Sitindangi Ni Jahowa manogihon hamu marsiajar Bibel asa boi mandapot alus ni sungkunsungkun songon:

  • Ise do Debata?

  • Tutu do ahu disarihon Debata?

  • Songon dia asa lam denggan parsaripeonku?

  • Songon dia asa las rohangku di parngoluon?

Hatorangan na mangihut paboahon alus ni sungkunsungkun na jotjot disungkun halak taringot ulaon marsiajar Bibel.

Aha do na diparsiajari? Diulas hami do taringot tu ”Debata” manang taringot ”parsaripeon”. Dung i, dipareso hami ma angka ayat ni Bibel na hombar tusi. Dung mamareso ayat ni Bibel, boi ma taantusi boha pandok ni Bibel taringot na taulas nangkin, jadi sian Bibel ma tadapot alusna.

Tingki marsiajar Bibel, dipangke hami do buku Aha do na Diajarhon Bibel tu Hita? Godang hatorangan na boi taulas sian buku on. Umpamana, aha do na diajarhon Bibel taringot tu Debata, Jesus dohot taringot ari na naeng ro.

Sadia do gararon? Ndang manggarar, buku na dipangke pe ndang martuhor.

Sadia leleng do sahali marsiajar? Godangan halak mangalehon tingkina sajom di bagasan saminggu. Alai, hamu do na manontuhon sadia leleng hamu boi marsiajar.

Boha molo hupangido marsiajar Bibel? Molo dipangido hamu marsiajar Bibel, sahalak Sitindangi Ni Jahowa ro manjumpangi hamu di tingki dohot inganan na pas di hamu. Patuduonna ma satongkin cara marsiajar Bibel, dung i hamu ma na manontuhon laho marsiajar Bibel manang ndang.

Ingkon gabe Sitindangi Ni Jahowa do ahu molo nunga marsiajar Bibel? Daong. Nang pe lomo rohanami mangurupi halak marsiajar Bibel, ndang hea hami mamaksa halak asa gabe ruasnami. Diargai hami do haporseaon ni halak jala diboto hami do ganup halak marhak mamillit haporseaonna be.—1 Petrus 3:15.