Pintor tu konten

Pintor tu menu namangihut

Sitindangi Ni Jahowa

Batak (Toba)

Boasa Sitindangi Ni Jahowa Ndang Manjalo Mudar Marhite Transfusi?

Boasa Sitindangi Ni Jahowa Ndang Manjalo Mudar Marhite Transfusi?

Pandapot ni godangan halak

Nasida mandok: Ndang porsea Sitindangi Ni Jahowa tu perawatan medis.

Na Sasintongna: Dijalo hami do perawatan medis ala dihaholongi hami do dirinami dohot keluarganami. Tingki marsahit, laho do hami tu dokter na olo mangubati dohot mangoperasi, alai ndang mamangke mudar. Diargai hami do perawatan medis na lam maju. Sasintongna, ndang holan Sitindangi Ni Jahowa be na so manjalo mudar marhite transfusi. Di godang negara, boi do angka pasien mamillit asa unang manjalo mudar marhite transfusi. Ndang olo nasida hona jea alani transfusi. Umpamana, alani hasalaan ni jolma gabe hona sahit tingki transfusi, manang gabe mura marsahit.

Nasida mandok: Porsea do Sitindangi Ni Jahowa molo haporseaon boi pamalumhon sahit.

Na Sasintongna: Ndang porsea hami molo sahit boi malum alani haporseaon.

Nasida mandok: Umarga do molo marubat ndang mamangke transfusi.

Na Sasintongna: Ummura do molo marubat ndang mamangke mudar. *

Nasida mandok: Ganup taon, godang do Sitindangi, dohot ma i angka dakdanak mate ala ndang olo manjalo mudar marhite transfusi.

Na Sasintongna: Hata on ndang toho. Godang do ahli bedah na so mamangke mudar tingki mangulahon operasi jantung, operasi ortopedis, dohot transplantasi organ. * Boi do malum angka pasien na so manjalo mudar marhite transfusi. Sipata, umhatop do malum nasida sian na manjalo transfusi. * Ndang boi tadok molo halak na so manjalo transfusi gabe mate, manang halak na manjalo transfusi gabe malum.

Boasa Sitindangi Ni Jahowa ndang manjalo mudar marhite transfusi?

Alani haporseaonnami do. Tangkas do didok di Padan na Robi dohot Padan na Imbaru, asa unang manjalo mudar. (1 Musa 9:4; 3 Musa 17:10; 5 Musa 12:23; Ulaon ni Apostel 15:28, 29) Jala, mudar i manggombarhon hangoluan do di adopan ni Debata. (3 Musa 17:14) Alani i, ndang dijalo hami mudar alana diargai hami do Debata na mangalehon hangoluan.

Pandapot naung muba

Boi do denggan operasi diulahon, nang pe ndang mamangke mudar

Hea do didok angka dokter molo parubatan na so manjalo mudar marhite transfusi, i ma parubatan na pamatehon halak. Alai, dung pigapiga taon, nunga muba be pandapot on. Umpamana, di taon 2004, sada artikel taringot medis mandok, ”Parubatan na dipangke tu Sitindangi Ni Jahowa, gabe sitiruon laho dipangke di pigapiga taon na naeng ro.” * Di taon 2010, sada artikel sian jurnal Heart, Lung and Circulation patorangkon molo ”operasi na so mamangke mudar, ndang holan tu Sitindangi Ni Jahowa be diulahon. Alai, boi do on dipangke tu na asing, tarlumobi tingki adong operasi.”

Marribu dokter di liat portibi on nunga mamangke isara na asing tingki operasi, alai ndang mamangke mudar. Parubatan na so mamangke mudar nunga diulahon di godang negara na berkembang jala nunga godang halak na manjalo parubatan on, nang pe so Sitindangi Ni Jahowa nasida.”

^ par. 8 Ida ma Transfusion and Apheresis Science, Volume 33, No. 3, alm. 349.

^ par. 10 Ida ma The Journal of Thoracic and Cardiovascular Surgery, Volume 134, No. 2, alm. 287-288; Texas Heart Institute Journal, Volume 38, No. 5, alm. 563; Basics of Blood Management, alm. 2; dohot Continuing Education in Anaesthesia, Critical Care & Pain, Volume 4, No. 2, alm. 39.

^ par. 10 Ida ma The Journal of Thoracic and Cardiovascular Surgery, Volume 89, No. 6, alm. 918; dohot Heart, Lung and Circulation, Volume 19, alm. 658.

^ par. 14 Continuing Education in Anaesthesia, Critical Care & Pain, Volume 4, No. 2, alaman 39.