Pintor tu konten

Pintor tu menu namangihut

Sitindangi Ni Jahowa

Batak (Toba)

Boasa Sitindangi Ni Jahowa Ndang Parsidohot tu Ulaon Politik?

Boasa Sitindangi Ni Jahowa Ndang Parsidohot tu Ulaon Politik?

Alani haporseaon na marojahan sian Bibel, ndang parsidohot Sitindangi Ni Jahowa tu ulaon politik. Ndang olo hami manogihon jolma asa mamillit partai politik manang calon pejabat, ndang olo hami gabe pejabat, jala ndang olo hami demon. Porsea do hami adong hatorangan sian Bibel taringot on.

  • Diihuthon hami do sitiruon na nilehon ni Jesus, na so olo gabe pejabat politik. (Johannes 6:15) Diajari ibana do angka siseanna molo nasida ”ndang sian portibi on”, na patuduhon molo angka siseanna, ndang boi parsidohot tu ulaon politik.—Johannes 17:14, 16; 18:36; Markus 12:13-17.

  • Marsihohot do hami tu Harajaon ni Debata, songon na dipatorang Jesus tingki mandok, ”Laos baritahononhon do barita na uli on na taringot tu Harajaon i di liat portibi on.” (Mateus 24:14) Hami mangkatindangkon Harajaon ni Debata jala paboahon taringot Harajaon i. Alani i, hami ndang parsidohot tu ulaon politik bangso na dia pe, dohot ma i di inganannami tading.—2 Korint 5:20; Epesus 6:20.

  • Ala ndang parsidohot tu ulaon politik, on gabe ndang mangambati hami mangkatai taringot Harajaon ni Debata, ndang soal songon dia pandapot ni nasida tu politik. Sian pangkataion dohot parniulaonnami, dipatudu hami do molo hami mangasahon Harajaon ni Debata na laho pasaehon sude sitaonon di portibi on.—Psalmen 56:12.

  • Dipasiding hami do parbadaan alani politik. On mambahen hami marsada ni roha dohot dongan sahaporseaon di liat portibi on. (Kolosse 3:14; 1 Petrus 2:17) Alai, agama na parsidohot tu ulaon politik, mambahen ruasna ndang marsada ni roha.—1 Korint 1:10.

Mangargai pamarenta. Nang pe hami ndang parsidohot tu ulaon politik, diargai hami do hak ni pamarenta didia pe hami maringanan. On hombar tu parenta na disurat di Bibel, ”Unduk ma ganup di panggomgomi na marsahala.” (Rom 13:1) Dioloi hami do uhum, digarar hami do pajak, jala satolop tu pamarenta na mambahen denggan parngoluon ni masyarakat. Ndang dohot hami demon laho mangganti pamarenta, alai diihuthon hami do poda ni Bibel asa manangiangkon ”angka raja dohot saluhut parhuaso,” tarlumobi tingki nasida mambahen haputusan na mangkorhon tu panombaon.—1 Timoteus 2:1, 2.

Diargai hami do muse hak ni na asing laho mambahen haputusan taringot politik. Umpamana, hami ndang manggugai pemilihan umum manang mangelaela na asing asa unang mamillit partai politik.

Di pudian ni ari on pe hami mangulahon songon on? Ndang. Angka apostel dohot halak Kristen di abad na parjolo mangulahon na sarupa. Buku Beyond Good Intentions mandok, ”Nang pe diboto nasida ingkon unduk tu pamarenta, alai halak Kristen di abad na parjolo ndang parsidohot tu ulaon politik.” Songon i nang buku On the Road to Civilization na mandok molo halak Kristen di abad na parjolo ”ndang olo gabe pejabat politik”.

Ala ndang parsidohot hami tu ulaon politik, ganggu do keamanan ni negara? Ndang. Hami warga negara na mangkalomohon asa dame, jala pamarenta pe ndang porlu mabiar tu hami. Parrohahon ma laporan taon 2001 sian National Academy of Sciences of Ukraine. Tingki patorangkon taringot hami na so parsidohot tu ulaon politik, laporan i mandok, ”Saonari, torop do halak na so marlomo ni roha tu haputusan ni Sitindangi Ni Jahowa; i do alana gabe sogo roha ni rezim Nazi dohot Komunis di tingki naung salpu.” Alai, nang pe nasida dihasogohon di Soviet, angka Sitindangi tongtong do ”warga negara na mangoloi uhum. Denggan do parange ni nasida jala ndang mangkaringkothon diri tingki karejo di ladang manang di pabrik. Sasintongna, nasida ndang mangganggu rezim Komunis”. Songon i ma nang saonari, haporseaon dohot ulaon ni Sitindangi Ni Jahowa ”ndang mangganggu manang manggunturi bangso na dia pe”, songon na dipaboa di ujung ni laporan i.