Psalmen 89:1-52
Maskil.* Sian si Etan+ pinoppar ni si Esrahi.
89 Sai endehonokku do taringot holong ni roha* na pinatudu ni Jahowa saleleng ni lelengna.
Marhite pamanganku paboaokku do taringot pambahenanmu na sittong saleleng ni lelengna.
2 Ai hudok do, “Martahan do holong ni roha* na pinatudumi saleleng ni lelengna,+Jala hot do akka pambahenanmu na sittong i di langit.”
3 Didok Ho do, “Nungnga hubahen parjanjian tu halak na hupillit i,+Nungnga marsumpa au tu si Daud naposokki.+
4 ‘Bahenokku do hot pinopparmu*+ saleleng ni lelengna,Jala bahenokku do hot tahtam saleleng ni lelengna.’”+ (Sela)
5 Dipuji langit do akka ulaonmu na balga, ale Jahowa.Jala pujion ni akka na badia i ma pambahenanmu na sittong i.
6 Ai dang adong na songon Ho di langit, ale Jahowa.+
Dang adong akka anak ni Debata+ na songon Jahowa.
7 Sangap do Debata di tonga-tonga ni akka na badia i,+Jala sude do na di sakalilingna makkabiari Ibana.+
8 Ale Debata Jahowa Pamimpin ni Akka Tentara,* na gogo do Ho.Dang adong na tudos songon Ho, ale Jahowa.*+
Jala toktong do Ho setia.+
9 Diparetta Ho do laut na margalumbang,+Jala dibahen Ho do so galumbangna na balga i.+
10 Dihancurhon Ho do Rahab*+ jala dipamate Ho.+
Marhite tanganmu na gogo i, dibahen Ho do marserak akka musum.+
11 Appunam do langit dohot tano on,+Ho do na mambahen tano on dohot nasa isina.+
12 Ho do na manoppa utara dohot selatan,Marlas ni roha do Tabor+ dohot Hermon+ mamuji goarmu.
13 Gogo do tanganmu,+Massai gogo do i,+Jala timbo do diangkat Ho tangan kananmu.+
14 Hasittongan dohot hatigoran do fondasi ni tahtam,+Jala jongjong do di jolom holong ni roha* dohot roha na setia.+
15 Marlas ni roha ma halak na marsurak alani las ni roha.+
Ale Jahowa, asi do roham* tu nasida jala torus do nasida mardalan rap dohot Ho.
16 Marlas ni roha do nasida ganup ari alani goarmu,Jala dipasangap do nasida alani akka ulaonmu na sittong i.
17 Dibahen Ho do nasida sangap jala gogo,+Alani asi ni roham, dibahen Ho do lam margogo hami.*+
18 Ai sian Jahowa do perisainami,Jala sian Debata Nabadia ni Israel i do rajanami.+
19 Najolo marhite parnidaan didok Ho do tu akka naposom na setia,
“Hulehon do huaso tu halak na gogo i,+Jala hupasangap do halak na hupillit sian tonga-tonga ni bangso i.+
20 Nungnga juppangku be si Daud naposokki,+Jala hupillit* do ibana mamakke miak na badia.+
21 Huurupi do ibana marhite tanganku,+Jala hupatogu do ibana marhite tanganku.
22 Dang adong be musu na manjalo pajak* sian ibana,Jala dang adong be halak na jahat na manusai ibana.+
23 Hancurhonokku ma akka musuna na di jolona,+Jala taluhonokku ma akka halak na marsogo ni roha tu ibana.+
24 Toktong do hupatudu holong ni rohakku* tu ibana jala setia do Au tu ibana,+Lam margogo ma ibana alani goarhu.
25 Bahenokku do tanganna mangarajai laut,Jala bahenokku do tangan kananna mangarajai akka sunge.+
26 Dung i dohononna ma tu Au, ‘Ho do Bapakku,Debatakku, dohot Dolok Batu na paluahon au.’+
27 Bahenokku ma ibana gabe anak siakkangakku,+Na untimbo sian sude raja di tano on.+
28 Toktong do patuduokku holong ni rohakku* tu ibana saleleng ni lelengna,+Jala hot do parjanjiakku tu ibana saleleng ni lelengna.+
29 Bahenokku do hot pinopparna saleleng ni lelengnaJala bahenokku do hot tahtana songon langit.+
30 Molo dilupahon akka anakna patikkuJala dang diihutton nasida akka aturanku,
31 Molo dialo nasida hukum na hubahenJala dang dioloi nasida parettakku,
32 Hukumokku ma nasida mamakke tukkot ala mangalo nasida,+Jala lissingokku ma nasida ala marsala nasida.
33 Alai toktong do patuduokku holong ni rohakku* tu ibana,+Jala dang sundatakku janjikku tu ibana.
34 Setia do Au tu parjanjiakki+Jala na so jadi muba hatakki.+
35 Molo nungnga marsumpa Au, ikkon i do na saut sahat tu saleleng ni lelengna, ai badia do Au,Na so jadi gabusakku si Daud.+
36 Hot do pinopparna sahat tu saleleng ni lelengna,+Jala hot do tahtana di jolokku songon mataniari.+
37 Hot do tahtana i saleleng ni lelengna dos songon bulan,Dos songon saksi na setia di langit.” (Sela)
38 Alai saonari nungnga ditinggalhon Ho ibana jala dibolokkon Ho,+Muruk situtu do Ho tu halak na pinillitmi.
39 Dang diingot Ho be janji na binahenmu tu naposomi,Dibahen Ho do ramun* mahkotana, ai disappatton Ho do i tu tano.
40 Diruppakkon Ho do sude tembok* na binahenna,Jala dihancurhon Ho do bentengna.
41 Sude do halak na lewat mambuat artana,Jala direhei akka tetanggana do ibana.+
42 Dibahen Ho do monang akka musuna,*+Jala dibahen Ho do marlas ni roha sude alona.
43 Dibahen Ho do dang marguna podangna,Jala dibahen Ho do talu ibana di parporangan.
44 Dibahen Ho dang sangap be ibana,Jala disappatton Ho do tahtana tu tano.
45 Dibahen Ho do ibana hatop matua,Jala dibahen Ho do ibana marlea. (Sela)
46 Sadia leleng nai do Ho martabuni ale Jahowa? Saleleng ni lelengna nama?+
Sadia leleng nai do sai marsigorgor murukmi songon api?
47 Ingot ma parsatokkinan do ngolukkon!+
Na so adong do gunana ditoppa Ho jolma?
48 Adong haroa jolma na mangolu saleleng ni lelengna jala dang boi mate?+
Boi haroa tarpalua jolma dirina sian huaso ni Kuburan?* (Sela)
49 Didia do holong ni roha* na hea pinatudumi ale Jahowa,Holong ni roha na hea dijanjihon Ho tu si Daud ala setia Ho?+
50 Ale Jahowa, ingot ma songon dia naposomon direhei,Songon dia au manaon sude rehe-rehe ni jolma.
51 Ingot ma songon dia akka musum mangaleai halak na pinillitmi, ale JahowaIngot ma songon dia nasida mangaleai sude na binahenna.
52 Anggiat ma dipuji Jahowa saleleng ni lelengna. Amen, Amen.+
Surat na di toru
^ As. “bonim”.
^ Manang “Sebaot”, lapatanna pamimpin ni akka suru-suruan na di banua ginjang.
^ Manang “Jah”. “Jah” singkatan goar ni Jahowa. Ida Lampiran A5.
^ As. “marsinondang do bohim”.
^ As. “diangkat Ho do tanduknami”.
^ Manang “silehon-lehon”.
^ Manang “sude inganan parlinggoman na sian batu”.
^ As. “Diangkat Ho do tangan kanan ni musuna”.
