CARA NI DEBATA MANOPPA HITA

Mulai sian na tubu sada poso-poso sahat tu sajom dukkon i, porlu do ibana dihaol omakna. Alana molo pittor dilean poso-poso tu omakna, boi ma denggan ibana magodang. a

Boasa ma boi holong hian roha ni sahalak ina tu poso-posona? Songon on ma didok sahalak Profesor na margoar si Jeannette Crenshaw di majalah The Journal of Perinatal Education, disi partus sahalak ina pittor lam godang do hormon oksitoksin di dagingna “na mambahen ibana gabe boi denggan mangabing, mamparrohahon, jala patarushon poso-posona”. Adong muse hormon na asing “na mambahen sahalak ina boi mangattusi aha na porlu di poso-posona”. On ma na mambahen gabe lam jonok ina tu poso-posona i. Boasa ma boi songon i?

Debata Jahowa b do na mambahen tubu holong ni sahalak ina tu poso-posona. Dipuji Raja Daud do Debata na mambahen ibana boi ‘kaluar sian bortian ni omakna’ jala boi aman di abingan ni omakna. Tikki martangiang, didok ibana do tu Debata, “Sian mulai tubu au, Ho do na mamparrohahon au. Tikki di bagasan bortian ni omakku dope au, nungnga gabe Debatakku Ho.”—Psalmen 22:9, 10.

PIKKIRHON MA: Boi do dibahen Debata sistem hormon di daging ni sahalak ina na mambahen holong hian roha ni ina i tu poso-posona jala boi mangattusi na porlu di poso-posona i. Sian on gabe boi ma taboto na parduli do Debata tu hita ganup marsada-sada, alana “anak ni Debata do hita”.—Ulaon ni Apostel 17:29.

NA DIDOK BIBEL

Jesus Kristus ma naung leleng mananda Debata na manoppa hita. Didok ibana, “Holan salimper do kan digadis arga ni dua amporik? Alai, dang adong nanggo sada pe sian i na madabu tu tano na so diboto Amamuna. Gari obuk na di ulumuna pe nungnga dibilangi sude. Alani i unang ma mabiar hamu, ummarga do hamu sian godang amporik.”—Mateus 10:29-31.

Dang godang sian hita na olo mamparrohahon pidong na gelleng. Jadi olo do dang taboto tikki adong sada pidong na madabu tu tano. Alai diparrohahon Debata do ganup pidong i! Nang pe songon i ummarga do jolma di Debata sian akka pidong i. Jadi aha ma na boi taparsiajari sian on? Unang ma didok rohamuna na so diparrohahon Debata hamu. Justru holong hian do rohana tu hamu!

 Akka Ayat na boi patoguhon rohatta

• “Diida Jahowa do saluhut na di tano on, diparrohahon Ibana do halak na burju dohot halak na jahat.”—PODA 15:3.

• “Diparrohahon Jahowa do halak na mangulahon na sittong, jala ditangihon do angguk-angguk ni nasida na mangido asa diurupi.”—PSALMEN 34:15.

• “Las situtu do rohakku ala dipatudu Ho holong ni roham. Ai nungnga diida ho hasusaakku, takkas do diboto Ho arsak ni rohakku.”—PSALMEN 31:7.

“DANG DIHAHOLONGI JAHOWA AU”

Aha ma manfaatna molo taboto na diparrohahon jala dihaholongi Debata hita? Taparrohahon ma na didok si Hanna, c sian Inggris:

“Jotjot do au merasa dang dihaholongi Jahowa au jala dang dialusi Ibana tangiangku. Olo do ra ala gale haporseaokku. Huhilala dang arga au di Jahowa, on ma na mambahen gabe dipasombu Ibana au jala dang olo Ibana manangihon tangiangku. Hira na so parduli do Debata tu au.”

Alai gabe muba ma pakkilalaan ni si Hanna. Saonari nga pos be rohana na diparrohahon jala dihaholongi Jahowa do ibana. Boasa boi songon i? Didok ibana, “Palan-palan boi do hupauba pikkirakku. Misalna piga-piga taon na salpu hubege ma jamita taringot tobusan ni Jesus. Hona hian do i tu rohakku jala gabe pos ma rohakku na dihaholongi Jahowa do au. Jala tikki dialusi Jahowa tangiangku, gabe tangis ma au ala huboto na dihaholongi Jahowa do hape au saleleng on. Dung i, lam bagas ma huparsiajari Bibel jala taratur ma au marpungu. Gabe lam hutanda ma Jahowa, akka sifatna, jala songon dia perasaanna tu hita. Saonari boi ma takkas huida na diurupi jala dihaholongi Jahowa do hita sude. Diparrohahon Ibana do hita ganup marsada-sada.”

Pasti dipatogu do rohatta mambege pengalaman ni si Hanna i. Alai boha ma carana asa pos rohamuna na diattusi Jahowa do perasaanmuna? Taida ma alusna di artikel na mangihut.