Binsar: Las do rohakku lae ala boi hita teratur marsiajar Bibel. * Tikki terakhir hita marsiajar, disukkun lae do tu au, boasa porsea Saksi Jahowa taon 1914 ma Harajaon ni Debata mulai mamaretta?

Jon: I do lae. Na hujaha do bukkumuna on. Disi didok mulai taon 1914 ma Harajaon ni Debata mamaretta. Gabe penasaran do au. Alana, didok hamu sian Bibel do sude ajaran na dihaporseai hamu.

Binsar: I do. Toho do i lae.

Jon: Jadi, nga hujaha be sude isi ni Bibel. Alai dang adong huida ayat na mandok taon 1914. Alani i hulului ma di Bibel online. Tikki huketik taon 1914, didok “Tidak ada hasil”.

Binsar: Hupujihon do lae bah. Alana nga dijaha lae be sude isi ni Bibel. Pasti lomo do roha ni lae tu Hata ni Debata ate.

Jon: I do. Alana kan bukku na penting do Bibel on.

Binsar: Pas do i lae. Jala hupujihon do muse lae, alana sian Bibel do dilului lae alusna. Sesuai do na dibahen lae i tu hata ni Bibel na mandok, “Sai lului ma” asa boi diattusi hamu. * Denggan do na binahen ni lae i.

Jon: Mauliate ma lae. Memang lomo do rohakku marsiajar. Sebenarna nga hujaha di bukku na taparsiajari on taringot taon 1914. Disi didok adong nipi ni sahalak raja. Di nipi i adong sada hau na ditaba, alai dung i tubu muse. Songon i ma hira-hira.

Binsar: I do lae. Surirang na dipaboa di Daniel 4 do i lae. Disi dipaboa taringot nipi ni si Nebukadnesar raja ni Babel.

Jon: Olo, i ma. Nga mulak-ulak hujaha taringot i. Alai dang marna huattusi aha kaitan ni i tu Harajaon ni Debata manang taon 1914.

Binsar: Dang pola boha i lae. Haru si Daniel na manurat bukku i pe dang mangattusi lapatan ni na sinuratna i.

Jon: Boha i?

Binsar: I do lae. Di Daniel 12:8, didok ibana, “Hubege do nian saluhutna i, alai dang huattusi.”

Jon: Bah dang holan iba hape ate. Tuani ma.

Binsar: Boasa dang diattusi si Daniel? Alana dang tikkina dope lapatan ni surirang na di bukku Daniel i dipaboa tu jolma. Alai molo hita saonari, nungnga boi be takkas taattusi lapatan ni nipi i.

Jon: Sian dia diboto lae?

Binsar: Taparrohahon ma ayat selanjutna. Daniel 12:9 mandok, “Ai dirahasiahon dope akka hata i jala disegel dope i sahat tu na dapot ujungna.” Jadi boi ma diattusi surirang i molo nungnga “dapot ujungna.” Songon na lao taparsiajari annon, godang do bukti na patuduhon molo hita saonari nungnga mangolu di ujung na didok di ayat i. *

Jon: Jadi boi do patorangon ni lae taringot surirang na di bukku Daniel i?

Binsar: Hucoba pe da lae.

Binsar: Na parjolo, tabahas ma jo aha do na diida Raja Nebukadnesar di nipina i. Dung i tabahas ma lapatanna.

Jon: Oke.

Binsar: Di nipi i, diida si Nebukadnesar ma hau na balga jala timbona sahat tu langit. Dung i dibege ibana ma sada suru-suruan ni Debata na manuru asa ditaba hau i. Alai didok Debata do asa ditinggalhon pakkal dohot uratna. Dung salpu “pitu taon” tubu ma muse hau i. * Mulana hau on manggombarhon si Nebukadnesar. Alana di tikki i, ibana do raja na terkenal na songon hau na timbona sahat tu langit. Dung i, ditaba ma ibana manang dipaturun sian jabatanna saleleng “pitu taon”. Diboto lae do muse aha na masa?

Jon: Daong.

Binsar: Dang pola boha lae. Didok di Bibel gabe rittik ma si Nebukadnesar saleleng pitu taon. Saleleng pitu taon i, dang boi be ibana gabe raja. Alai dung salpu pitu taon i, malum ma ibana jala mulak ma ibana gabe raja muse. *

Jon: Oke. Sahat tusi huattusi dope. Alai aha ma hubungan ni i tu Harajaon ni Debata dohot taon 1914?

Binsar: Singkatna, dua hali ma saut surirang on. Na parjolo, masa ma i tu pamarettaon ni si Nebukadnesar na sanga so nakkaning. Na paduahon, masa ma i tikki dipaso pamarettaon ni Debata. Jadi na paduahon on ma na adong hubunganna tu Harajaon ni Debata.

Jon: Sian dia ma diboto lae molo surirang i adong hubunganna tu Harajaon ni Debata?

Binsar: Sian hata na adong di surirang i. Songon na didok di Daniel 4:17, surirang on dilehon “asa sude jolma mamboto Natumimbul i do Parhuaso ni harajaon na adong di tano on. Jala lehononna do harajaon i tu manang ise pe lomo ni rohana”. Diparrohahon lae do adong hata “harajaon na adong di tano on”?

Jon: I do. Disi didok, “Natumimbul i do Parhuaso ni harajaon na adong di tano on.”

Binsar: I do. Menurut lae ise do “Natumimbul i”?

Jon: Hurasa, Debata do maksudna ate.

Binsar: Tutu. Jadi sian on taboto, surirang i masa dang holan tu si Nebukadnesar. Alai dohot do tu “harajaon na adong di tano on”, i ma pamarettaon ni Debata. Jala boi ma i takkas taboto molo taida ayat na asing.

Jon: Maksudna?

Binsar: Sebenarna lae, sude bukku na adong di Bibel termasuk bukku Daniel on, adong do topik utama na dibahas. Topik utamana i ma taringot Harajaon na dipajongjong Debata jala rajana, i ma Jesus Anak ni Debata. Contohna, coba ma tajaha pasal na sebelumna. Boi tolong jahahon lae Daniel 2:44?

Jon: Oke. Didok, “Tikki mamaretta akka harajaon i, pajongjongon ni Debata na di surgo i ma sada harajaon na so boi dihancurhon. Dang na lao pasahatonna harajaon i tu bangso na dia pe. Alai na lao dihancurhon jala diropukkon harajaon i do sude harajaon na parjolo i. Jala hot do harajaon i saleleng ni lelengna.”

Binsar: Mauliate lae. Boha do menurut lae, adong do kaitan ni ayat on tu Harajaon ni Debata?

Jon: Hmm. Boha ma dohonokku ate.

Binsar: Nakking didok di ayat i “hot do harajaon i saleleng ni lelengna.” Menurut lae, asing ni harajaon ni Debata, adong do pamarettaon ni jolma na boi hot saleleng ni lelengna?

Jon: Dang adong.

Binsar: Tutu lae. Saonari taida ma muse surirang na asing taringot Harajaon ni Debata na disurat di bukku Daniel. Tajaha ma di Daniel 7:13, 14. Surirang on paboahon taringot pamimpin ni harajaon i. Didok disi, “Dilehon do tu ibana huaso, hasangapon, dohot harajaon, asa sude halak na sian akka bangso dohot bahasa marhobas tu ibana. Martahan do pamarettaonna saleleng ni lelengna jala dang boi digattihon. Harajaonna pe, dang boi dihancurhon.” Aha do na sarupa na dipaboa di ayat on dohot ayat na tajaha nakkaning?

Jon: Taringot harajaon ate.

Binsar: Tutu. Alai dang sarupa on tu harajaon na asing. Alana didok, mamaretta do harajaon i tu “sude halak na sian akka bangso dohot bahasa.” Artina, harajaon i mamaretta di saluhut tano on.

Jon: I do ate. Baru dope huboto on.

Binsar: Jala parrohahon ma muse hata na mandok, “Martahan do pamarettaonna saleleng ni lelengna jala dang boi digattihon. Harajaonna pe, dang boi dihancurhon.” Sarupa do on lae tu na didok di Daniel 2:44 nakkaning?

Jon: Sarupa ate.

Binsar: Saonari taulang ma jo saotik akka na tabahas nakkaning ate. Surirang di Daniel pasal 4 on dilehon “asa sude jolma mamboto Natumimbul i do Parhuaso ni harajaon na adong di tano on.” Sian on taboto ma molo surirang i dang holan masa tu si Nebukadnesar. Jala molo tajaha sude bukku Daniel taboto ma sude surirang na adong di bukku i lao paboahon taringot Harajaon ni Debata dohot rajana, i ma Anak ni Debata. Jadi setuju do lae molo surirang na di Daniel pasal 4 on adong hubunganna tu Harajaon ni Debata?

Jon: Masuk akkal do nian. Alai aha ma hubunganna tu taon 1914?

Binsar: Taingot ma muse taringot Raja Nebukadnesar nakkaning. Di nipina i, ibana ma na digombarhon tu hau i. Songon hau na ditaba jala dipasombu, sanga do so pamarettaonna saleleng pitu taon. Masa ma i tikki na rittik i ibana. Dung salpu na pitu taon i, dang rittik be ibana jala mulak ma ibana gabe raja muse. Songon i ma tong pamarettaon ni Debata. Sanga do so piga-piga tikki. Alai dang alana dang boi Debata mamaretta.

Jon: Maksudna?

Binsar: Najolo, raja na mamaretta di Jerusalem didok do hundul di “tahta ni Jahowa.” * Akka raja i ma na mewakili Debata mamaretta bangsona. Jadi pamarettaon ni akka raja i sebenarna pamarettaon ni Debata do. Alai belakangan, godang do akka raja i na so tunduk be tu Debata. Jala gabe diihutton akka rakyatna i do nasida. Ala dang tunduk be nasida, dipasombu Debata ma halak Israel ditaluhon halak Babel taon 607 SM. Mulai sian i, dang adong be raja na gabe wakil ni Jahowa di Jerusalem. On ma na didok sanga do so pamarettaon ni Debata. Sahat dison, diattusi lae dope?

Jon: Boi. Lanjut ma lae.

Binsar: Jadi boi ma tadok mulai taon 607 SM i ma so pamarettaon ni Debata. Berarti sian i ma dimulai pitu taon na disurat di surirang nakkin. Dung marujung na pitu taon i, dibahen Debata ma muse sada pamarettaon na baru. Dipillit Ibana ma rajana di surgo. On ma na patuduhon nga saut be surirang na tajaha di bukku Daniel nakkin. Sukkun-sukkunna saonari: Andigan do marujung na pitu taon i? Molo taboto alusna, taboto ma andigan Harajaon ni Debata mulai mamaretta.

Jon: Oh... Jadi maksudna, ujung ni sipitu taon i taon 1914 do?

Binsar: Tutu. Pittor diattusi lae do ate.

Jon: Alai sian dia ma taboto i?

Binsar: Tikki di tano on Jesus, didok ibana do dang marujung dope sipitu taon i. * Jadi on patuduhon leleng do sipitu taon i lae. Dimulai ma i marratus taon sebelum ro Jesus tu tano on, jala dung lao pe Jesus tu surgo, dang marujung dope sipitu taon i. Jala nakkaning tabahas, surirang i boi diattusi sahat tu na “dapot ujungna.” * Na menarik lae, mulai sian taon 1800-an, adong do piga-piga halak na berupaya mamareso surirang on dohot surirang na asing lao mangattusi lapatanna. Ujungna, diboto nasida ma molo sipitu taon i marujung di taon 1914. Jala akka na masa di tikki i mambahen lam pos roha ni nasida, nga jongjong be Harajaon ni Debata di surgo taon 1914. Di taon i ma mulai ari parpudi manang ujung ni na pitu taon i. Memang ikkon nanget-nanget do on tarpasiajari lae asa boi taattusi. . . .

Jon: I do ate. Annon huparsiajari pe muse taringot i, asa lam huattusi.

Binsar: Dang pola boha lae. Najolo pe au songon i do. Dang pittor huattusi sude taringot surirang on dohot lapatanna. Alai na penting, boi diida lae sian Bibel do sude na dipaboa Saksi Jahowa taringot Harajaon ni Debata i.

Jon: Olo lae. Toho do na didokmi. Salut do au tu Saksi Jahowa. Alana Bibel do na selalu dipakke hamu.

Binsar: Lae pe songon i do tong huida. Memang porlu do tikki lae lao mamparsiajari on. Mungkin adong do sukkun-sukkun ni lae muse. Contohna, nga taboto nian molo sipitu taon i adong hubunganna tu Harajaon ni Debata jala dimulai ma i sian taon 607 SM. Alai saonari, sian dia taboto molo sipitu taon i marujung di taon 1914? *

Jon: I ma da. Sian dia ma muse hitunganna i?

Binsar: Sebenarna di Bibel dipatorang do lae sadia leleng masa sipitu taon i. Annon tikki ro au muse, tabahas ma taringot on. *

Jon: Olo lae. Boi ma i.