Jesaya 19:1-25
19 Barita panguhuman tu Mesir:+
Ida ma! Nungnga ro Jahowa tu Mesir di atas ni ombun na massai hatop.
Makkahitir do di jolona akka debata ni halak Mesir na so marguna i,+Jala mabiar do roha ni halak Mesir.
2 “Bahenokku ma halak Mesir mangalo halak Mesir,Marbada ma na sada tu donganna,Ganup halak mangalo haha anggina dohot donganna jolma,Marporang ma kota na sada tu kota na sada nai, harajaon na sada tu harajaon na sada nai.
3 Gabe maoto ma Mesir,Bahenokku ma sursar sude rencana ni nasida.+
Mangido tolong ma nasida tu akka debata na so marguna,Tu tukkang sihir, tu datu, dohot tu panjujur nasib.+
4 Pasahatonku ma Mesir tu tuan na kejam,Jala raja na jahat ma na mamaretta nasida,”+ ninna Jahowa Pamimpin ni Akka Tentara,* Tuan na sittong.
5 Marsik ma aek na di laut,Mahiang ma aek ni akka sunge jala gabe harsang ma tanona.+
6 Bau busuk ma aek ni akka sunge,Gabe jeppek jala mahiang ma aek ni bondar* ni Sunge Nil na di Mesir.
Busuk ma akka hau tolong dohot arung.*+
7 Akka suan-suanan na di topi ni Sunge Nil, na di muara ni Sunge Nil,Dohot sude tano na di topi ni Sunge Nil+ na disabur boni, gabe koring ma.+
Mago ma i sude diombus alogo.
8 Sai tangis ma akka panakkup dekke,Mangandungi ma akka pakkail na di Sunge Nil,Jala dang sadia godang be halak na manjala dekke di akka sunge.
9 Gabe maila ma halak na mambahen kain sian rami*+Songon i nang halak na manonun abit na bottar.
10 Mandele ma roha ni akka partonun,Jala marsak ma roha ni sude parkarejo na digaji.
11 Maoto do akka pamimpin ni Zoan.+
Akka penasehat ni si Firaun na marbisuk pe mangalehon poda na so masuk akkal.+
Barani do hamu mandok songon on tu si Firaun,
“Pinoppar ni akka na marbisuk do au,Pinoppar ni akka raja najolo do au”.
12 Jadi, didia do akka penasehatmu na marbisuk i?+
Molo diboto nasida do aha na lao bahenon ni Jahowa Pamimpin ni Akka Tentara i tu Mesir, lok ma dipaboa nasida i tu ho.
13 Nungnga diulahon pamimpin ni Zoan akka ulaon ni halak na oto,Nungnga dioto-otoi be akka pamimpin ni Nop,*+Nungnga dililuhon akka kepala suku ni Mesir nasida.
14 Dibahen Jahowa ma nasida bingung,+Jala lilu ma halak Mesir dibahen akka pamimpinna di sude ulaon ni nasida,Dos songon halak na mabuk na tarsulandit dibahen uta-utana sandiri.
15 Dang adong be karejo na boi diulahon halak Mesir,Nang di ulu manang di ihur, di tunas manang di ramba.*
16 Di ari i, gabe songon borua ma halak Mesir. Makkahitir jala mabiar ma nasida. Ai digolom Jahowa Pamimpin ni Akka Tentara i do tanganna lao mangancam Mesir.+
17 Mabiar ma Mesir alani luat Juda. Holan dibege nasida taringot tu luat i, nungnga mabiar nasida. Ai nungnga ditottuhon Jahowa Pamimpin ni Akka Tentara i keputusan taringot tu nasida.+
18 Di ari i, penduduk ni lima kota di Mesir mamakke bahasa Kanaan.+ Marsumpa ma nasida lao setia tu Jahowa Pamimpin ni Akka Tentara. Sada sian akka kota i digoari Kota na Maruppak.
19 Di ari i, adong ma di tonga-tonga ni luat Mesir langgatan tu Jahowa. Jala adong ma sada tiang tu Jahowa di parbatasan ni luat i.
20 Gabe tanda ma i di Mesir, asa diingot nasida Jahowa Pamimpin ni Akka Tentara i. Mangangguki ma nasida tu Jahowa alani akka halak na mambahen sitaonon tu nasida. Dung i, suruonna ma sipalua na sangap lao paluahon nasida.
21 Paboaon ni Jahowa ma dirina tu halak Mesir jala tandaon ni halak Mesir ma Jahowa di ari i. Dilehon nasida ma pelean dohot silehon-lehon tu Ibana. Marjanji ma nasida tu Jahowa jala diulahon nasida do janji i.
22 Attukon ni Jahowa ma Mesir.+ Diattuk ma nasida jala dipamalum. Mulak ma nasida tu Jahowa. Ditangihon Ibana ma pangidoan ni nasida. Jala dipamalum ma nasida.
23 Di ari i, adong ma jalan raya+ sian Mesir tu Asiria. Ro ma halak Asiria tu Mesir. Jala ro ma halak Mesir tu Asiria. Rap manomba Debata ma halak Mesir dohot halak Asiria.
24 Di ari i, marsada ma Israel dohot Mesir rap dohot Asiria.+ Jala gabe pasu-pasu ma nasida di tonga-tonga ni tano on,
25 ai dipasu-pasu Jahowa Pamimpin ni Akka Tentara i do nasida. Didok do, “Dipasu-pasu ma ho ale Mesir bangsokku, dohot ho na binahen ni tanganku ale Asiria, jala hamu ale halak Israel appunakki.”+
Surat na di toru
^ Manang “Sebaot”, lapatanna pamimpin ni akka suru-suruan na di banua ginjang.
^ Manang “saluran ni aek”.
^ Na nidokna, i ma suan-suanan na tubu di rawa-rawa.
^ Suan-suanan na tubu di Mesir, na dipakke lao mambahen abit linen.
^ Manang “Mempis”.
^ Manang boi do “dakka ni hau palem manang tolong”.
