Pintor tu konten

Pintor tu menu namangihut

Sitindangi Ni Jahowa

Batak (Toba)

Aha do Pandapot ni Sitindangi Ni Jahowa taringot Sains?

Aha do Pandapot ni Sitindangi Ni Jahowa taringot Sains?

Diargai hami do parbinotoan dohot angka penemuan sains naung adong buktina.

”Sains, i ma parbinotoan naung disulingkiti taringot alam semesta jala didapot sian penelitian.” (Kamus Besar Bahasa Indonesia) Nang pe Bibel ndang buku taringot sains, alai Bibel mangurupi halak asa mamboto taringot alam jala mandapot laba sian angka penemuan sains. Pingkirhon ma pigapiga contohna:

  • Astronomi: ”Manaili ma matamuna dompak ginjang, jala ida hamu, tung ise ma na manompa angka i? Tung ise ma paruar parangannasida marbilangan? Ibana tahe manjou luhutna i di goarna be.”​—Jesaya 40:26.

  • Biologi: ”Diboto huhut torsahononna taringot tu angka hau, sian hau Ares na di Libanon ro di Ysop (limutlimut) na tubu di dorpi; ditorsahon huhut taringot tu angka pahanpahanan, taringot tu angka pidong, taringot tu angka gulokgulok dohot taringot tu angka dengke.”​—1 Rajaraja 5:13.

  • Kesehatan: ”Gabe dialusi Jesus ma nasida: Apala ringkot pandaoni di angka na hisar, di angka na marsahit do!”​—Lukas 5:​31.

  • Meteorologi: ”Nunga tung sahat ho huroha ro di parpeopan ni ambolas na lamot? Jala nunga tung diida ho huroha parpeopan ni ambolas hian? . . .  Didia do dalan parsirangan ni hatiuron dohot parserahan ni alogo sian habinsaran tu tano on?”​—Job 38:22-​24.

Di sijahaonnami pe, adong do diparade artikel taringot sains dohot angka penemuan sains. Angka natuatua Sitindangi pe manjujui ianakhonna asa lam mangantusi taringot na adong di humaliangna. Godang do angka Sitindangi Ni Jahowa na karejo di bagian sains, umpamana biokimia, matematika, dohot fisika.

Na so boi dipatorang sains

Diboto hami do ndang boi sains mangalusi sude sungkunsungkun taringot parngoluon on. * Umpamana, ahli geologi manulingkiti taringot aha na dipangke laho mambahen tano on, jala ahli biologi manulingkiti songon dia proses na adong di pamatangta. Alai, boasa ma holan di tano on adong hangoluan, jala boasa mansai taratur proses na adong di pamatangta?

Porsea do hami molo Bibel boi mangalusi sungkunsungkun i. (Psalmen 139:13-​16; Jesaya 45:18) Alani i, diparsiajari hami do Bibel dohot sains asa boi mandapot parbinotoan na denggan.

Ala adong na hurang mangantusi ajaran ni Bibel, sipata gabe songon na maralo do sains tu Bibel. Umpamana, Bibel ndang mangajarhon molo tano on ditompa saleleng 6 ari (6 hali 24 jom).​—1 Musa 1:1; 2:4.

Adong do pigapiga hatorangan ni sains na so terbukti jala ndang olo pigapiga ilmuwan manjalo hatorangan i. Umpamana, pigapiga ahli biologi, ahli kimia, dohot na asing mandok, hangoluanta adong ndang alani evolusi (marhite seleksi alam dohot mutasi acak). Boasa didok nasida songon i? Alana, alam semesta on patuduhon adong proses na mansai denggan na dibahen jala porsea do hami disi.

^ par. 10 Si Erwin Schrödinger, sahalak ahli fisika sian Austria jala na hea mandapot penghargaan Nobel mandok, sains ”ndang mangulas . . . taringot angka na rumingkot di parngoluon”. Asing ni i, si Albert Einstein mandok, ”Sitaonon na masa di ngolunta mambahen hita mangantusi ndang sude parsoalan boi dipasae marhite sains manang ilmu pengetahuan.”