Pintor tu konten

Pintor tu menu namangihut

Sitindangi Ni Jahowa

Batak (Toba)

Boasa Ndang Marnatal Sitindangi Ni Jahowa?

Boasa Ndang Marnatal Sitindangi Ni Jahowa?

Pandapot ni godangan halak

Nasida mandok: Sitindangi Ni Jahowa ndang marnatal ala ndang porsea nasida tu Jesus.

Na Sasintongna: Halak Kristen do hami. Porsea do hami holan marhite Jesus Kristus do boi mandapot haluaon.—Ulaon ni Apostel 4:12

Nasida mandok: Marbadai do dibahen hamu na markeluarga, ala diajari hamu nasida asa unang marnatal.

Na Sasintongna: Dihaholongi hami do angka keluarga. Alani i, dipangke hami do Bibel laho mambahen martua na markeluarga

Nasida mandok: Ala ndang marnatal hamu, gabe ndang diboto hamu patuduhon basa ni roha, haburjuon, dohot dame di portibi on.

Na Sasintongna: Marsitutu do hami patuduhon dame dohot basa ni roha ganup ari. (Poda 11:25; Rom 12:18) Umpamana, ulaon marbarita dohot parpunguannami hombar do tu parenta ni Jesus, i ma, ”Sibasabasa do i tu hamu; antong, basabasahon hamu ma i!” (Mateus 10:8) Jala, porsea do hami holan Harajaon ni Debata do na parohon dame tu portibi on.—Mateus 10:7

Boasa Ndang Marnatal Sitindangi Ni Jahowa?

  • Jesus mangalehon parenta asa taulahon ari parningotan hamamatena, ndang ari hatutubuna.—Lukas 22:19, 20.

  • Angka apostel dohot sisean ni Jesus di abad na parjolo ndang marnatal.New Catholic Encyclopedia mandok, ”ari Hatutubu ni Jesus on dibahen hirahira taon 243 [D.M.],” marratus taon dungkon mate apostel na parpudi.

  • Ndang adong tanda na patuduhon molo Jesus tubu tanggal 25 Desember; ndang adong dipaboa di Bibel tanggal piga Jesus tubu.

  • Porsea do hami molo Natal ndang dihalomohon Debata, ala Natal hasomalan ni halak parbegu.—2 Korint 6:17.

Boasa Olo Sitindangi Ni Jahowa Dihasogohon Ala Ndang Marnatal?

Nang pe diboto godang halak molo Natal hasomalan ni halak parbegu jala ndang hombar tu Bibel, alai tong do nasida marnatal. Alani i, porlu do pingkirhonon ni nasida: Boasa halak Kristen ndang boi mangulahon i? Boasa gabe parsoalan i?

Dijujui Bibel do hita asa mamangke pingkiran laho manimbangi lomo ni roha ni Debata. (Rom 12:1, 2) On mangajari hita asa mangargai hasintongan. (Johannes 4:23, 24) Diargai hami do pandapot ni halak. Alai, diihuthon hami do prinsip ni Bibel nang pe gabe sogo roha ni halak mangida hami.

Nang pe ndang marnatal, diargai hami do hak ni halak laho marnatal. Ndang olo hami mangorai halak laho marnatal.