PARSIAJARAN 8
Boasa dipaloas Debata Hajahaton dohot Sitaonon?
1. Sian dia do mula ni hajahaton?
Dipasombu Debata harajaon ni manisia leleng mamarenta laho patuduhon molo nasida ndang boi pasohon sude parungkilon ni manisia
Hajahaton adong di tano on tingki Sibolis manghatahon gabus na parjolo. Di mulana i, Sibolis on surusuruan na singkop do ibana. Alai, ”ndang tindang ibana di hasintongan”. (Johannes 8:44) Dihalomohon rohana asa disomba ibana hape holan Debata do na patut disomba. Margabus do Sibolis tu borua na parjolo i ma si Hawa, jala dielaela do borua i asa mangoloi ibana, unang di Debata. Mangihut do si Adam ndang mangoloi Debata. Na pinillit ni si Adam mambahen parungkilon jala hamatean.—Jaha 1 Musa 3:1-6, 19.
Tingki Sibolis mangelaela si Hawa asa ndang mangoloi Debata, mamungka hatangkangon do Sibolis mangalo Debata dohot hadirionNa na gabe raja na tumimbul. Gumodangan angka jolma mangihuthon Sibolis jala manundalhon Debata na marhuaso tu nasida. Jala Sibolis ma na gabe marhuaso di portibi on.—Jaha Johannes 14:30; 1 Johannes 5:19.
2. Na martihas do angka tompaan ni Debata?
Jadijadian ni Debata sude singkop. Ditompa Debata jolma dohot surusuruan na boi do nasida singkop laho mangoloi Ibana. (5 Musa 32:4, 5) Ditompa Debata hita mardongan sada pasupasu i ma na boi hita mamillit jala mangulahon na denggan manang na jahat. On sada dalan di hita laho patuduhon holongta tu Debata.—Jaha Jakobus 1:13-15; 1 Johannes 5:3.
3. Boasa dipaloas Debata parungkilon sahat tu sadarion?
Dipaloas Debata do hatangkangon mangalo hadirionNa saleleng on. Boasa? Laho patuduhon molo ndang ala ni Ibana, ise pe na mamarenta ndang laho mambahen hadengganon tu jolma. (Parjamita Sian Si Salomo 7:29; 8:9) Dung 6.000 taon lelengna jolma mangulahon lomona be, patar ma. Angka huaso ni jolma on ndang boi pasohon porang, hajahaton, hageduhon, manang sahit.—Jaha Jeremia 10:23; Rom 9:17.
Asing ni i, pamarentaon ni Debata parohon pasupasu tu angka na olo unduk tu Ibana. (Jesaya 48:17, 18) Ndang sadia leleng nai, pasohoton ni Jahowa ma sude pamarentaon ni jolma. Holan angka na mamillit pamarentaon ni Debata ma na laho mangingani tano on.—Jesaya 11:9. Jaha Daniel 2:44.
Tonton ma video Boasa Dipaloas Debata Masa Hasusaan?
4. Ala ni lambas ni roha ni Debata, dalan aha ma on tu hita?
Sibolis mandok ndang adong na olo manomba Jahowa sian ias ni rohana. Olo do hita patuduhon molo i ndang toho? Olo, boi do! Ala parlambas roha do Debata i, adong do dilehon tingki tu hita laho patuduhon na tutu do hita mamillit pamarentaon ni Debata manang pamarentaon ni manisia. Sian parngoluonta tarida ma ise na tapillit.—Jaha Job 1:8-12; Poda Sian Raja Salomo 27:11.
5. Aha ma tandana molo tapillit Debata na gabe panggomgomi?
Aha na tapillit patuduhon na tahalomohon do Debata gabe Parhuaso tu hita
Tanda na tapillit Debata gabe panggomgomi i ma molo talului jala taulahon hasintongan na sian Hata ni Debata, i ma Bibel. (Johannes 4:23) Boi do tatundalhon huaso ni Sibolis molo ndang taihuthon marpolitik manang marporang, songon Jesus na jolo.—Jaha Johannes 17:14.
Dipangke Sibolis do huasona laho pasiarhon ulaon parmainanon na manegai. Molo tapasiding angka sisongon i, olo do ra aleale manang sisolhotta mangarehei manang mangalo hita. (1 Petrus 4:3, 4) Alani i, ingkon tapillit. Na laho saor do hita dohot angka na manghaholongi Debata? Olo do hita mangihuthon angka patik ni Debata na pataridahon bisuk dohot holongNa i? Molo songon i, tapatuduhon ma na margabus do Sibolis tingki didokhon molo adong sitaonon, ndang adong agia sahalak pe na laho mangulahon aha na didok Debata.—Jaha 1 Korint 6:9, 10; 15:33.
Ala Debata manghaholongi jolma, ingkon pasidingonNa hajahaton dohot sitaonon. Angka na marhaporseaon tu angka i boi manghilala hangoluan na salelenglelengna di tano on.—Jaha Johannes 3:16.
