok, najolo ringkot do ari hatutubu laho mangida nasib ni sasahalak. Didok buku i muse, margogo do lilin ulang tahun pasauthon sangkap ni roha ni halak na marulang tahun.

    Alai di Bibel, diburai do halak na mangulahon ulaon hadatuon, hasipelebeguon, spritisme manang ”angka na suman tusi.” (5 Musa 18:14; Galatia 5:19-21) Jala diuhum Debata pe halak Babel, ala somal do nasida manilik bintang, i ma hasomalan laho mamboto ari na naeng ro. (Jesaya 47:11-15) Ndang sai disulingkiti Sitindangi Ni Jahowa haroro ni sude hasomalan. Alai, molo adong tudutudu sian Bibel taringot sada ulaon, diihuthon hami do i.

  2. Ndang marulang tahun halak Kristen na parjolo. The World Book Encyclopedia mandok, ”diboto halak Kristen na parjolo do, molo marulang tahun hasomalan ni halak sipelebegu.” Halak Kristen saonari on ingkon maniru angka apostel dohot halak Kristen na marsiajar sian Jesus.2 Tessalonik 3:6.

  3. Parningotan ari hamamate ni Jesus do na sai diulahon halak Kristen na parjolo, ndang ari hatutubuna. (Lukas 22:17-20) Ndang songgot rohanta disi, alana Bibel pe mandok, ”dumenggan do ari hamatean ni jolma sian ari hatutubuna.” (Parjamita 7:1) Di ujung ngolu ni Jesus di portibi on, diulahon Jesus do lomo ni roha ni Debata, i do na mambahen rumingkot ari hamamatena sian ari hatutubuna.Heber 1:4.

  4. Ndang adong dipaboa di Bibel sisomba Debata marulang tahun. Adong dua pesta ulang tahun na disurat di Bibel. Alai ndang sisomba Debata na mangulahon i. Alani i, ndang denggan taihuthon ulaon i.1 Musa 40:20-22; Markus 6:21-29.

Lungun do roha ni ianakhon ni Sitindangi Ni Jahowa ala ndang marulang tahun?

Songon natuatua na asing, dipatudu Sitindangi Ni Jahowa do holongna tu ianakhonna. Dilehon nasida do hadiah jala rap marpungu do nasida dohot ianakhonna manang sadihari pe. Ditiru nasida do Debata Jahowa na jotjot patuduhon holongna. (Mateus 7:11) Alani i, ndang gabe lungun roha ni ianakhon ni Sitindangi Ni Jahowa, taida ma komentar na di toru on:

  • ”Las hian rohangku molo tompu mandapot hadiah.”—Si Tammy, 12 taon.

  • ”Nang pe ndang dilehon natuatuangku hadiah di ari ulangtahunku, alai dilehon nasida do di ari na asing. Lomo do rohangku songon i, tompu mandapot hadiah.”— Si Gregory, 11 taon.

  • ”Molo holan sampulu minut do, i pe holan mangallang kue dohot marende ulang tahun, ndang pesta i. Ro ma tu jabungku, asa diboto hamu pesta na sasintongna!”—Si Erik, 6 taon.