1 Raja-Raja 5:1-18
5 Marale-ale do si Hiram raja ni Tirus+ dohot si Daud* saleleng on.+ Alani i, tikki dibege ibana naung gabe raja si Salomo manggattihon bapakna, disuru ibana ma akka parkarejona mandapotton si Salomo.
2 Dung i disuru si Salomo ma asa didok songon on tu si Hiram,+
3 “Takkas do diboto ho, na so boi bapakku si Daud pajongjokkon sada jabu na pasangappon goar ni Jahowa Debatana i. Ai marporang do ibana mangalo akka musu na di sakalilingna, jala ujungna ditaluhon Jahowa do akka musuna i.+
4 Saonari, dame do ngolukku dibahen Jahowa Debatakku,+ ala dang adong be musu di sakalilingku. Dang adong be na mangalo au jala dang adong hasusaan na masa.+
5 Nungnga hea Jahowa marjanji tu bapakku si Daud, didok Ibana do, ‘Anakmu na hupillit hundul di tahtami do na lao pajongjokkon sada jabu na lao pasangappon goarhu.’+ Alani i, naeng pajongjongokku do sada jabu na pasangappon goar ni Jahowa Debatakku.
6 Saonari mangido ma au tu ho, suru ma akka parkarejomi manaba hau ares na di Libanon+ lao di au. Husuru pe akka parkarejokku rap karejo dohot akka parkarejom. Jala hugarar pe gaji ni parkarejomi manang na sadia pe didok ho. Ai takkas do diboto ho, dang adong sian hami na malo manaba hau songon halak Sidon.”+
7 Massai las ma roha ni si Hiram mambege pangidoan ni si Salomo i. Didok ibana ma, “Pinuji ma Jahowa sadari on. Ai dilehon Ibana do sada anak na marbisuk di si Daud, na boi mamaretta bangso na bolon on!”*+
8 Dung i disuru si Hiram ma halak mandok tu si Salomo, “Nungnga hubege be pangidoanmi, jala rade do au paradehon i sude. Huparade pe hau ares dohot hau juniper.+
9 Husuru pe akka parkarejokku mamboan akka hau i sian Libanon sahat tu laut. Dung i, diikkat akka parkarejokku ma hau i disi, jala dibahen songon rakit asa boi diboan tu inganan naung ditottuhonmi. Dung sahat nasida tusi, husuru pe nasida mambukka talina asa boi ditarui. Alai gattina, ikkon paradeonmu do sipanganon na porlu tu istanakku.”+
10 Jadi diparade si Hiram ma sude hau ares dohot hau juniper songon na pinangido ni si Salomo.
11 Jala dilehon si Salomo ma 20.000 kor* gandum lao sipanganon ni halak na di istana ni si Hiram dohot 20 kor miak jetun na dumenggan. Akka i ma na dilehon si Salomo tu si Hiram ganup taon.+
12 Dibahen Jahowa do marbisuk si Salomo songon na dijanjihonna i.+ Dang hea marporang bangso ni si Hiram dohot bangso ni si Salomo, jala adong do dibahen nasida parjanjian.
13 Disuru Raja Salomo ma 30.000 bawa sian sude Israel gabe parkarejona.+
14 Ganup bulan, disuru Raja Salomo ma 10.000 parkarejona i tu Libanon jala saleleng sabulan ma nasida disi. Dung i mulak ma nasida jala tinggal ma nasida di jabuna be saleleng dua bulan. Si Adoniram+ ma na martanggung jawab mangaradoti sude parkarejo i.
15 Adong 70.000 parkarejo ni si Salomo na mangangkat barang jala 80.000 halak panokkok batu+ di dolok i.+
16 Jala adong do 3.300 pejabat daerah+ na martanggung jawab mangaradoti sude parkarejo i.
17 Diparettahon raja i ma asa digali nasida dolok i, asa boi dibuat akka batu na balga dohot batu na arga.+ Jala ditokkoki+ ma i asa boi dibahen gabe batu fondasi+ ni jabu i.
18 Rap karejo ma parkarejo ni si Salomo, parkarejo ni si Hiram, dohot halak Gebal+ manokkoki batu i. Diparade nasida do muse akka hau dohot batu lao pajongjokkon jabu i.
Surat na di toru
^ Manang “Toktong do holong roha ni si Hiram raja ni Tirus tu si Daud”.
^ Manang “na so habilangan on”.
^ 1 kor = 220 liter. Ida Lampiran B14.
