1 Raja-Raja 22:1-53
22 Saleleng tolu taon, dang marporang halak Siria dohot halak Israel.
2 Di taon na patoluhon Raja Jehosapat+ mamaretta di Juda, lao ma ibana mandapotton raja ni Israel.+
3 Didok raja ni Israel ma tu akka pejabatna, “Na so diboto hamu do tanotta Ramot-gilead i?+ Boasa dang tabuat dope i sian raja ni Siria?”
4 Didok ibana ma tu si Jehosapat, “Olo do ho mandongani au marporang tu Ramot-gilead?” Dialusi si Jehosapat ma, “Hudongani pe ho. Jala huboan pe bangsokku dohot akka hodakku.”+
5 Alai didok si Jehosapat ma tu raja ni Israel, “Jolo tasukkun+ ma tu Jahowa.”+
6 Dipapungu raja ni Israel ma 400 panurirang. Disukkun ma tu nasida, “Denggan do molo lao au marporang tu Ramot-gilead manang na dang?” Dialusi akka panurirang i ma, “Denggan do i. Pasahaton ni Jahowa do Ramot-gilead tu raja i.”
7 Dung i didok si Jehosapat ma, “Na so adong do panurirang* ni Jahowa dison? Ibana ma jo tasukkun.”+
8 Didok raja ni Israel ma tu si Jehosapat, “Adong dope nian sada nai. Goarna si Mikaya anak ni si Jimla. Boi do tasukkun Jahowa marhite ibana.+ Alai sogo do rohakku tu ibana.+ Ai dang hea na denggan dipaboa ibana taringot tu au.”+ Didok si Jehosapat ma tu ibana, “Unang ma didokkon ho songon i.”
9 Dijou raja ni Israel ma sahalak pejabat istana. Didok ma, “Hatop, alap jo si Mikaya anak ni si Jimla.”+
10 Tikki i, di inganan pardegean na di jolo ni gerbang ni Samaria do raja ni Israel dohot si Jehosapat. Hundul do nasida di tahta ni nasida be mamakke baju harajaon. Jala sude ma panurirang manurirangi di jolo ni nasida.+
11 Dung i dibahen si Sedekia anak ni si Kenaana ma akka tanduk sian bosi. Jala didok ibana ma, “On ma na nidok ni Jahowa, ‘Marhite akka tanduk on ma aloonmu* halak Siria sappe mate nasida sude.’”
12 Dohot ma sude akka panurirang i mandok songon i. Didok nasida ma, “Lao ma ho rajanami tu Ramot-gilead. Sai na monang do ho. Ai lehonon ni Jahowa do kota i tu ho.”
13 Dung i didok halak na sinuru ni raja i ma tu si Mikaya, “Sude do panurirang paboahon na denggan tu raja i. Jadi ho pe, songon i ma dokkon tu raja i.”+
14 Alai didok si Mikaya ma, “Songon pastina Jahowa mangolu,* aha na nidok ni Jahowa ikkon i do pasahatonku.”
15 Dijuppangi si Mikaya ma raja i. Jala disukkun raja ma tu ibana, “Ale Mikaya, denggan do molo lao hami marporang tu Ramot-gilead manang na dang?” Dialusi si Mikaya ma, “Denggan do i. Pasahaton ni Jahowa do Ramot-gilead tu raja i.”
16 Didok raja i ma, “Ikkon piga hali nai suruokku ho marsumpa, asa paboaonmu na sittong tu au di bagasan goar ni Jahowa?”
17 Gabe didok si Mikaya ma, “Huida do sude halak Israel marserak di akka dolok,+ songon biru-biru na so adong parmahanna. Jala songon on ma didok Jahowa, ‘Dang adong be tuan ni nasida. Lok ma mulak nasida tu jabu ni nasida be di bagasan dame.’”
18 Alani i didok raja ni Israel ma tu si Jehosapat, “Kan nungnga hudok tu ho, dang hea na denggan dipaboa ibana taringot tu au.”+
19 Didok si Mikaya ma muse, “Saonari, on ma na nidok ni Jahowa. Huida do Jahowa hundul di tahtana+ jala huida do sude tentara na di surgo jongjong di labbungna, di sabola kanan dohot di sabola kirina.+
20 Dung i didok Jahowa ma, ‘Ise na olo mangoto-otoi si Ahab asa lao ibana tu Ramot-gilead jala mate disi?’ Adong ma suru-suruan mandok songon on jala na deba mandok songon an.
21 Dung i ro ma sada suru-suruan+ tu jolo ni Jahowa. Didok ibana ma, ‘Au ma na lao mangoto-otoi raja ni Israel i.’ Disukkun Jahowa ma tu ibana, ‘Songon dia ma bahenonmu?’
22 Didok suru-suruan i ma, ‘Lao ma au jala bahenokku ma margabus akka panurirangna i.’+ Didok Debata ma, ‘Lao ma ho mangoto-otoi ibana, pasti marhasil do ho.’
23 Songon i ma dalanna Jahowa paloasson suru-suruanna mambahen margabus sude panurirangmi.+ Alai nungnga ditottuhon Jahowa na lao masa hasusaan tu ho.”+
24 Dipajonok si Sedekia anak ni si Kenaana ma tu si Mikaya jala dipastap ma bohi ni si Mikaya. Didok si Sedekia ma, “Maksudmu, na so ditogu-togu tondi parbadia ni Jahowa be au? Gabe marhite ho nama i makkatai?”+
25 Dialusi si Mikaya ma, “Botoonmu do i haduan tikki martabuni ho di bagasan kamar.”
26 Dung i didok raja ni Israel ma, “Boan hamu ma si Mikaya on tu si Amon pamimpin ni kota dohot tu si Joas anak ni raja i.
27 Dokkon hamu ma muse tu nasida, ‘On ma na nidok ni raja, “Pamasuk hamu ma ibana tu penjara.+ Jala holan saotik ma lehon roti dohot aek tu ibana, sahat tu na mulak au di bagasan dame.”’”
28 Alai didok si Mikaya ma, “Molo mulak do ho di bagasan dame, dang tutu sian Jahowa na hudok i.”+ Didok ibana ma muse, “Hamu sude, ingot hamu ma na hudok i.”
29 Dung i, lao ma raja ni Israel dohot si Jehosapat raja ni Juda tu Ramot-gilead.+
30 Didok raja ni Israel ma tu si Jehosapat, “Hugatti ma jo baju harajaokkon asa unang ditanda halak au. Dung i lao ma hita marporang. Alai pakke ma baju harajaonmi.” Digatti raja i ma bajuna asa unang ditanda halak ibana.+ Dung i lao ma nasida marporang.
31 Nungnga didok raja ni Siria hian tu 32 pamimpin ni akka tentara na markareta porang,+ “Holan raja ni Israel ma alo hamu. Unang ma alo hamu akka tentara manang pamimpin ni tentara.”
32 Tikki diida akka pamimpin ni tentara na markareta porang i si Jehosapat, dirippu nasida ma i raja ni Israel. Gabe ro ma nasida mangalo ibana, alai marsurak ma si Jehosapat asa diurupi.
33 Dung diboto nasida dang i hape raja ni Israel, dang dilele nasida be ibana.
34 Adong ma sahalak bawa na asal manembakkon panahna. Hape hona ma i tu pardomuan ni baju partahanan ni raja ni Israel. Gabe didok raja i ma tu na mamboan kareta porangna, “Boan ma au kaluar sian parporangan on, ai nungnga lukka au.”+
35 Sadari manipat ma masa parporangan i. Ikkon ditiop nama raja i asa boi jongjong di kareta porangna huhut mangida halak Siria. Alai maraburan do mudarna sian lukkana i tu kareta porang i. Dung botari, mate ma ibana.+
36 Dung bonom mataniari, tarbege ma soara na jou-jou di tonga-tonga ni akka tentara i mandok, “Mulak be ma tu kotana! Mulak be ma tu hutana!”+
37 Dung mate raja ni Israel i, diboan ma ibana tu Samaria jala dikuburhon ma disi.
38 Tikki disussi nasida kareta porang i di sada kolam paridian na di Samaria, ro ma akka biang mandilati mudar ni raja i. Jala maridi do disi* akka boru-boru na so hasea. Gabe saut ma na nidok ni Jahowa.+
39 Sude na niulahon ni si Ahab dohot akka na binahenna, tarsurat do i di bukku sejarah taringot tu akka raja di Israel. Disurat do muse disi taringot tu sude kota na pinajongjongna dohot istana na sian gading+ na pinajongjongna.
40 Mate ma si Ahab jala dikuburhon ma ibana rap dohot akka ompuna.+ Dung i anakna si Ahasia+ ma na gabe raja manggattihon ibana.
41 Di taon na paopatton si Ahab mamaretta di Israel, gabe raja ma si Jehosapat+ anak ni si Asa di Juda.
42 Marumur 35 taon ma si Jehosapat gabe raja. Jala mamaretta ma ibana saleleng 25 taon di Jerusalem. Si Azuba boru ni si Silhi do omakna.
43 Sai toktong do diihutton si Jehosapat sude na niulahon ni si Asa+ bapakna. Dang hea manimbil ibana sian i, jala diulahon ibana do na sittong di jolo ni Jahowa.+ Alai, toktong dope adong disi akka inganan panombaon.*+ Disi do akka halak manutung pelean asa nakkok timusna.
44 Jala sai dibahen si Jehosapat do asa denggan ibana tu raja ni Israel.+
45 Sude na niulahon ni si Jehosapat tarsurat do i di bukku sejarah taringot tu akka raja di Juda. Disurat do muse disi taringot tu akka tentarana na jago dohot taringot tu carana marporang.
46 Dipalao ibana do sian luat i akka bawa na mangulahon seks dohot bawa.*+ Ai dang sude dope nasida dipalao di tikki ni si Asa bapakna.+
47 Di tikki i, dang adong raja di Edom.+ Alai pejabat daerah do na mamaretta disi.+
48 Dibahen si Jehosapat do muse akka kapal Tarsis* lao mambuat mas sian Opir.+ Alai dang boi akka kapal i marlayar ala sega di Esion-geber.+
49 Di tikki i, didok si Ahasia anak ni si Ahab ma tu si Jehosapat, “Lok ma rap marlayar akka parkarejokku dohot parkarejom.” Alai dang olo si Jehosapat.
50 Mate ma si Jehosapat jala dikuburhon rap dohot akka ompuna+ di Kota ni si Daud ompuna i. Dung i, anakna si Jehoram+ ma na gabe raja manggattihon ibana.
51 Di taon na pasappulu pituhon si Jehosapat gabe raja di Juda, gabe raja ni Israel ma si Ahasia+ anak ni si Ahab di Samaria. Saleleng dua taon ma si Ahasia mamaretta Israel.
52 Sai diulahon si Ahasia do na jahat di jolo ni Jahowa. Diihutton ibana do na diulahon ni omakna+ dohot bapakna.+ Jala diihutton ibana do hajahaton ni si Jerobeam anak ni si Nebat na mambahen halak Israel mardosa.+
53 Toktong do disomba ibana patung ni Baal.+ Jala torus do dibahen ibana haccit roha ni Jahowa Debata ni Israel+ songon na binahen ni bapakna.
Surat na di toru
^ Manang “tandukonmu”.
^ Sumpa on patuduhon pasti do ikkon saut janji on, songon pastina Debata mangolu.
^ Manang boi do “Jala disi do paridian ni”.
^ Na nidokna dison, i ma halak na manjual dirina manang na mangulahon seks ala manomba debata na so sittong.
