Pintor tu konten

Pintor tu menu namangihut

Sitindangi Ni Jahowa

Batak (Toba)

Ai na Dipaksa Sitindangi Ni Jahowa do Angka Halak asa Ganti Agama?

Ai na Dipaksa Sitindangi Ni Jahowa do Angka Halak asa Ganti Agama?

Ndang. Nunga hea adong hatorangan taringot on di majalahnami, i ma di Menara Pengawal, ”Sala do molo mamaksa halak asa ganti agama.” * Hami ndang mamaksa halak, alana:

  • Ndang hea Jesus mamaksa halak asa manjalo ajaranna. Diboto ibana do holan saotik na manjangkon ajaranna. (Mateus 7:13, 14) Tingki pigapiga halak ndang olo be gabe siseanna jala ndang lomo be rohanasida tu ajaranna, ndang dipaksa Jesus nasida laho mangihuthon ibana.—Johannes 6:60-62, 66-68.

  • Diajari Jesus do angka siseanna asa unang mamaksa halak laho ganti agama. Alani i, ndang hea sisean ni Jesus mamaksa halak asa manangihon barita na uli taringot Harajaon ni Debata. Alai, nasida mangalului na olo manangihon.—Mateus 10:7, 11-14.

  • Marisuang do molo ganti agama alani dipaksa, alana Debata marlomo ni roha asa hita manomba Ibana sian ias ni rohanta.—5 Musa 6:4, 5; Mateus 22:37, 38.

Ai na laho mamaksa halak asa ganti agama do umbahen na marbarita na uli hami?

Tutu do hami pasahathon barita sian Bibel ”sahat ro di ujung ni tano on,” jala hami mangulahon i ”di hatoropan, nang marsasajabu pe,” songon na diajarhon Bibel. (Ulaon ni Apostel 1:8; 10:42; 20:20) Songon halak Kristen di abad na parjolo, sipata didok do hami mamaksa halak asa ganti agama. (Ulaon ni Apostel 18:12, 13) Alai ndang tutu i. Hami ndang mamaksa halak laho mangihuthon haporseaonnami. Alai, porsea do hami asa sude halak mamboto aha na diajarhon Bibel jala boi ma nasida mambahen haputusan hombar tu aha naung diparsiajari nasida. Hami ndang mamaksa halak asa ganti agama. Ndang adong partalian ni ulaonnami on tu politik jala hami ndang marjanji mangalehon pangurupion manang hepeng laho mangalului ruas.

Imbar do hami sian nasida na mandok dirina Kristen alai mangulahon na so dihalomohon Kristus. *

Marhak do sasahalak laho mangganti agamana?

Ndang diihuthon si Abraham agama ni keluargana

I do, Bibel mandok marhak do sasahalak mangganti agamana. Disurat do di Bibel taringot pigapiga halak na mangganti agamana jala manomba Debata na sintong. Umpamana, si Abraham, si Rut, pigapiga halak di Aten, jala apostel Paulus. (Josua 24:2; Rut 1:14-16; Ulaon ni Apostel 17:22, 30-34; Galatia 1:14, 23) Asing ni i, adong do disurat di Bibel taringot sasahalak na manadingkon panombaon na sintong, nang pe sala haputusan na binahenna i.—1 Johannes 2:19.

Hak ni sasahalak laho mangganti agama ditolopi Deklarasi Universal Hak Asasi Manusia. Deklarasi on ma na dipangke Perserikatan Bangsa-Bangsa ”laho mambahen uhum taringot hak asasi ni jolma di liat portibi on.” Deklarasi on mandok boi do sasahalak ”mangganti agamana manang haporseaonna” jala ”boi mangalului, manjalo jala mangalehon hatorangan dohot informasi,” umpamana taringot haporseaon ni nasida. * Tutu do, ganup halak ingkon mamparsangapi hak ni sasahalak laho mangkaporseai haporseaonna jala manjua hatorangan na so dijalo nasida.

Na so diparsangapi do adat dohot hasomalan ni keluarga molo ganti agama ni sasahalak?

Ndang. Bibel mangajarhon hita ingkon mamparsangapi sude halak, ndang soal aha agama ni nasida. (1 Petrus 2:17) Asing ni i, dioloi Sitindangi Ni Jahowa do parenta ni Bibel laho mamparsangapi natuatua, nang pe nasida ndang sahaporseaon.—Epesus 6:2, 3.

Alai, ndang sude halak satolop tu ajaran ni Bibel taringot on. Sahalak borua di Zambia mandok, ”Di hutanami, molo adong halak na ganti agama, . . . didok ma ibana ndang mamparsangapi keluarga dohot dongan na asing.” Dihilala borua on do sisongon i tingki poso dope ibana. Tingki i, marsiajar Bibel ibana dohot Sitindangi Ni Jahowa jala dibahen ibana ma haputusan laho mangganti agamana. Didok ibana, ”Natuatuangku mandok nunga hansit hubahen rohanasida. Mangkirim do ahu asa satolop nasida tu haputusan naung hubahen. . . . Ndang na so huparsangapi keluargaku ala hupillit marsihohot tu Jahowa jala ndang be mangihuthon adat ni agama.” *

^ par. 2 Ida ma Menara Pengawal 1 Januari 2002, alaman 12, paragraf 15.

^ par. 8 Umpamana, hirahira taon 785 DM, diparentahon si Charlemagne ma laho pamatehon manang ise pe na so olo gabe halak Kristen di Saxony. Adong do muse Perjanjian Perdamaian Augsburg na ditandatangani angka halak na marbadai di Imperium Romawi Suci di taon 1555 DM. Isi ni Perjanjian i, ganup halak na mamarenta di luatna ingkon maragama Katolik Rom manang Lutheran jala rayatna pe ingkon mangihuthon agama i. Sude na so olo mangoloi ingkon dipalao sian luat i.

^ par. 11 Angka hak sisongon on pe dipaboa do di Piagam Afrika tentang Hak Asasi Manusia dan Bangsa, Deklarasi Amerika tentang Hak dan Kewajiban Manusia, Piagam Arab tentang Hak Asasi Manusia 2004, Deklarasi Hak Asasi Manusia ASEAN (Punguan ni Angka Negara di Asia Tenggara), Konvensi Eropa Mengenai Hak Asasi Manusia, dohot Perjanjian Internasional tentang Hak-Hak Sipil dan Politik. Alai nang pe songon i, ndang marsitutu angka negeri na parsidohot tu perjanjian on laho mangulahon isi ni perjanjian i.

^ par. 14 Jahowa, i ma goar ni Debata na sintong na disurat di Bibel.