Amos 3:1-15
3 “Ale bangso Israel tangihon hamu ma hata on na pinaboa ni Jahowa taringot tu hamu, bangso na binoanna kaluar sian Mesir,
2 ‘Sian sude bangso na di tano on, holan hamu do na hutanda.+
Alani i, hukumokku nama hamu alani hasalaanmuna.+
3 Boi do dua halak rap mardalan molo so marjanji hian dope nasida lao pajuppang?
4 Marauang do singa di tombak molo so adong mangsa siboddutonna?
Marauang do anak ni singa di asarna molo so adong mangsa sitakkuponna?
5 Boi do hona jorat pidong molo so adong dibahen jorat di tano?*
Boi do bukka jorat molo so adong na manondong?
6 Tung so mabiar ma halak na di kota molo dibege soara ni tarompet?
Tung boi ma masa jea di kota molo so Jahowa na mambahen?
7 Ai dang bahenon ni Jahowa Tuan Natumimbul i manang aha,Molo so jolo dipaboa Ibana rahasiana tu akka panurirangna.*+
8 Molo marauang singa,+ ise ma na so mabiar?
Molo dung dipaboa Jahowa Tuan Natumimbul i hatana, ise ma panurirang na so olo paboahon hatana i?’+
9 ‘Paboa ma i di akka menara na di AsdodDohot di akka menara na di Mesir.
Dokkon ma, “Ro ma hamu marpungu tu akka dolok na di Samaria,+Ida ma nungnga gaor be disiJala gok akka na manipu.+
10 Ai dang diboto nasida mangulahon na sittong,” ninna Jahowa,“Dipapungu nasida do arta marhite hajahaton dohot ulaon na kejam jala disippan do i di akka menara ni nasida.”’
11 Alani i, songon on ma na nidok ni Jahowa Tuan Natumimbul i,‘Na lao ro ma sahalak musu mengepung kota i,+Bahenonna ma dang margogo be hamu,Jala dirampok ma akka menaramuna na marbenteng i.’+
12 Songon on ma na nidok ni Jahowa,‘Dos songon parmahan na manarik dua pat ni biru-biruna manang sada pinggol ni biru-biruna sian baba ni singa,Songon i ma halak Israel na tinggal di Samaria, holan saotik do na boi malua,I ma akka halak na hundul-hundul di podomanna na bagak dohot di kursina na bagak.’*+
13 ‘Tangihon ma jala pasingot ma pinoppar ni si Jakkob,’ ninna Jahowa Tuan Natumimbul i, Pamimpin ni Akka Tentara.*
14 ‘Di ari i, hukumokku ma halak Israel ala mangalo nasida,+Hancurhonokku ma akka langgatan na di Betel,+Jala ponggolokku ma akka tanduk ni langgatan i asa mardabuan tu tano.+
15 Hancurhonokku ma akka jabu na dipakke tikki musim dingin dohot jabu na dipakke tikki musim panas.’
‘Hancurhonokku ma akka jabu na dibahen sian gading,+Jala ruppakonokku ma akka jabu na balga,’*+ ninna Jahowa.”
