Pintor tu konten

Sitindangi Ni Jahowa

Pillit Hata Batak (Toba)

Aha do na Dihaporseai Sitindangi Ni Jahowa?

Aha do na Dihaporseai Sitindangi Ni Jahowa?

Marsitutu do Sitindangi Ni Jahowa mangihuthon na diajarhon Jesus dohot na diulahon angka apostelna. Di artikel on, dipaboa ma pigapiga na dihaporseai nasida.

  1. Debata. Hami manomba Debata na sintong, Sipanompa Natumimbul na margoar Jahowa. (Psalmen 83:19; Pangungkapon 4:​11) Ibana do Debata ni si Abraham, si Musa dohot Jesus.​—2 Musa 3:6; 32:11; Johannes 20:17.

  2. Bibel. Porsea do hami na sinihathon ni Debata do Bibel. (Johannes 17:17; 2 Timoteus 3:​16) Haporseaonnami marojahan tu 66 buku na adong di ”Padan na Robi” dohot ”Padan na Imbaru”. Tingki paboahon taringot Sitindangi Ni Jahowa, Profesor Jason D. manurat, ”Marojahan tu Bibel do haporseaon dohot hasomalan ni nasida, ndang manimbil agia otik. Manang, boi ma dohonon jolo manat do disulingkiti nasida isi ni Bibel.” *

    Nang pe dihaporseai hami sude isi ni Bibel, alai ndang sude ayat ni Bibel hulapati hami pas songon na tarsurat i, alana adong do pigapiga ayat ni Bibel na patuduhon sada gombaran manang tudosan.​—Pangungkapon 1:1.

  3. Jesus. Diihuthon hami do ajaran dohot sitiruon na binahen ni Jesus Kristus. Porsea do hami molo ibana Sipalua jala Anak ni Debata. (Mateus 20:28; Ulaon ni Apostel 5:​31) Alani i, Kristen do hami. (Ulaon ni Apostel 11:26) Alai, nunga disulingkiti hami sian Bibel, ndang Debata Natumimbul Jesus jala ndang adong ayat ni Bibel na patuduhon adong Debata Sitolusada.​—Johannes 14:28.

  4. Harajaon ni Debata. Sada pamarentaon di surgo, ndang na di bagasan roha. Harajaon i ma na laho manggantihon pamarentaon ni jolma jala na laho pasauthon sangkap ni Debata tu tano on. (Daniel 2:​44; Mateus 6:​9, 10) Ndang sadia leleng nai masa ma i, surirang di Bibel patuduhon hita nunga mangolu di ”tingki parpudi.”​—2 Timoteus 3:​1-5; Mateus 24:​3-​14.

    Jesus ma Raja ni Harajaon ni Debata. Nunga mamarenta ibana mulai sian taon 1914.​—Pangungkapon 11:15.

  5. Haluaon. Holan marhite tobusan ni Jesus do hita boi malua sian dosa dohot hamatean. (Mateus 20:28; Ulaon ni Apostel 4:​12) Asa mandapot laba sian tobusan i, ndang sae holan porsea sambing tu Jesus. Ingkon mambahen hamubaon do sasahalak jala tardidi. (Mateus 28:19, 20; Johannes 3:​16; Ulaon ni Apostel 3:​19, 20) Ingkon dipatuduhon do na mangolu haporseaonna. (Jakobus 2:​24, 26) Alai, ”asi ni roha ni Debata” do haluaon i, ndang upa ni halojaonta.​—Galatia 2:​16, 21.

  6. Surgo. Debata Jahowa, Jesus Kristus dohot surusuruan tading di surgo. * (Psalmen 103:19-​21; Ulaon ni Apostel 7:​55) Suang songon i 144.000 halak na laho rap mamarenta dohot Jesus di Harajaonna, dipahehe do laho mangolu di surgo.​—Daniel 7:​27; 2 Timoteus 2:​12; Pangungkapon 5:​9, 10; 14:​1, 3.

  7. Tano on. Ditompa Debata tano on laho inganan ni jolma do salelengna. (Psalmen 104:5; 115:16; Parjamita 1:4) Mangolu salelengna ma halak na mangoloi Debata di Paradeiso di tano on.​—Psalmen 37:11, 34.

  8. Hajahaton dohot Parungkilon. Sada surusuruan na mangalo Debata do na mamungka hajahaton. (Johannes 8:​44) Di pudian ni ari, digoari ma ibana ”Sibolis” manang ”Setan”. Ibana ma na mangelaela baoa nang borua na parjolo. Gabe dohot ma sude pinomparna mardosa. (1 Musa 3:​1-6; Rom 5:​12) Asa tarida Sibolis pargabus, diloas Debata ma masa hajahaton dohot parungkilon. Alai ndang pasombuon ni Debata on saleleng ni lelengna.

  9. Hamatean. Ndang diboto halak naung mate be agia aha. (Psalmen 146:4; Parjamita 9:​5, 10) Ndang dipasingkorsingkor nasida di api na roko.

    Paheheon ni Debata ma haduan marmiliar halak naung mate. (Ulaon ni Apostel 24:15) Molo ndang mangoloi Debata nasida dung dipahehe, ripashononNa do nasida saleleng ni lelengna.​—Pangungkapon 20:5.

  10. Keluarga. Diihuthon hami do aturan na binahen ni Debata tu halak naung marhasohotan, holan parmainanon do na boi mambahen marsirang. (Mateus 19:​4-9) Pos do rohanami boi do martua angka keluarga molo mangihuthon poda na sian Bibel.​—Epesus 5:22–​6:1.

  11. Panombaon. Ndang dipangke hami silang manang angka gombar na asing. (5 Musa 4:​15-​19; 1 Johannes 5:​21) On ma na diulahon hami di panombaonnami:

  12. Organisasinami. Diorganisasi do hami di huria, diuluhon punguan ni sintua. Alai ndang na gabe pangkat hasintuaon i jala ndang digaji nasida. (Mateus 10:8; 23:8) Ndang adong dibahen saparsampuluan jala ndang adong kolekte di parpunguannami. (2 Korint 9:7) Sude ulaonnami diurupi silehonlehon jala ndang ditingtingkon.

    Ulaon Sitindangi Ni Jahowa di liat portibi on diuluhon Punguan na Mangaradoti Organisasi sian kantor pusatnami, i ma pigapiga halak Kristen na togu di partondion.​—Mateus 24:45.

  13. Parsaorannami. Sarupa do haporseaonnami di liat portibi on. (1 Korint 1:​10) Jala marsitutu do hami asa unang paimbarimbarhon jolma alani parhepengon, houm dohot marga. (Ulaon ni Apostel 10:34, 35; Jakobus 2:4) Diloas do hami mamillit sipillitonnami. Ganup Sitindangi boi mambahen haputusan hombar tu panggora ni rohana naung mangihuthon ajaran ni Bibel.​—Rom 14:​1-4; Heber 5:​14.

  14. Parniulaon. Marsitutu do hami asa ndang holan mangkaholongi diri sandiri. (Johannes 13:34, 35) Dipasiding hami do ulaon na mambahen jut roha ni Debata, songon mangalehon manang manjalo transfusi darah. (Ulaon ni Apostel 15:28, 29; Galatia 5:​19-​21) Hadameon do na dihalomohon hami jala ndang olo hami parsidohot marporang. (Mateus 5:9; Jesaya 2:4) Dioloi hami do aturan na sian pamarenta molo ndang maralo tu patik ni Debata.​—Mateus 22:21; Ulaon ni Apostel 5:​29.

  15. Maradophon na Asing. Jesus mandok, ”Sihaholonganmu do donganmi doshon dirim!” Jala didok ibana do halak Kristen ”ndang na sian portibi on.” (Mateus 22:39; Johannes 17:16) Alani i, marsitutu do hami mangulahon ”na denggan di saluhut halak”, alai tongtong do hami netral di politik jala ndang parsidohot di ulaon agama na asing. (Galatia 6:​10; 2 Korint 6:​14) Alai ndang olo hami mamaksahon pandapotnami tu na asing.​—Rom 14:12.

Molo adong sungkunsungkunmuna taringot haporseaon ni Sitindangi Ni Jahowa, boi do idaonmu gumodang hatorangan di situsnami, hubungi ma kantornami, ro tu Bale Harajaon na jumonok tu hamu, manang mangkatai ma langsung tu sahalak Sitindangi di luatmuna.

^ par. 4 Ida ma buku Truth in Translation, halaman 165.

^ par. 10 Nang pe surusuruan na jahat nunga dipabali sian surgo, alai mardaging tondi dope nasida.​—Pangungkapon 12:​7-9.