Pintor tu konten

Sitindangi Ni Jahowa

Pillit Hata Batak (Toba)

Olo do Sitindangi Ni Jahowa Mangalehon Pangurupion Tingki Adong Mara?

Olo do Sitindangi Ni Jahowa Mangalehon Pangurupion Tingki Adong Mara?

Olo. Jotjot do Sitindangi Ni Jahowa mangalehon pangurupion tingki adong mara. Dilehon hami do pangurupion tu sude halak, tu Sitindangi Ni Jahowa dohot na so Sitindangi Ni Jahowa. Diihuthon hami do parenta ni Bibel di Galatia 6:10 na mandok, ”Taulahon ma na denggan di saluhut halak, alai gumodang ma tu donganta sahaporseaon.” Dilehon hami do pangurupion di partondion jala diapuli hami do roha ni angka na hona mara.—2 Korint 1:3, 4.

Isara laho Mangurupi

Molo masa mara di sada luat, angka sintua di inganan i ingkon manungkun situasi ni angka Sitindangi na adong disi. Jala paradeon ni nasida ma pangurupion na dihaporluhon. Angka sintua pe ingkon paboahon pangurupion naung diparade nasida dohot hatorangan na imbaru tu kantor cabang ni Sitindangi Ni Jahowa.

Molo ndang boi nasida paradehon pangurupion, dipaboa ma tu Punguan na Mangaradoti Organisasi, asa diparade pangurupion. Dos ma on songon na diulahon halak Kristen di abad na parjolo tingki masa haleon. (1 Korint 16:1-4) Disuru kantor cabang na adong di luat i ma Punguan na Mangurupi na Hona Mara, asa mangalehon pangurupion.Angka Sitindangi sian luat na asing pe, boi mangalehon gogo dohot tingki laho mangurupi angka halak na hona mara.—Poda 17:17

Mangaradoti Sumbangan

Angka sumbangan na dilehon tu kantor cabang dipangke tu godang ulaon, dohot ma i mangalehon pangurupion tu na hona mara. (Ulaon ni Apostel 11:27-30; 2 Korint 8:13-15) Ala sude na mangurupi ndang digaji, sude sumbangan i dipangke holan tu na hona mara. Manat jala denggan do hami mamangke sude sumbangan na dilehon.—2 Korint 8:20.