Jesaya 36:1-22
36 Di taon na pasappulu opatton di pamarettaon ni Raja Hiskia, ro ma si Sanherib raja ni Asiria+ mangalo akka kota na marbenteng di Juda. Ditaluhon ibana ma sude kota i.+
2 Disuru raja ni Asiria ma Rabsake*+ dohot massai godang tentarana. Disuru ma nasida sian Lakis+ lao tu Jerusalem mandapotton Raja Hiskia. Marbaris ma nasida sude di labbung ni saluran ni aek na sian kolam parginjang,+ na di dalan lao tu inganan ni akka panussi.+
3 Dung i kaluar ma si Eliakim+ anak ni si Hilkia na mangurus istana ni raja, rap dohot si Joa anak ni si Asap juru tulis ni raja, dohot si Sebna+ sekretaris i mandapotton ibana.
4 Didok Rabsake i ma tu nasida, “Dokkon ma tu si Hiskia, ‘On ma didok raja ni Asiria na sangap i, “Aha huroha na diasakkon+ ho?
5 Didokkon ho malo ho marporang jala jago do akka tentaram. Alai holan hata do i. Ise ma dipangasahon ho umbahen na barani ho mangalo au?+
6 Dos songon bulu na maropuk do Mesir na dipangasahon hamu. Molo dibahen sasahalak i gabe tukkotna, maropuk ma i jala laos rusuk ma i tu tanganna. Songon i ma bahenon ni si Firaun raja ni Mesir tu sude halak na mangasahon ibana.+
7 Molo didok hamu tu au, ‘Jahowa Debatanami do na dipangasahon hami,’ kan nungnga diruppakkon+ si Hiskia inganan panombaon* dohot langgatanna? Hape disuru ibana do muse halak Juda dohot halak Jerusalem asa marsomba di jolo ni langgatan na adong disi.”’+
8 Saonari martaru ma hamu dohot tuanku raja ni Asiria:+ Hulehon pe tu hamu 2.000 hoda molo boi dapotmuna nasa i godang ni halak na boi makkunduli hoda i.
9 Nang pe dilehon Mesir tu hamu akka kareta porang dohot akka tentara na marhoda, dang taralo hamu sada gubernur na ummetmet sian sude pejabat ni tuanku.
10 Na dirippu hamu do dang diloas Jahowa au mangalo jala manaluhon luat on? Jahowa do na mandok tu au, ‘Lao ma ho mangalo jala manaluhon luat i.’”
11 Gabe didok si Eliakim, si Sebna,+ dohot si Joa ma tu Rabsake i,+ “Marbahasa Aram*+ ma ho makkatai tuan, ai huattusi hami do i. Unang ma pakke bahasa ni halak Jahudi, asa unang dibege akka halak na adong di tembok an.”+
12 Alai didok Rabsake i ma tu nasida, “Na dirippu hamu do holan tu hamu dohot tu tuanmuna disuru tuanku au makkatai? Dohot do au disuru makkatai tu akka halak na hundul di tembok an, i ma akka halak na lao mangallang kotoranna dohot manginum kossingna rap dohot hamu.”
13 Dung i jongjong ma Rabsake i jala gogo ma soarana makkatai di bahasa ni halak Jahudi.+ Didok ibana ma, “Tangihon ma hata ni raja ni Asiria na sangap i.+
14 On ma na didok raja i, ‘Unang ma olo hamu dioto-otoi si Hiskia. Ai dang tolap ibana paluahon hamu.+
15 Unang ma olo hamu disuru si Hiskia asa marhaposan tu Jahowa,+ nang pe didok ibana, “Paluaon ni Jahowa do hita. Jala dang pasahatonna kota on tu raja ni Asiria.”
16 Unang ma tangihon si Hiskia. Ai on ma na nidok ni raja ni Asiria, “Mardame ma hamu dohot au jala menyerah ma hamu. Boi ma allangonmuna parbue ni hau anggur dohot hau aramuna. Jala boi ma inumonmuna aek sian panampungan ni aekmuna.
17 Dung i ro ma au mangalap hamu, jala boanokku ma hamu tu sada luat na dos songon luatmuna on.+ Adong do di luat i gandum, barli,* dohot hau anggur lao mambahen roti dohot anggur siinumon.
18 Unang olo hamu dioto-otoi si Hiskia, tikki didok na lao paluaon ni Jahowa hamu. Ai adong huroha sian debata ni akka bangso na asing na boi paluahon nasida sian raja ni Asiria?+
19 Didia ma akka debata ni halak Hamat dohot halak Arpad?+ Didia ma akka debata ni halak Separwaim?+ Boi do nasida paluahon Samaria sian tanganku?+
20 Dang adong akka debata na boi paluahon akka bangso on sian tanganku. Jadi boasa ma dirippu hamu boi paluaon ni Jahowa Jerusalem sian tanganku?”’”+
21 Alai sai sip do nasida jala dang olo nasida mangalusi. Ai nungnga disuru Raja Hiskia hian asa unang dialusi+ nasida halak na ro i.
22 Diribak si Eliakim anak ni si Hilkia pangurus ni istana ni raja i ma bajuna, rap dohot si Joa anak ni si Asap juru tulis ni raja, dohot si Sebna+ sekretaris i. Lao ma nasida manjuppangi Raja Hiskia jala dipaboa nasida ma hata ni Rabsake i.
Surat na di toru
^ Manang “kepala ni akka na mangurus siinumon ni raja”.
^ Manang “Mamakke bahasa ni halak Siria”.
^ Suan-suanan na songon eme.
