Godang do poda na dilehon asa diulahon tingki marhabot ni roha. Alai, ndang sude poda boi mangurupi hita. Umpamana, adong do na manjujui hamu asa unang sai tumatangis manang ndang porlu patuduhon habot ni roha. Na asing, ndang manjujui hamu mangulahon i. Alai Bibel, mangalehon poda na denggan jala na sadalan tu hasil penelitian.

Di pigapiga hasomalan, ndang denggan molo sahalak baoa tangis. Alai, denggan do on mambahen sasahalak gabe maila tangis, nang di jolo ni na torop? Ahli kesehatan mental marpandapot, somal do molo tumatangis tingki marhabot ni roha. Jala, olo do on mambahen rohanta lam dumenggan nang pe lungun situtu tahilala. Molo sai tatabunihon lungun ni rohanta, boi do parohon jea tu hita sandiri. Ndang adong ayat ni Bibel na mangorai manang mandok ulaon na sala do molo sasahalak tangis tingki marhabot ni roha. Umpamana, tingki mate si Lasarus, tangis do Jesus di jolo ni na torop, nang pe boi ibana pahehehon halak naung mate!​—Johannes 11:33-35.

Olo do muruk sasahalak tingki marhabot ni roha, tarlumobi tingki mangadopi hamamate ni sasahalak na so panagaman. Godang do na mambahen sasahalak gabe muruk. Umpamana, ala mamingkirhon angka hata na so mangapul roha sian angka jolma. Si Mike sian Afrika Selatan mandok, ”Marumur 14 taon do ahu tingki mate bapakku.” Didok ibana muse, ”Di tingki acara penguburan, pandita Anglikan mandok, dihaporluhon Debata do halak na burju jala jumolo do nasida dialap. * Muruk do ahu, ala sasintongna umporlu do di hami bapaknami i. On masa 63 taon naung salpu jala lungun situtu dope rohangku.”

Songon dia do taringot manalahon diri sandiri? Tarlumobi tingki adong sasahalak na mate di tingki na so panagaman, olo do ra ro tu pingkiran, ’Ndang masa on molo huulahon songon i manang songon on.’ Manang, olo do marbadai tingki parpudi pajumpang dohot halak na mate i. On boi mambahen ibana gabe manalahon dirina sandiri.

Unang ma tabunihon molo ro pangkilalaan muruk manang manalahon diri sandiri tu rohamu. Mangkatai ma hamu tu dongan na rade manangihon jala na boi paposhon rohamu, molo pangkilalaan na muruk manang manalahon diri sandiri somal do tingki marhabot ni roha. Bibel paingothon hita, ”Sai masihaholongan do na mardongan jala songon na marhahamaranggi do di sitaonon.”​—Poda 17:17, Bibel siganup ari.

Aleale na dumenggan di halak na marhabot ni roha, i ma Jahowa. Paboa ma sude na di bagasan rohamu marhite tangiang, ”ai disarihon do hamu”. (1 Petrus 5:7) Marjanji do Jahowa lehononNa do ”dame ni Debata na sumurung sian saluhut roha”. (Pilippi 4:6, 7) Dung i, loas ma Debata mangurupi hamu marhite ayat ni Bibel na mangapul roha. Surat ma angka ayat i. (Ida ma  kotak na di toru.) Olo do gabe diingot hamu  pigapiga ayat sian i. Rimangi ma on tarlumobi tingki sahalakmu manang tingki maol hamu tarpodom.​—Jesaya 57:15.

Barubaru on, alani kanker mate do tungganeboru ni si Jack, baoa na marumur 40 taon. Si Jack mandok, olo do sipata lungunlungunan pangkilalaanna. Alai, mandapot pangurupion do ibana marhite tangiang. Ibana mandok, ”Tingki martangiang ahu tu Jahowa, ndang lungunlungunan be huhilala. Jotjot do ahu tarsunggul tingki borngin jala ndang boi modom. Alai dung hujaha jala hurimangi angka ayat na boi mangapul rohangku, jala hupaboa sude na di rohangku marhite tangiang, dame ma roha nang pingkiranku gabe boi ahu modom. On lobi sian na huhirim.”

Mate do omak ni sahalak borua na margoar si Vanessa ala marsahit. Dipargogoi do ibana marhite tangiang. Ibana mandok, ”Di tingki mansai susa huhilala, holan goar ni Jahowa do na hujou jala tangis ma ahu. Ditangihon Jahowa ma tangiangku jala sai dilehon do gogo na huhaporluhon.”

Pigapiga halak na marhabot ni roha denggan do gabe sahalak na mangalehon poda tu halak na marhabot ni roha. Manang, gabe relawan di inganan konsultasi. On boi parohon las ni roha dohot dame ni roha tu na marhabot ni roha. (Ulaon ni Apostel 20:35) Godang do halak Kristen na marhabot ni roha mangurupi na asing jala gabe tarapul ma roha ni nasida.​—2 Korint 1:3, 4.