“Songon na diboto Jahowa do na di bagasan roha ni akka natua-tua.” I ma na didok sahalak ama di Malaysia taringot seri video animasi Gabe Ale-ale ni Jahowa.

Dung dirilis video na parjolo, nungnga dibahen Saksi Jahowa video animasi taringot si Kaleb dohot keluargana. Akka video on nungnga adong di jw.org/bbc, marisi parsiajaran na denggan tu dakdanak. Songon, boasa dang boi manakko jala asa ringgas martangiang.

Video na parjolo di seri on nungnga diterjemahon tu 131 bahasa, gabe boi ma dakdanak di liat portibi on mandapot laba.

Sahalak ina na lima ianakkonna manurat, “Dung hujalo hami DVD Dengarkan, Taati, dan Terimalah Berkat saminggu naung salpu, nungnga 50 hali ra hutonton hami.”

Si Millie marumur 12 taon tading di Inggris. Itona na marumur 15 taon margoar Si Thomas, marsahit Sindrom Down. Didok si Millie, “Adong video kaleb di iPad ni si Thomas. Boi ma dipatuduhon ibana tu dongan sasikkolana. Lomo hian rohana mangendehon laguna. Tangis do sahalak saudari mambege soarana tikki mangendehon i. Denggan hian daba.”

Si Ava, na mandok umurna 8 taon 9 bulan 25 ari manurat, “Malo hian si Kaleb dohot kakakna mangajari dakdanak.”

Si Mikaylah manurat, “Umurhu onom taon. Mauliate da, nungnga dibahen hamu DVD Dengarkan, Taati, dan Terimalah Berkat. Diajari do au asa manangihon natua-tuakku, asa las roha ni Jahowa.”

Ditonton sahalak animator na so Saksi Jahowa ma video Unang Manangko. Tarhatotong do ibana mangida i, tarlumobi dung dibege ibana holan piga-piga halak do na mambahen i. Didok ibana, “Hutanda do piga-piga halak na karejo di perusahaan studio animasi na balga nang na gelleng. Hirim do rohakku naeng karejo disi. Alai, holan mambahen halak mekkel satokkin do i. Hape, video animasi na dibahen hamu, boi mangajari dakdanak asa mangulahon na sittong jala asa unang takkang. Marlaba do ulaonmuna on, ala mangurupi godang halak.”

Sapandapot do akka natua-tua di liat portibi on. Sahalak ina mandok, “Tikki i, anakku si Quinn na marumur tolu taon, manonton video Menjalin Persahabatan dengan Yehuwa”. Pas diputar lagu i, dibereng ibana ma au huhut dibahen tanganna tu andorana, jala didok ma, ’Las hian rohakku omak manonton video on.’”