Pintor tu konten

Pintor tu menu namangihut

Sitindangi Ni Jahowa

Batak (Toba)

Boi do Sitindangi Ni Jahowa Parsidohot tu Punguan ni Angka Agama?

Boi do Sitindangi Ni Jahowa Parsidohot tu Punguan ni Angka Agama?

Las do rohanami mangkatahatai taringot haporseaon tu angka halak sian sude agama. Alai, ndang boi hami parsidohot tu punguan ni angka agama. Didok do di Bibel, halak Kristen na sintong ingkon ”dipadomu jala martomu”. Asa boi mangulahon i, ingkon sada do na dihaporseai nasida. (Epesus 4:​16; 1 Korint 1:​10; Pilippi 2:2) On ndang holan satolop tu lapatan ni holong, marasi ni roha, dohot manalpuhon hasalaan. Alai, haporseaonnami ingkon marojahan tu parbinotoan na sintong sian Bibel. Molo ndang, marisuang do haporseaonnami.​—Rom 10:​2, 3.

Didok di Bibel, molo parsidohot hita tu angka ulaon ni agama na asing, gabe songon na saauga ma hita dohot nasida jala on boi manegai haporseaonta. (2 Korint 6:​14-​17) Alani i, dipasingot Jesus do angka siseanna asa unang parsidohot tu punguan ni angka agama. (Mateus 12:30; Johannes 14:6) Jala Patik ni Debata marhite si Musa, mangorai bangso Israel najolo asa unang mangulahon panombaon raphon bangso na asing. (2 Musa 34:11-​14) Angka halak Israel na marsihohot, ndang olo manjalo pangurupion sian bangso na asing ala boi mambahen ramun panombaon ni nasida.​—Esra 4:​1-3.

Boi do Sitindangi Ni Jahowa mangkatahatai tu angka halak sian agama na asing?

Boi. Sasintongna, di taon 2017 adong 2.046.000.202 jom na dipangke hami laho mangkatahatai tu angka halak sian agama na asing. Songon apostel Paulus, las do rohanami mamboto taringot tu haporseaon dohot pamingkirion ni ”tumorop” halak di tingki marbarita. (1 Korint 9:​19-​22) Saleleng mangkatahatai, marsitutu do hami mangulahon poda sian Bibel, na ingkon patuduhon ”roha na hormat” tu ganup halak.​—1 Petrus 3:​15, Bibel siganup ari.