Dipakke Saksi Jahowa do marragam terjemahan ni Bibel lao marsiajar Bibel. Di bahasa naung rade, somal do hami mamakke Bibel Terjemahan Tano na Imbaru. Alana, terjemahan on tikkos, takkas, jala mamakke goar ni Debata.

•   Mamakke goar ni Debata. Piga-piga Bibel naung dipabinsar dang pasangappon goar ni Debata. Umpamana, sada terjemahan ni Bibel mambahen daftar goar ni 70 halak na pabinsarhon Bibel i. Alai, dang dipaboa nasida goar ni Pengarang ni Bibel—Debata Jahowa!

   Di Bibel Terjemahan Tano na Imbaru, dibahen do goar ni Debata marribu hali, songon di teks aslina. Jala goar ni na pabinsarhon, dang dipaboa disi.

•   Tikkos. Dang sude terjemahan ni Bibel tikkos manerjemahon teks aslina. Umpamana, di sada Bibel, Mateus 7:13 diterjemahon songon on, “Masuk ma hamu tu harbangan na metmet i; ai balga do harbangan jala bidang do dalan tu api narokko.” Sasintongna, teks asli ni Bibel mamakke hata “hamagoan” dang “api narokko”. Ra, akka penerjemah mambahen hata “api narokko”, ala porsea do nasida molo parjahat dipasiak-siak di api narokko. Alai, dang dos ajaran i tu ajaran ni Bibel. Imbar sian i, tikkos do Bibel Terjemahan Tano na Imbaru manerjemahon ayat on. Terjemahanna i ma, “Masuk ma hamu sian gerbang na soppit. Ai tu hamagoan do gerbang na balga dohot dalan na bidang i.”

•   Takkas. Sada terjemahan na denggan, dang holan tikkos manerjemahon teks aslina, alai ikkon takkas jala mura diattusi. Umpamana, hata ni Jesus na disurat di Mateus 5:3 mandok, ”Martua ma na pogos tondi.” Alai, hata on dang takkas diboto halak. Alani i, asa lam mura diantusi, Bibel Terjemahan Tano na Imbaru manerjemahon ayat on gabe, ”Marlas ni roha ma na mamboto rikkot ni marale-ale tu Debata.”

 Asing ni tikkos, takkas, jala mamakke goar ni Debata, Bibel Terjemahan Tano na Imbaru pe imbar sian terjemahan na asing. Bibel terjemahan on dang margarar. Alani i, marjuta halak boi manjaha Bibel di bahasa nasida sandiri—dohot ma i halak na so adong hepengna manuhor Bibel.