Unang ma Pikkiri Akka na so Masa Dope

“Unang ma holsoan hamu lao mamikkiri taringot ari sogot. Ai asing do na taholsohon sadari on dohot di ari sogot.”—MATEUS 6:34.

Lapatanna: Ganup ari pasti adong do na mambahen hita holsoan. Alai molo tapikkiri akka na so masa dope, boi do gabe lam tamba holso ni rohatta. Jadi holan akka na porlu di ari i ma na tapikkirhon.

• Molo pagodangku na mambahen hita stres, boi do gabe mura-mura hita panik. Jadi coba ma on: Na parjolo porlu do taakkui, memang adong do masalah na so boi tapasiding. Alana molo torus tapikkiri i, boi do gabe stres hita. Na paduahon, ingot ma belum tentu songon na tapikkirhon i na masa.

Masuk Akkal ma Hamu

“Patuduhon ma tu saluhut halak na masuk akkal hamu.”—PILIPPI 4:5.

Lapatanna: Unang ma patimbohu na taharappon sian diritta dohot sian halak na asing. Alana dang adong jolma na sempurna.

• Sude do jolma adong keterbatasanna. Jadi porlu do serep rohatta jala masuk akkal. Molo tabahen songon i, gabe lam moru ma stresta jala boi do gabe marhasil akka ulaonta. Asing ni i, porlu do sasahali mekkel manang margait tikki adong masalahta. Alana boi do i mambahen gabe lubbang pakkilalaatta jala dang paborattu be masalah i tahilala.

 Pikkirhon ma Boasa Gabe Marsak Hamu

“Hohom do halak na marbisuk.”—PODA 17:27.

Lapatanna: Molo sai jut do rohatta manang sai marsak hita, boi do gabe dang tiur be hita marpikkir. Jadi berupaya ma hamu asa tetap tenang.

• Pikkirhon ma aha na mambahen hamu gabe marsak jala aha do na diulahon hamu saleleng on lao mangatasi i. Misalna, aha do na dipikkirhon hamu tikki stres, songon dia do perasaanmuna, jala aha do na biasana diulahon hamu. Boi do disurat hamu i. Molo dibahen hamu songon i, boi do ra gabe diboto hamu aha na ikkon diulahon hamu tikki stres. Asing ni i berupaya ma hamu mangorui akka ulaon na boi mambahen stres. Alai molo dang boi, pikkirhon ma boha carana asa denggan diatur hamu tikkimuna dohot akka ulaonmuna i.

• Pauba ma caramuna mangida sada masalah. Alana boi do asing reaksi ni ganup halak tikki mangadopi masalah na sarupa. Jadi tergantung caratta mangida masalah i do i. Coba ma tolu saran on:

  1. Unang ma pittor hatop manguhumi sasahalak. Misalna, adong halak na mamotong antrianmuna. Molo pittor didok rohamuna, “Ai roa ma pangalaho ni on,” boi do gabe jut rohamuna. Alai molo didok rohamuna, “Na adong do ra urusanna boasa dibahen ibana songon i,” boi do gabe moru jut ni rohamuna i.

  2. Lului ma sisi positif ni sada situasi. Uppamana, daripada sai ngongong hita tikki paimahon dokter manang tikki di bandara, tumagon do tapakke tikkitta lao manjaha-jaha manang mambukka email.

  3. Unang ma holan masalahta na torus tapikkiri. Sukkun ma dirimuna, “Hira-hira gabe lam balga do masalah on marsogot manang saminggu nai?” Boi do sukkun-sukkun sisongon i mangurupi hita mamboto, na dia masalah na gelleng dohot na balga.

 Berupaya ma Asa Taratur

“Ikkon denggan do sude mardalan jala taratur.”—1 KORINT 14:40.

Lapatanna: Berupaya ma asa toktong taratur ngolumuna.

• Lomo do rohatta molo taratur ngolutta. Alai molo tapaleleng-leleng mangulahon sada ulaon, boi do gabe sursar jadwalta jala gabe stres ma hita. Bahkan boi do gabe lam godang ulaon na so sae. Jadi coba ma ihutton dua saran on:

  1. Bahen ma jadwal na masuk akkal, jala ihutton ma i.

  2. Pikkirhon ma akka parange dia do na porlu dipauba hamu, asa unang jotjot dipaleleng-leleng hamu mangulahon ulaonmuna.

Toktong ma Seimbang

“Dumenggan do sanggolom istirahat sian dua golom halojaon, na dos songon mangalele alogo.”—PARJAMITA 4:6.

Lapatanna: Molo holan na karejo do hamu torus jala dang olo istirahat, dang boi hamu menikmati hasil karejomuna, ala nga habis be tikki dohot gogomuna.

• Ikkon sittong do cara marpikkirmuna taringot hepeng dohot karejo. Unang ma dirippu hamu molo lam godang hepengmuna, pasti tamba do las ni rohamuna jala gabe moru ma stresmuna. Gariada, olo do gabe lam stres hamu alani i. Didok do di Parjamita 5:12, “Anggo na mora, dang boi ibana modom alani artana na godang i.” Jadi puas ma hamu tu na adong di hamu.

• Lehon ma tikkimuna lao santai. Alana boi do moru stres molo taulahon akka na mambahen las rohatta. Alai molo akka rekreasi songon na manonton TV, dang sai boi i mangorui stres. Alana dang godang hita bergerak dibahen i.

• Unang ma pajotjottu mamakke perangkat elektronik. Unang ma pajotjottu hamu mangida email, SMS, manang media sosial. Molo dang porlu, unang ma sai dipareso hamu email sian kantor tikki dang karejo hamu.

 Jaga ma Kesehatan

“[Adong] do guna ni mangalatik daging.”—1 TIMOTEUS 4:8.

Lapatanna: Molo ringgas hita marolahraga, gabe lam sehat ma hita.

• Ulahon ma akka na boi mambahen hita gabe lam sehat. Molo marolahraga hita, boi do gabe las rohatta jala dang gabe mura hita marsahit tikki stres. Allang ma sipanganon na bergizi, taratur ma mangan, jala unang ma hurang modom.

• Unang ma ulahon “cara” na sala lao mangorui stres. Songon marisap, marnarkoba, manang mabuk. Lam leleng boi do gabe marsahit hamu jala habis ma hepengmuna alani i. Jala ujungna gabe lam stres ma hamu.

• Molo lam borat do stresmuna i, porlu do marubat hamu tu dokter. Unang ma pola maila hamu.

 Tottuhon ma Dia na Urrikkot

“[Ikkon] diboto hamu dia na urrikkot.”—PILIPPI 1:10.

Lapatanna: Manat ma hamu manottuhon dia na urrikkot.

• Surat ma akka na lao diulahon hamu. Boi do on mangurupi hamu mamboto dia do na ikkon hatop diulahon, dia na so pola mendesak, dia na boi talehon tu na asing, jala dia na so porlu taulahon.

• Pareso ma songon dia hamu mamakke tikki saleleng saminggu. Dung i pikkirhon ma songon dia carana asa lam denggan hamu mamakke tikki. Lam denggan hamu mamakke tikki, lam moru ma stresmuna.

• Bahen ma tikkimuna lao istirahat. Holan satokkin pe hamu istirahat boi do i paulakkon gogo jala mangorui stres.

Pangido ma asa Diurupi Hamu

“Gabe metmet do roha molo holsoan, alai boi do i tarapul alani akka hata na denggan.”—PODA 12:25.

Lapatanna: Boi do tamba semangatta mambege hata ni donganta na patoguhon.

• Ceritahon ma taringot masalahmuna tu dongan na boi mangattusi hamu. Boi do ra diurupi ibana hamu padenggatton cara marpikkirmuna taringot masalah i manang mangalehon jalan keluar na so tarpikkir hian sebelumna. Molo diulahon hamu songon i, boi do gabe lubbang pakkilalaanmuna.

• Pangido ma asa diurupi hamu. Sukkun ma dirimuna, ‘Adong do tugas manang ulaon na boi hulehon tu halak na asing, manang na boi hukarejohon rap dohot halak na asing?’

• Molo adong dongan sakarejomuna na mambahen hamu marsak, lului ma jalan keluarna. Misalna, denggan ma paboa pakkilalaanmuna tu ibana alani sikapna i. (Poda 17:27) Molo tong dang boi, unang ma pola pajotjottu hamu pajuppang jala makkatai tu ibana.

 Patogu ma Parale-aleanmuna tu Debata

“Marlas ni roha ma na mamboto rikkot ni marale-ale tu Debata.” —MATEUS 5:3.

Lapatanna: Dang holansipanganon, pakkean dohot jabu na tahaporluhon. Porlu do tong hita marale-ale tu Debata asa boi hita marlas ni roha.

• Didok Debata do tu hita, “Pasahat hamu ma sude holso ni rohamuna tu Ibana, ai diparrohahon do hamu.” (1 Petrus 5:7) Molo martangiang hita tu Debata jala tarimangi akka na boi patoguhon rohatta, boi do gabe dame tahilala.—Pilippi 4:6, 7.

• Jaha ma akka sijahaon na boi mangurupi hamu lam jonok tu Debata. Sian Bibel do dibuat akka prinsip na adong di majalah on. Boi do on mangurupi hita asa lam jonok tu Debata. Boi do tong i mambahen hita gabe ‘marbisuk jala manat marpikkir’. (Poda 3:21) Alani i bahen ma tikkimuna lao manjaha Bibel. Boi do ra dimulai hamu sian manjaha bukku Poda.