Tutu do, Sitindangi Ni Jahowa halak Kristen, alai hami ndang Protestan. Boasa boi songon i?

Protestan, i ma ”agama na mangalo Rom Katolik”. Nang pe ndang satolop Sitindangi Ni Jahowa tu ajaran ni Katolik, alai adong do na mambahen hami marimbar sian Protestan, i ma:

  1. Adong do ajaran ni Protestan na maralo tu ajaran ni Bibel. Umpamana, di Bibel ndang adong dipaboa taringot Debata sitolusada, alai Bibel mangajarhon ”sada do Debata”. (1 Timoteus 2:5; Johannes 14:28) Jala tangkas do didok di Bibel molo Debata ndang pasiaksiakhon parjahat di api na roko, alai diripashon salelengna.—Psalmen 37:9; 2 Tessalonik 1:9.

  2. Ndang hea hami mangalo Gereja Katolik manang agama na asing. Alai, las do rohanami mamaritahon barita na uli taringot Harajaon ni Debata jala marsitutu do hami mangurupi na asing asa porsea nasida tu barita i. (Mateus 24:14; 28:19, 20) Ndang olo hami mangalo agama na dia pe, alai hami mangajarhon hasintongan taringot Bibel dohot Debata tu halak na olo marsiajar.—Kolosse 1:9, 10; 2 Timoteus 2:24, 25.