Jesaya 34:1-17
34 Hamu akka bangso, pajonok hamu ma jala tangihon hamu ma,Hamu akka bangso, parrohahon hamu ma.
Hamu akka tano dohot nasa isina,Sude luat dohot hasilna, tangihon ma.
2 Ai nungnga muruk Jahowa tu sude bangso,+Jala muruk situtu do Ibana tu sude tentara ni nasida,+
Dihancurhon nama nasida,Jala pamateonna ma nasida sude.+
3 Dibolokkon ma akka bakke ni na mate i,Jala bau busuk ma bakke ni nasida i,+Mabaor* ma akka dolok dibahen mudar ni nasida.+
4 Busuk ma sude akka tentara ni langit,Digulung ma langit i songon na manggulung harotas.
Songon bulung-bulung na malos na mardabuan sian hau anggur,Songon parbue ni hau ara na kisut na mardabuan sian hauna,Songon i ma akka tentara ni langit i mardabuan.
5 “Gok mudar ma podangku di atas ni langit.+
Lao turun nama i mangadili Edom,+Ai nungnga hutottuhon lao pamatehon bangso i sudena.
6 Au, Jahowa, adong do podangku, jala gok mudar nama i.
Ditutupi tabo-tabo ma podang i,+Dohot mudar ni biru-biru jantan dohot hambing,Dohot tabo-tabo ni ginjal ni biru-biru jantan.
Ai diparade Jahowa do pelean di Bosra,Dipamate Ibana do massai godang binatang di Edom.+
7 Mardabuan ma akka lombu jantan liar rap dohot nasida,Songon i nang akka lombu jantan na poso rap dohot lombu na gogo.
Gok mudar ma luat ni nasida,Jala gok ma tabo-tabo di tano ni nasida.”
8 Ai nungnga ditottuhon Jahowa andigan ari lao mambalos+ akka musuna,Taon piga Ibana mambalos na jahat na binahen ni nasida tu Sion.+
9 Muba ma aek ni akka sunge na di Edom* gabe miak ter,Gabe belerang ma akka tanona,Jala luat ni nasida gabe songon miak ter na ditutung.
10 Arian nang borngin, dang na lao mate apina i,Sai nakkok do timusna saleleng ni lelengna.
Toktong do ibana hancur sian tikki tu tikki,Dang adong na mamolus sian i sahat tu saleleng ni lelengna.+
11 Burung pelikan dohot landak ma na maringanan disi.Jala burung hantu na pinggolna ganjang dohot burung gagak ma na tinggal disi.
Pakkeon ni Debata ma tali pangukkur dohot batu lot* tu luat i,Lao patuduhon na lao kosong jala hancur nama inganan i.
12 Dang adong sian akka halak na sangap na disi gabe raja,Jala dang na lao adong be akka pamimpinna.
13 Suan-suanan na marsuga nama na tubu di akka menarana,Ramba dohot suga-suga nama na tubu di bentengna.
Gabe asar ni anjing hutan ma ibana,+Dohot inganan ni burung unta.
14 Pajuppang ma akka binatang na sian padang pasir dohot binatang na marauang,Jala dijou hambing liar* ma akka donganna sapunguan.
Disi ma pidong siborngin* modom jala tinggal disi.
15 Marasar jala martolor ma disi ulok dari,Diporpori ma i sappe menetas jala dijaga do i sude.
Jala marpungu ma lali disi rap dohot akka pasanganna be.
16 Lului hamu ma sudena on di bukku ni Jahowa, jala gogo ma jaha:
Dang adong sian akka i na lao mago,Adong do pasangan ni nasida be,Ai pamangan ni Jahowa do na mambahen paretta on,Jala tondi parbadiana do na papunguhon nasida.
17 Ibana sandiri do na manappatton undi di nasida,Jala tanganna sandiri do na manottuhon inganan ni nasida be.*
Gabe appuna ni nasida ma i sahat tu saleleng ni lelengna,Jala disi ma nasida maringanan sian tikki tu tikki.
Surat na di toru
^ Manang “Banjir”.
^ Ra na nidokna dison i ma Bosra, ibu kota ni Edom.
^ Alat na dipakke lao mamboto tigor do manang na dang sada bangunan.
^ Manang boi do “dijou debata na so sittong na songon hambing”.
^ Pidong na mirip songon burung hantu.
^ As. “na mambagi inganan i mamakke tali pangukkur”.
