Jesaya 66:1-24
66 Songon on ma didok Jahowa,
“Surgo i do tahtakku, jala tano on do sidege-degean ni pattu.+
Alani i, jabu na songon dia ma na lao pajongjongonmuna di Au?+Jala dia ma inganan na boi gabe inganakku tinggal?”+
2 “Tanganku sandiri do na mambahen on sude,Jala songon i ma sudena i gabe adong,” ninna Jahowa.+
“Alai idaokku do halak sisongon on,Halak na serep rohana, halak na manolsoli rohana, jala na mabiar tu hatakku.+
3 Halak na maneat lombu dos songon na mambunu jolma.+
Halak na mamelehon biru-biru dos songon na mamonggolhon rukkung ni biang.+
Halak na mangalehon pelean dos songon na mamelehon mudar ni babi!+
Halak na mangalehon haminjon*+ gabe pelean parningotan, dos songon halak na mangido pasu-pasu marhite manjaha mantra.*+
Dipillit nasida do dalan ni nasida sandiri,Jala las do roha ni nasida tu akka na huhagigihon.
4 Alani i, pillitokku ma cara lao manghukum nasida,+Jala na massai dihabiari nasida do parookku tu nasida.
Ai tikki hujou nasida, dang adong na mangalusi,Tikki makkatai Au, dang adong na manangihon.+
Torus do diulahon nasida na jahat di jolokku,Jala dipillit nasida do akka na huhasogohon i.”+
5 Tangihon ma hata ni Jahowa, hamu akka na mabiar tu hatana,
“Sogo do roha ni akka haha anggim tu ho, jala mandao do nasida alani goarhu.
Didok nasida do, ‘Sai anggiat ma dimuliahon Jahowa!’+Alai na ro ma Debata jala bahenonna ma hamu marlas ni roha,
Jala pailaonna ma nasida.”+
6 Adong soara na gaor di kota, soara sian bagas joro!
Soara ni Jahowa do i na mambalos akka musuna hombar tu pambahenan ni nasida.
7 Andorang so haccitan borua i, nungnga partus ibana.+
Andorang so dihilala ibana haccit ni na lao partus, nungnga ditubuhon ibana sada anak.
8 Ise ma na hea mambege sisongon i?
Ise ma na hea mangida sisongon i?
Hea do tubu sada luat di bagasan sadari?
Hea do tubu sada bangso di bagasan satokkin?
Alai anggo Sion, dang pola leleng ibana haccitan, pittor ditubuhon ibana do anakna.
9 “Bahenokku do bukka bortian* ni sahalak ina alai dang hupaloas tubu anakna?” ninna Jahowa.
“Manang hupaloas do naeng tubu sahalak poso-poso alai pittor hututup bortian ni omakna?” ninna Debatam.
10 Sude hamu na makkaholongi Jerusalem, marlas ni roha+ jala marolop-olop ma hamu rap dohot ibana.+
Sude hamu na marlungun ni roha alani ibana, marlas ni roha ma hamu rap dohot ibana,
11 Dos songon sahalak ina na manusui anakna sappe butong, songon i ma Jerusalem parorotton hamu.Tutu, bahenonna ma hamu puas jala marlas ni roha situtu, ai nungnga dipasangap ibana.
12 Ai songon on do hata ni Jahowa,
“Hulehon do tu ibana hadameon dos songon sunge na mardalan+Jala hulehon do tu ibana hasangapon ni akka bangso dos songon aek na doras.+
Manusu ma hamu tu ibana jala dioppa ma hamu,Diabing-abing ibana ma hamu di atas ni lututna.
13 Songon sahalak ina na mambahen las roha ni anakna,Toktong ma bahenokku las rohamuna,+Las ma rohamuna alani Jerusalem.+
14 Idaonmuna ma na masa i jala marlas ni roha ma hamu,Tamba pir ma holi-holimuna songon duhut-duhut na lomak.
Botoon ni akka naposona ma huaso* ni Jahowa,Alai murukanna ma akka musuna.”+
15 “Ro nama Jahowa songon api,+Rap dohot akka kareta porangna na songon halisuksung,+Lao mambalos akka musuna mardongan muruk,Lao manonggak nasida marhite api na marjimbur-jimbur.+
16 Hukumon ni Jahowa ma sude jolma,Marhite api dohot podangna,Jala godang ma halak na hona bunu dibahen Jahowa.
17 “Adong do akka halak pabadiahon dirina dohot na paiasson diri ni nasida asa boi masuk tu akka ladang na badia.*+ Diallang nasida do jagal babi,+ bagudung,+ dohot akka na huhagigihon. Alai marujung nama ngolu ni nasida,” ninna Jahowa.
18 “Ai huboto do pikkiran dohot pambahenan ni nasida. Na ro nama Au papunguhon akka halak na sian sude bangso dohot bahasa. Ro ma nasida jala idaon ni nasida ma hamuliaokku.”
19 “Bahenokku ma sada tanda di tonga-tonga ni nasida. Suruokku ma piga-piga halak na selamat lao tu akka bangso. Suruokku ma nasida tu Tarsis,+ tu Pul, tu Lud+ (luat ni akka pemanah), tu Tubal, tu Javan,+ dohot tu akka pulo na dao, na so hea mambege taringot tu Au manang na so hea mangida hamuliaokku. Dung i, baritahonon ni nasida ma hamuliaokku tu akka bangso.+
20 Diboan nasida ma sude haha anggim sian sude bangso.+ Diboan ma nasida tu Jerusalem dolokku na badia i, lao gabe silehon-lehon tu Jahowa. Diboan ma nasida di atas ni hoda, di kareta hoda, di padati na martutup, di halode* dohot di atas ni unta na hatop mardalan. Diboan ma nasida dos songon di tikki diboan halak Israel silehon-lehon ni nasida di inganan na ias tu jabu ni Jahowa,” ninna Jahowa.
21 “Pillitokku ma piga-piga sian nasida lao gabe malim dohot halak Lepi,” ninna Jahowa.
22 “Dos songon langit na imbaru dohot tano na imbaru+ na hutoppa i na lao toktong adong di jolokku,” ninna Jahowa, “Songon i ma pinopparmuna dohot goarmuna na lao toktong do i adong.”+
23 “Ro ma sude jolma marsomba tu jolokku,*+Toktong ma i diulahon nasida ganup bulan dohot ganup minggu,”* ninna Jahowa.
24 “Jala kaluar ma nasida, diida nasida ma bakke ni halak na mangalo tu Au,Akka gilok-gilok na mangallangi nasida dang olo mate,Jala api na manutung nasida dang olo mittop,+Magigi do sude halak na mangida i.”
Surat na di toru
^ Manang boi do “halak na manomba debata na so sittong”.
^ Manang “rahim”.
^ As. “tangan”.
^ As. “akka ladang na di pudi ni halak na di tonga-tonga”. Na nidokna, i ma akka ladang na dipakke lao manomba debata na so sittong.
^ Di bahasa Heber, binatang on i ma hasil perkawinan ni halode jantan dohot hoda boru-boru.
^ Manang “marsomba lao manomba Au”.
^ As. “Mulai sian bulan baru tu bulan baru jala sian ari Sabat tu ari Sabat”.
